Omoa (Cortés)

Omoa is en Stadt mit üm un bi 7500 Inwahners in dat Municipio Omoa, Departamento Cortés, Honduras.

Küst in Omoa

GeografieBearbeiten

De Oort an de Bahía de Omoa (Deel von de Karibische See) liggt an de Münn von’n Río Omoa, de sien Born in de Sierra del Omoa in’n Süden von’n Oort hett. De relativ siede Küstenstriepen, in den de Stadt liggt, is so bi twee Kilometer breed. In’n Süden von’n Küstenstriepen stiggt de Sierra gau op.

De Naveröörd sünd Tulián un Puerto Cortés in’n Noordoosten, Chivana in’n Süüdoosten un Río Coto, Milla 3 un Milla 4 in’n Süüdwesten.

HistorieBearbeiten

De Stadt is 1752 von de Spaniers grünnt worrn. Dat schull en tosätzlichen Stüttpunkt an de karibische Küst ween un dorüm weer von Anfang an en Festung mit plaant. Toeerst is von 1752 bet 1756 de Festung El Real anleggt worrn, de de Stadt verdeffenderen schull. Tosätzlich is de gröttere Festung Fortaleza de San Fernando Omoa anleggt worrn, de eerst 1774 trech weer.

In’n Oktober 1779 hebbt de Briten in de Slacht von San Fernando de Omoa de Stadt innahmen, ehr aver al in’n November wedder verlaten. För de Stadt dee dat aver swore Schadens bedüden.

Nadem Honduras 1821 unafhängig worrn is (1821 bet 1839 as Deel von de Zentraalamerikaansche Kunfederatschoon; Omoa weer in’n Unafhängigkeitskrieg een von de letzten Festungen von de Spaniers, de denn aver von Juan Galindo innahmen worrn is), is de Festung bet in de Johren 1950 as Fängnis bruukt worrn.

Omoa weer bet in de Johren 1820 een von de wichtigsten Havens an de Atlantikküst von Honduras, hett denn aver veel Verkehr verloren, nadem Puerto Cortés düsse Rull övernahmen hett. Nadem Puerto Cortés in de Johren 1880 ok an dat Iesenbahnnett anslaten worrn is, harr Omoa as Haven keen Bedüden mehr. Dat weer blots noch en Fischeroort.

Weertschop un InfrastrukturBearbeiten

VerkehrBearbeiten

Dör Omoa löppt de CA-13. Düsse Straat föhrt in’n Noordoosten na Puerto Cortés un denn in’n Süden wieder na Choloma un San Pedro Sula. In’n Süüdwesten löppt se över Masca na Cuyamel un wieder na de Grenz to Guatemala. De CA-13 is dör de Laag an’n Rand von de Sierra del Omoa ok de eenzige Straat, de ut’n Oort rutföhrt. Dat gifft lüttjere Straten in de Sierra, ünner annern na Chivana, aver dat sünd allens Sackstraten.


Koordinaten:15° 47′ N, 88° 2′ W