Otto Siffling

Otto „Holz“ Siffling (* 3. August 1912 in Mannheim-Waldhof; † 20. Oktober 1939) weer en düütsch Footballspieler. He speel för den SV Waldhof Mannheim un de Düütsch Footballnatschonalmannschap, mit de he 1934 de Bronzemedaille bi de Weltmeesterschap wunn.

Leven

Graffiti 100 Johr Otto Siffling in Mannheim

De Bronzemedaille vun de WM 1934

Sifflings Heimatvereen weer de SV Waldhof Mannheim. Dor hett he all as Schöler speelt un keem mit 18 Johren in de eerste Mannschap. Mit sien Vereen keem he 1934 bit in dat Halffinale to de Düütsch Meesterschap, wo se aber gegen den lateren Meester FC Schalke 04 utscheeden is. In den Pokalwettbewarf keemen se sogor tweemal bit in dat Halffinale.

Siffling weer en vun de eersten Speler vun de Vereen, de in de Natschonalmannschap beropen wurrn (tovör geev dat all eenig Handballspeler, de dat in ehr Beriek schafft harrn). Siffling hett tüschen 1934 un 1938 31 Lännerspelen för Düütschland maakt un dorbi 17 Doren schaaten. Sien gröttste Spood weer de darte Platz bi de Weltmeesterschap 1934 in Italien. De dormalige Trainer vun de Natschonalmannschap, Otto Nerz, hett hüm bi de Olympisch Spelen 1936 in dat eerst Speel noch schont, he wurr denn aber in't Veertelfinale insett, wo Düütschland aber gegen de Mannschap ut Norwegen ünnerleegen weer.

Mit sien teihn Doren, de he in de Lännerspelen vun dat Johr 1937 scheeten dee, hörr he to de Spelern, de den gröttsten Andeel an den Ruhm vun de Breslau-Elf harrn, de in Breslau gegen de Mannschap ut Däänmark mit 8:0 wunn. Siffling hett dorbi binnerhalv vun 32 Minüüt fiev Doren schaaten. He steiht dormit up Platz 3 vun de Speler, mit de meesten Doren in en Lännerspeel. En wesentlich taktische Variante weer dorbi de Positschoon un Upgaav vun Otto Siffling in de Stormmidden. He speel nich as vörschaven „Kielstörmer“ in de Angreepsmidden, sonnern hung en beten torüch, truck so den gegnerischen Stopper ut dat Ad´fwehrzentrum un kunn den Ball up de flink Flögels verdeelen. De upreeten Deckung vun de Dänen maak hüm dat denn ok noch mögelk, sülvst to'n Afsluus to kommen.

Otto Siffling is in dat Öller vun 27 Johren 1939 an en Ribbenfellentzündung storven. Sien letzt Lännerspeel hett he an' 24. April 1938 maakt. Siffling is bit hüüd de Speler vun den SV Waldhof Mannheim, de an' fakensten in de Natschonalmannschap speelt hett.

Sien Heimatstadt Mannheim hett 1977 en Straat in den Stadtdeel Waldhof nah hüm nömmt. To sein hunnertst Gebortsdag wurrn de Ost-Tribüne in dat Carl-Benz-Stadion nah Siffling nämmt un an sien Gebortshuus in de Hubenstraße en Gedenktafel enthüllt.

Literatur

• Doppelpass – SV Waldhof Mannheim Fans gegen Gewalt und Rassismus e.V. (Hrsg.): Otto Siffling – Eine Fußballegende wird 100. Katalog to de Utsstellung in Mannheim van’ 1. bit 13. Juni 2012 in de Olt Füerwaak Mannheim, Berlin 2012, ISBN 978-3-00-038249-9.
• Jürgen Bitter: Deutschlands Fußball-Nationalspieler: Das Lexikon. Sportverlag, Berlin 1997, ISBN 3-328-00749-0.
• Richard Kirn, Alex Natan: Fussball. Ullstein-TB-Verlag, Frankfurt am Main 1958.
• Karl-Heinz Schwarz-Pich: Otto Siffling, der SV Waldhof und die deutsche Fußball-Nationalmannschaft im Dritten Reich. Agon-Sportverlag, Kassel 1999, ISBN 3-89784-101-0.

Weblenken

• DNB-Katalog
• „Otto Siffling – Eine Fußball-Legende wird 100“ (otto-siffling.de)
• Artikel över Otto Siffling in dat SV Waldhof-Wiki