Otto – Der Film

Otto – Der Film (op plattdüütsch so veel as „Otto – de Film“) is de Titel vun en düütsche Filmkummedie ut dat Johr 1985 vun un mit Otto Waalkes. Speelbaas weer – blangen Otto sülvst – Xaver Schwarzenberger, de ok de Kamera bedeent hett. Vun de düütschen Premiere an’n 19. Juli 1985 bit to’t Enn vun’t Johr harr de Film ruchweg 14,5 Millionen Tokiekers.

Filmdaten
Plattdüütsch Titel:	—
Originaltitel:	Otto – Der Film
Düütsch Titel:	Otto – Der Film
Produkschoonsland:	Düütschland
Johr vun’t Rutkamen:	1985
Läng:	85 Minuten
Originalspraak:	Düütsch
Öllersfreegaav in Düütschland:	FSK o.A.
Filmkru
Speelbaas:	Xaver Schwarzenberger Otto Waalkes
Dreihbook:	Bernd Eilert Robert Gernhardt Peter Knorr Otto Waalkes
Produkschoon:	Horst Wendlandt
Musik:	Herb Geller
Kamera:	Xaver Schwarzenberger
Snitt:	Jutta Hering
Szenenbild:	Hans Jürgen Kiebach Henry Nielebock
Kledaasch:	Barbara Naujock
Dorstellers
Otto Waalkes: Otto, goot & slecht Geweten, Stimmen Elisabeth Wiedemann: Konsulin von Kohlen und Reibach Sky du Mont: Ernesto/Harald Jessika Cardinahl: Silvia von Kohlen und Reibach Peter Kuiper: Shark Andreas Mannkopff: Haenlein Gottfried John: Sonnemann Karl Lieffen: Flopmann Tilly Lauenstein: Daam Karl Schönböck: Bodo Fürst Marckbiss Johannes Heesters: Clochard Eric Vaessen: Butler Jean Erich Bar: Rocker Werner

Inholt

De Film fangt an mit en Bild vun Trümmerdelen, de op’t Water drieven doot. Dör en Klobrill duukt Otto op un vertellt toeerst sien Levensgeschicht, üm denn op de Ümstännen to kamen, de em in disse Katastrophe bröcht hebbt:

Otto beslutt een Dag, ut dat ruhige Oostfreesland in de grote Stadt to tehn. In Hamborg will he sien Glück versöken. Nu hett he aver keen Geld un geiht foorts den Kredithai Shark op’n Liem. Vun den kriggt he Startkapital, mit dat he sien Firma „OSSI“ (Ottis Super-Service International) grünnen will. Mit en klapprig Auto leevt he in en lütte Kamer ünner’t Dack un will annere Lüüd mit Infäll hülpen. Wohrhaftig hett he bald sien eersten Klienten. För den Opdrag bruukt Otto aver toeerst mol Zement, den he sik op en Bosteed „opdoon“ will. Op de Bosteed sünd ok de Millionär Ernesto un den sien Bruut silvia, üm sik ümtokieken. Dorbi fallt Silvia rünner, warrt aver tofallig vun Otto opfungen, de mit en Zementsack rekent hett.

Üm nich as Zement-Deef optoflegen neiht Otto ut. Man, tohuus töövt al de nächste Schreck: De Geldhai Shark kummt Otto besöken, üm sik sien Geld torüchbetahlen to laten, de in’t Lüütdruckte utmaaskt weer. Natürlich hett Otto dat Geld nich. Shark gifft em en Frist un drauht em, dat he dat Geld beter bibringen schall. To’n Glück stellt sik rut, dat Silvia, de he dat Leven reddt hett, de Dochter vun de rieke Konsulin von Kohlen un Reibach is. De will em to’n Dank wat schenken, un so haapt Otto, dat he op disse Wies dat Geld tosamenkriggt. Man, dat Geschenk stellt sik as en sünnere Buddel wien rut.

