Otto Eichhorn

Otto Georg Friedrich Eichhorn (* 14. April 1884 in Lennep; † 16. Januar 1966 in Tübingen) weer en düütschen Verwaltungsbeamten.

Eichhorn is 1884 as Söhn von Elisabeth, borene Hentzen (1862-1946), un den Amtsgerichtsraad Friedrich E. Eichhorn († 9. Juni 1901) in Lennep boren. He weer op dat Apostelgymnasium in Köln un hett dor 1903 sien Abitur maakt. He hett von 1903 bet 1906 Juristeree an de Universitäten Tübingen, Berlin un Bonn studeert. Sien eerste juristische Staatsprüfung hett he an’n 14. Juli 1906 maakt. Na dat Studium is he in’n prüüßschen Justizdeenst gahn un is an’n 14. Juli 1906 Gerichtsreferendar worrn. Na de grote Staatsprüfung an’n 4. November 1911 is he denn in’n Verwaltungsdeenst wesselt un weer 1911 Regerungsassesser un Hülpsarbeider bi dat Landraadsamt von’n Kreis Openraa. In’n November 1913 is he an dat Landraadsamt von’n Kreis Nauen wesselt. He is an’n 11. März 1918 Regerungsraad worrn, in’n Dezember 1918 bi de Regerung in Gumbinnen anfungen un an’n 1. Juli 1919 as Nafolger von Hermann Gerdes toeerst kommissarsch, in’n Mai 1920 denn richtig Landraad von’n Kreis Waldbröl. In disse Tied hett he 1924 sien Dr. jur. an de Universität Halle maakt. Nadem de Kreis Waldbröl to’n 1. Oktober 1932 oplööst worrn is, is he in’n ne’en Kreis Veern wesselt un dor bet to’n 15. Juni 1933 Landraad ween. In dat Johr hebbt em de Natschonalsozialisten in einstweiligen Rohstand schickt un Karl Weber hett em aflööst. Eichhorn weer denn bi de Regerung in Kassel. He is dor 1939 Oberregerungsraad worrn. In Kassel is he bet 30. April 1949 bleven, as he in Rohstand gahn is.

He hett an’n 29. Dezember 1933 in Warthausen Elisabeth Anna Alexandrine Freiin Koenig von und zu Warthausen (* 4. Januar 1901) freet.

In Waldbröl is vondaag de Otto-Eichhorn-Straat na em nöömt.