Peter Piot

Peter Piot (* 17. Februar 1949 in Löwen/Belgien) is Ünnergeneralsekretär vun de Vereenten Natschonen un gewarfföhrend Direkter vun de Organisatschoon UNAIDS.

Peter Piot 2006

Leven

Piot kreeg 1974 den medizinsche Doktertitel an de Universität Gent un was 1976 Mitopdecker vun’t Ebolavirus in Zaire. 1978/79 was he ledende Wetenschoppler för Infekschoonskrankheiten an de Universität vun Washington in Seattle/USA. 1980 is he gradueert as Dokter för Mikrobiologie an de Universität Antwerpen un was dor later bit 1992 Baas vun de Afdelen för Infekschonen un Immunität an’t Institut för Tropenmedizin.

In’t Johr 1980 füng he an mit verscheeden gemeenschoppliche Projekten tegen AIDS in Afrika: in Burundi, Elfenbeenküst, Kenia, Tansania as ok dat Projekt SIDA in Kinshasa/Zaire, wat dat eerste internatschonale HIV/AIDS-Projekt in Entwicklungslänner was.

1986/87 was he extraordinär Professer an de Universität vun Nairobi, un vun 1988 bit 1992 ok extraordinär Professer för apentliche Gesundheet an de Fre’e Universität vun Brüssel.

Vun 1991 bit 1994 was Piot Präsident vun de Internatschonale AIDS-Sellschop. 1992 wööd he stellvertredende Direkter vun’t Globale Programm tegen AIDS (engelsch Global Programme on AIDS) vun de Weltgesundheitsorganisatschoon (WHO).

An’n 12. Dezember 1994 wööd he to’n Ünnergeneralsekretär vun de UNO un to’n eersten gewarfföhrend Direkter vun’t Joint United Nations Programme on HIV/AIDS (UNAIDS) beropen.

1995 slöög König Albert II. vun Belgien Piot to’n Ridder, mit de Titel „Baron“. He is Liddmaat vun’t medizinische Institut vun de National Academy of Science vun de Vereenigte Staaten, vun de Royal Academy of Medicine in Belgien un vun de Royal College of Physicians in London.

Piot hett 15 Böker un mehr as 500 wetenschoppliche Artikels schreven. He kreeg düchtig Utteken för wetenschoppliche un soziale Entwickeln.

Weblenken

• unaids.org - Biographie (engelsch)