Peggy Schwarz (* 4. September 1971 in Berlin) is en ehmalge düütsch Ieskunstlöperin, de in’n Paarloop för de DDR un Düütschland antreeden is.

Peggy Schwarz, 2008

Se is bi hör alleenuptrecken Moder upwussen un fung 1975 mit dat Ieskunstloopen an. Mit 9 Johr keem se to dat Paarloopen. Hör eerst Partner weer Olaf Stenzel. Siet 1985 leep se mit Alexander König. Hör Vereens weern SC Dynamo Berlin bzw. SC Berlin un hör Trainerin Heidemarie Steiner-Walther.

Schwarz un König bi de DDR-Meesterschapen 1987

Mit König wurr se 1988 Paarloop-Meesterin in de DDR un wunn todem bi de Europameesterschap in Prag de Bronzemedaille achter de sowjeetsch Paaren Jekaterina Gordejewa un Sergei Grinkow as ok Larissa Selesnjowa un Oleg Makarow. Hör best Ergevnis bi Weltmeesterschapen weer de veerte Platz in dat Johr 1989. Bi de Olympisch Spelen 1988, 1992 un 1994 keemen se jewiels up den söbenten Platz. 1990 hemm Peggy Schwarz un Alexander König ehrn Trainer wesselt. Trainer weer fortan Knut Schubert. 1992 wurrn Schwarz un König ok düütsch Paarloopmeester. 1994 hett Peggy Schwarz en Babypause inleggt. Hör Söhn wurr an’n 1. April 1995 boren, Vader is Heiko Brestrich, en ehmalger Footballspeler.

Siet Mai 1996 hett se mit Mirko Müller traineert un hett mit hüm tosommen Wettkämpe bestreeden. Hör Trainer weer wedder Knut Schubert. Van 1998 bit 2000 wurrn se düütsch Meester. Bi Europameesterschapen keemen se 1999 un 2000 jewiels up den veerten Platz. Hör gröttste Spood weer de Gewinn van de Bronzemedaille bi de Weltmeesterschap 1998 in Minneapolis achter de Russen Jelena Bereschnaja un Anton Sicharulidse un de US-Amerikanern Jenni Meno un Todd Sand. Bi de Olympisch Spelen 1998 keemen se nochmal up den negenten Platz.

In dat Johr 2000 hett Peggy Schwarz hör aktiv Loopbahn afslooten. Se harr en chronische Hüftverschuuven (Dysplasie). Peggy Schwarz weer siet 2000 Trainerin in Grimma, Sassen. Siet 2015 is se Trainerin bi den Halleschen Eissportclub e.V. (HEC) in Halle (Saale), Sassen-Anholt.

Schwarz/König bi en Schauloopen 1988

Weblinks ännern