Nedderdüütschland
Nedderdüütschland is en Kulturruum in Düütschland. Nedderdüütschland ümfaat groff den Ruum, wo Plattdüütsch snackt warrt, schier dat ganze Rebeed nörden vun de Benrather Lien (maken-machen-Isogloss) un vun de Grenz twüschen dat Nedderfranksche un’t Westfäälsche. Präägt is disse Kulturruum vör allen dör de Geografie (Noorddüütsch Deepland mit Geest-, Moor- un Masch-Landschoppen, de an de Süüdgrenz aver ok al in de Middelgebirgen övergeiht), aver ok dör de Herkumst vun de olen Sassen un de plattdüütsche Spraak un dör de Geschicht, in de vör allen de Hanse en grote Rull speelt. Nedderdüütschland is vör allen luthersch präägt, aver in’n Westen gifft dat ok Gegenden, de in de Mehrheit reformeert oder kathoolsch sünd.
In de Vergangenheit hett disse Kulturruum över de düütsche Oostsiedlung un den Hanseverband stark na Skandinavien un na dat Baltikum utstrahlt.
Mit de Geografie un de Armood an Natursteen hängt ok dat kulturelle Charakteristikum vun de Backsteenarchitektur tohoop, de sik in Nedderdüütschland rutbillt hett.
Klore Grenzen laat sik för den nedderdüütschen Kulturruum nich angeven, groff höört dor aver de Noorden vun Düütschland mit Westfalen, de Bundslänner Bremen, Hamborg, Mekelnborg-Vörpommern, Neddersassen, Sleswig-Holsteen un Delen vun Sassen-Anholt, Döringen, Brannenborg, Hessen un Berlin dorto. Histoorsch is ok de Noorden vun dat hüdige Polen mit Pommern un Prüßen bet in’t Baltikum Deel vun dissen Kulturruum. Deelwies warrt de Begrepen Nedderdüütschland oder Plattdüütschland ok strikt för dat Rebeed anwennt, in dat de plattdüütsche Spraak bruukt warrt. Wenn de Fokus weniger op de Spraak liggen schall, denn warrt deelwies ok eenfach de Utdruck Noorddüütschland bruukt.
Wenn de Fokus op de Historie liggt, warrt deelwies ok dat reine Kriterium vun’n hoochdüütschen Luudwannel rantagen. Denn fallt ünner Nedderdüütschland allens, wat dissen Luudwannel gornich mitmaakt hett, also ok de Nedderlannen un Flandern. Disse Sichtwies warrt hüüd nich mehr so faken bruukt, denn de Nedderlandschen un Flamen, de sik fröher mit to de Düütschen tellt hebbt, seht sik nu as egene Nation, de sik vun den Begreep dütsch afgrenzen will.