Ronald John Grabe (* 13. Juni 1945 in New York City, Bundsstaat New York, USA) is en ehmalger US-amerikaansch Astronaut.

Leven ännern

Nahdem Grabe 1962 de Stuyvesant High School in New York spoodriek afslooten harr, hett he an de United States Air Force Academy studeert. Dor kreeg he 1966 en Bachelor in Ingenieurswetenschapen. Dornah hett he in' Rahmen vun en Studentenuttuusch de Technisch Hoochschool in Darmstadt besöcht, wo he Luftfohrttechnik studeer un 1967 sien Afsluss maken dee.

Nah sien Trüggkehr in de USA is Grabe in de US Air Force intreden un maak denn sien Pilotenutbillen an de Randolph Air Force Base in Texas. Ansluutend wesseel he to de Cannon Air Force Base in Arizona, wo he dat Kampfloogtüüch North American F-100 flagen hett. Buterdem weer Grabe dor an de Erprobung vun de Wappensysteme vun de General Dynamics F-111 bedeeligt. Wiels sien Tiet an de Cannon Air Force Base wurr he 1969 för en lütt Sett nah Vietnam beordert, um in' Vietnamkrieg an tallriek Kampinsatzen mittowarken.

1974 fung Grabe en Utbillen to'n Testpiloten an, de he nah een Johr afslooten hett. Dornah hett he an de Wiederentwickeln vun de Vought A-7 un F-111 arbeit.. Af 1976 nehm he för dree Johr an en Uttuusch mit de Royal Air Force deel. Dorbi weer he ünner annern as Testpilot vun den Senkrechtstarter Harrier tätig. To'n Tietpunkt vun sien Ernennung to'n Astronauten weer he as Utbilder för Testpiloten an de Edwards Air Force Base in Kalifornien beschäftigt.

As Grabe 1994 ut de Air Force utscheeden dee, harr he den Rang vun en Oberst (Colonel) inne un över 5.500 Stünn an Floogerfohren sammelt.

Astronautentätigkeit ännern

Grabe keem in' August 1981 nah Houston, um sück dor in dat Johnson Space Center vun de NASA to'n Shuttle-Piloten utbillen to laaten. Van 1983 bit 1985 weer he tosätzlich as stellvertreten Manager för de Koordineeren vun de Arbeitsaflööp in dat Space-Shuttle-Programm tostännig. Nah dat Unglück vun de Ruumfähr Challenger in dat Johr 1986 hett he in de Ünnersökenskommision arbeit. Van 1989 bit 1991 hett he as leiten Astronaut an dat Design vun de Internatschonale Ruumstatschoon (ISS) arbeit. Later weer he in dat Astronautenbüro för dat Training vun de Ruumfohrers verantwortlich.

STS-51-J ännern

To sien eerst Mission is Grabe an' 3. Oktober 1985 as Pilot vun en geheimen Floog för dat US-Verteidigungsministerium. Dat weer de eerste Insatz vun de nee Ruumfähr Atlantis. De Mission düer 4 Daag in de twee militärisch Kommunikatschoonssatelliten utsett wurrn. Kommandant vun dit Ünnernehmen weer Karol Joseph Bobko. Dorto keemen noch de beid Missionsspezialisten David Carl Hilmers un Robert Lee Stewart as ok de Bruuklastspezialist William Arthur Pailes vun de US-Air Force.

STS-61-G ännern

Oorsprünglich sull Grabe in' August 1986 tosommen mit veer anner Astronauten de Ruumsonde Ulysses vun den Orbiter Atlantis ut in't All bringen. Nah den Verlust vun de Challenger wurr disse Mission aber afseggt, so dat Ulysses eerst veer Johr later start un Grabe en annern Floog todeelt wurr.

STS-30 ännern

Grabe sien tweet Mission fung an' 4. Mai 1989 mit de Start vun de Ruumfähr Atlantis an. Kört nah den Start hett de Besetten spoodriek de Venussonde Magellan utsett, womit to'n eersten Mal en Planetensonde vun en Space Shuttle ut start wurr. Wiels den wiederen Verloop vun de veer Daag lang dürnden Floog hebbt sück de fiev Astronauten (David Mathieson Walker (Kommandant) un de Missionsspezialisten Norman Earl Thagard, Mary Louise Cleave un Mark Charles Lee) mit mehreren wetenschaplichen Experimenten befaat, de in de Crewkabine mitführt wurrn weern.

STS-42 ännern

Af 22. Januar 1992 flog Grabe mit dat Space Shuttle Columbia eerstmals as Kommandant in den Weltruum. De Hööftupgaav vun de Mission weer de Bedriev vun de International Microgravity Laboratory-1. Dorför befunnen sück över 50 Experimente in dat europäisch Spacelab-Modul, de den Effekt vun de Swoorlosigkeit up Organismen un anner Materialien utforschen dee. Grabes Crew, to de mit Ulf Merbold ok en Ruumfohrer ut Düütschland hörrn dee, hett in' Schichtsystem arbeit, um so mögelk völ Daten to winnen. De anner Crew-Liddmaaten weern Steven Scot Oswald (Pilot), Norman Earl Thagard, William Francis Readdy un David Carl Hilmers. De Mission düer 8 Daag, 1 Stünn un 14 Minüüt.


STS-57 ännern

An' 21. Juni 1993 is Grabe mit de Ruumfähr Endeavour to sien letzten Floog in't All start. Dat Hööftteel vun disse Mission weer dat Bargen vun den European Retrievable Carrier Satellite (EURECA). Tosätzlich weer eerstmals dat Spacehab to dat Dörführen vun verscheeden Experimente mit an Bord. De Mission düer meest 10 Daag. Ronald Grabe weer bi disse Mission Kommandant un Brian Duffy de Pilot. Missionsspezialisten weern Janice Elaine Voss, George David Low, Nancy Jane Sherlock Currie un Jeff Wisoff.


Tosommenfaaten vun sien Missionen ännern

Nr Mission Funktschoon Floogdatum Floogdüer
1 STS-51-J Pilot 3. Oktober - 7. Oktober 1985 4d 1h 44min
2 STS-30 Pilot 4. Mai - 8. Mai 1989 4d 0h 56min
3 STS-42 Kommandant 22. Januar - 30. Januar 1992 8d 1h 14min
4 STS-57 Kommandant 21. Juni - 1. Juli 1993 9d 23h 44min

Nah de NASA ännern

An' 11. April 1994 hett Grabe de NASA un de US-Luftwaffe verlaaten un wessel to dat Ruumfohrtünnernehmen Orbital Sciences Corporation. Dor weer he eerst in verscheeden Positschonen beschäftigt, bevör he 1999 to'n stellvertreden Vörstandsvörsitter un Geschäftführer vun den Drägerraketenberiek vun de Firma upsteeg.

Privates ännern

Ronald Grabe is verheiraadt un hett dree Kinner. In sien Freetiet fohrt he geern Ski oder makt Windsurfen.

Weblenken ännern

  Ronald J. Grabe. Mehr Biller, Videos oder Audiodateien to’t Thema gifft dat bi Wikimedia Commons.