In’n wieteren Verloop kummt Otto jümmer wedder mit Saken in Kuntakt, de nipp un nau 9876,50 DM weert sünd – de Bedrag, den de Shark schullen deit. Eenmol is dat de Lööftring vun Silvia, denn en Jagdtrophäe. Man jeedmol mellt sik sien Geweten un hollt em dorvun af. Mit de Tiet verkiekt sik Otto denn ok noch in de junge Deern, man he kriggt dat nich recht op de Reeg, ehr den Hoff to maken. Daalslahn sett he sik opletzt mit en Eddel-Clochard tosamen, mit den he de Buddel Wien leddigsupen deit, de he schenkt kregen harr – ahn sik in’n Kloren to wesen, dat de Wien ok 9876,50 DM weert weer.

Noch eenmol ritt Otto sik tosamen un beslutt mit Silvia en nee Leven antofangen, nadem he Shark utneiht is. Dör Tofall kummt he to en Bankroov vun de beiden Verbrekers Sonnemann un Haenlein, de sik nich reken künnt un blangento tallrieke Henwiesen op sik sülvst versnappen doot. Jemehr Büüt is jüst dat teihnfacke vun den Bedrag, den he schullig is. Verkleedt söcht he Silvia un ehr Mudder bi’n Putzbüdel op, woneem he wies warrt, dat de beiden mit Ernesto na den sien tweeten Wahnsitt na Rio de Janeiro flegen wüllt. Heemlich smuggelt Otto sik in’n Fleger un markt, dat ok de beidne Bankrovers ünner de Passageren sünd. He versöcht Interpol Bescheed to geven, man, de Fleger warrt vun de Verbrekers övernahmen, de ok de Kru bewusstloos slaht.

Kort later kann Otto de Verbrekers egenhännig utschalten un flüggt nu sülvst den Jumbo-Jet. In den helen Schandaal finnt Silvia un Otto to’nanner, wiel siek gliektietig rutstellt, dat Ernesto in Wohrheit gor keen Millionär, man en afbrennten Bedreger. As en Flegerdräger in Sicht kummt, versöcht Otto den Jumbo-Jet to lannen, vunwegen dat he dat Schipp för Rio hollen deit. Dat geiht natürlich nich goot, wat de Szeen to Anfang verkloren deit. Tosamen mit de annern Passageren reddt sik Otto op en eensom Eiland, woneem Siliva un he opletzt en Poor warrt.

Kritik

• Dat Lexikon vun’n internatschonalen Film beteken den Film as Füerwark vun tomeist amüsante, mitünner ok drieste Döntjes, de dör de eenfacke Kummediegeschicht tosamenholen warrt. vun’t Handwark her weer de Film solide.
• De Münchener Abendzeitung schreev vun en Arbeit mit hoge Gööd vun en satirisch Profi-Team.

Utteken

Otto – Der Film is mit dree Filmpriesen uttekent worrn:

• 1985: mit den Bambi in de Kategorie Best Film – Natschonal för Otto Waalkes
• 1985: mit de Golden Lienwand mit Steern
• 1986: mit den Jupiter in de Kategorie Best Film

Anners wat

In den Film warrt in lose Reeg Gags ut de Otto-Shows wies, de mit en groff ümschrevene Geschicht mit’nanner verbunnen warrt. Blangen Otto speelt vele bekannte düütsche Schauspelers un annere Persönlichkeiten in Gastrullen mit. En sünnere Rull harr de ehmolige Football-Doorhöder Wolfgang Kleff as Putzbüdel un Spegelbild vun Otto. He harr ok den Ökelnaam Otto, vunwegen dat he meist jüst so utsehn de.

As de Film in’t Feernsehn wiest worrn is, sünd mitünner Szenen an’t Enn rutsneden worrn. So weer ünner annern na en Grootopnahm vun Otto in’t Cockpit op dat Trümmerfeld ümblennt. Man de Deel, as de Jumbo-Jet opsetten deit un allns tonichten maakt, weer nich wiest. In en annere Szeen künnt sik de Lüüd ut den afstörten Fleger op en eensom Eiland redden. Kort dorna warrt op Otto un Silvia blennt, as se sik ’n Söten geevt. Rutsneden weer, dat ehr Mudder an Anspraak hollen deit un de Lüüd verkloort, dat se de eenzigen Ziviliseerten op dat Eiland weern, worophen en Koppel vun Inborene kamt, de mit de Saken vun de Afstörten verkleedt sünd un Polonaise danst.

Weblenken

• Otto – Der Film in de Internet Movie Database (engelsch)