Norman Earl Thagard

Norman Earl Thagard (* 3. Juli 1943 in Marianna, Bundsstaat Florida, USA) is en ehmalger US-amerikaansch Astronaut. He is de eerste Amerikaner, de mit en russisch Ruumschipp in den Weltruum flagen is.

School un UtbillenÄnnern

Thagard hett de Paxon Senior High School in Jacksonville (Florida) besöcht. 1965 kreeg he en Bachelor un 1966 en Master in Ingenieurwesen, beid vun de Florida State University. 1977 kreeg he en Doktortitel in Medizin vun de University of Texas.

1966 keem Thagard to dat United States Marine Corps un wurr do to en Marinefleger utbildt. Wiels den Vietnamkrieg hett he insgesamt 163 Kampinsatzen flagen.

AstronautentätigkeitÄnnern

In‘n Januar 1978 wurr Thagard vun de NASA as Astronautenanwärter utwählt un ansluutend to’n Missionsspezialisten utbildt.

STS-7Ännern

To de tweet Mission vun de Ruumfähre Challenger is Thagard to sien eerste Mission an‘ 18. Juni 1983 start. Dat weer de eerste Mission mit en Mannschap vun 5 Astronauten. Robert Laurel Crippen weer de Kommandant, sien Pilot weer Frederick Hamilton Hauck. Dorto keemen de Missionsspezialisten John McCreary Fabian un Sally Kristen Ride. Wiels den söss Daag lang düern Floog wurrn de Satelliten ANIK C-2 un PALAPA B-1 utsett. Buterdem wurr to'n eersten Mal mit den Roboterarm (RMS) de Forschungsplattform SPAS-01 utsett un weer infangen. Mit Sally Ride is todem de eerst amerikaansch Frau in't All flagen.

STS-51-BÄnnern

An‘n 29. April 1985 is Thagard weer mit de Ruumfähre Challenger in den Weltruum flagen. Kommandant bi disse Mission weer Robert Franklin Overmyer un Pilot Frederick Drew Gregory. Dorto keemen de Missionsspezialisten Don Leslie Lind un William Edgar Thornton as ok de Bruuklastspezialisten Lodewijk van den Berg un Taylor Gun-Jin Wang.

De Bruuklast vun de Mission bestunn ut dat Spacelab vun de Europääsch Weltruumorganisatschoon (ESA). Mitführt wurrn 15 Experimente, vör allen to dat Ünnersöken vun Fleetigkeiten un Warkstoffen in’n swoorlosen Ruum. För biologische Ünnersöken weern todem twee Aapen un 24 Gnaagdeerter an Bord. 14 Experimente hett man spoodriek dörführen kunnt. Buterdem wurr de Wetenschapssatellit NUSAT utsett.

STS-61-GÄnnern

STS-61-G weer en Mission mit de Ruumfähre Atlantis in‘n Mai 1986 ween, wurr aber nah dat Challenger-Unglück afseggt. Dorbi harr de Ruumsonde Galileo in‘t All brocht wurrn sullen. Als Mannschap weern vörsehn David Mathieson Walker, Ronald John Grabe, Norman Earl Thagard un James Dougal Adrianus van Hoften.

STS-30Ännern

An‘n 4. Mai 1989 is Thagard mit de Ruumfähre Atlantis in‘t All flagen. Kommandant weer David Mathieson Walker un de Pilot Ronald John Grabe. Dorto keemen de Missionsspezialisten Mary Louise Cleave un Mark Charles Lee. Bruuklast weer de Venussonde Magellan, de mit en IUS-Böverstuuf in Richt Venus in Gang sett wurr. STS-30 weer de eerste Mission, bi de dat Space Shuttle dorto bruukt wurr, en interplanetare Ruumsond to starten. In den wiederen Verloop vun de Mission muss een vun de fiev Hööftcomputer in’n Orbit uttuuscht wurrn. De Mission weer nah ruchweg veer Daag afslooten

STS-42Ännern

An’n 22. Januar 1992 is Thagard as Bruuklastkommandant vun de Discovery in’t All flagen. Kommandant bi disse Mission weer Ronald John Grabe un de Pilot Steven Scot Oswald. William Francis Readdy un David Carl Hilmers weern as Missionsspezialisten an Bord. Dorto keemen noch de Bruuklastspezialisten Ulf Merbold ut Düütschland un Roberta Lynn Bondar ut Kanada.

In de Bruuklastbucht vun dat Space Shuttle befunn sück dat Mikrogravitatschonslabor IML-1. Dat Spacelab-Modul enthull Experimente, um de komplexen Effekte vun de Swoorlosigkeit up levend Organismen un anner Materialien uttoforschen. Um Experimente ahn Ünnerbreeken dörtoführen, hett de Mannschap in‘n Schichtbdriev arbeit. De Mission düer 8 Daag, 1 Stünn un 14 Minüüt.

Arbeit up de Ruumstatschoon MirÄnnern

Sien letzte Mission gung an’n 14. März 1995 an Bord vun dat russisch Ruumschipp Sojus TM-21 los. He un sien beid Kollegen Wladimir Nikolajewitsch Deschurow un Gennadi Michailowitsch Strekalow flogen to de Ruumstatschoon Mir. Dor weer he as eerst Amerikaner Liddmaat vun en Stammbesatten (MIR EO-18) vun de Mir. 28 Experimente wurrn wiels sein 115 Daag lang düüern Upenholt in’n Weltruum utführt. Weer torüchhaalt wurr disse Mannschap mit de Ruumfähre Atlantis (STS-71), de an’n 29. Juni 1995 dor andocken dee. De Crew um Kommandant Robert Lee Gibson, Pilot Charles Joseph Precourt un de Missionsspezialisten Ellen Louise Shulman Baker, Bonnie Jeanne Dunbar un Gregory Jordan Harbaugh broch de nee Stammcrew Anatoli Jakowlewitsch Solowjow un Nikolai Michailowitsch Budarin nah de Ruumstatschoon henn, un nehm de dree vun de bitherig Stamm mit, so dat bi de Lannen vun Atlantis an’n 7. Juli 1995 up dat Kennedy Space Center eerstmals 8 Lüüd an Bord weern.

1996 is he bi de NASA utscheeden.

PrivatesÄnnern

Norman Thagard un sien Fru Rex Kirby hemm dree Söhns.

LiteraturÄnnern

  • Stefan Schickedanz: Männerspielsachen – Von Aggregaten, Armbanduhren und Actionsport, Acabus (Diplomica) Verlag, Hamburg 2008, ISBN 978-3-941404-46-5

WeblinksÄnnern

  Norman Thagard. Mehr Biller, Videos oder Audiodateien to’t Thema gifft dat bi Wikimedia Commons.