Piers John Sellers
Piers John Sellers (* 11. April 1955 in Crowborough, Grafschaft East Sussex, Grootbritannien; † 23. Dezember 2016 in Houston, Texas) weer en US-amerikaansch Astronaut vun britisch Herkunft. He weer nah Helen Sharman un Michael Foale de darte Brite in't All.
Leven
ännernSellers keem in' Süüden vun Grootbritannien up de Welt, is aber meest buterhalv vun de Heimat upwussen. Sien Vader John hett bi de Armee arbeit un dorüm truck de Familie fakener um. So hett he Europa, aber ok den Mittleren Osten kennen lehrt.
Noch bevör he Auto fohren kunn, hett he fleegen lehrt. In dat Öller vun 15 Johren fung he mit dat Segelfleegen an. De private Pilotenlizenz hett he twee Johr later bi de Royal Air Force maakt. Jets to fleegen hett hüm woll toseggt, he hett dat aber nich wohrnommen, wiel dat för hüm bedüüd harr, sück för völ Johren as Beropssuldat to verplichten. Piers weer völ Johren dwungen ween, Motorrad to fohren, wiel hüm sien Vader nich mit dat Familienauto fohren leet (den Führerschien hett he eerst mit 22 maakt).
Bit 1973 hett Sellers in de Grafschaft Kent dat Gymnasium Cranbrook Primary (de Cranbrook School, so hör amtlich Naam, wurr 1518 grünnd; inst wurr Elisabeth I. dor ünnerricht) besöcht. Dornah hett he an de schottisch University of Edinburgh studeert. Dat Studium hett he 1976 mit en Bachelor in dat Fack Ökologie afslooten. Sien Doktertitel in Biometeorologie hett he 1981 an de University of Leeds (Faculty of Biological Sciences) kreegen.
Sellers is en anerkannt Wetenschapler, en utwiest Experte in Fragen vun den Klimawannel un de globalen Erwärmung. He fung all temelk fröh in sien Wetenschapsloopbahn an, sück för de Vörgänge in de Atmosphäär to interesseeren, un wu man de Aflööp dorin middels Computermodellen bereken kann. De NASA hett dat ok mitkreegen, un he kreeg, kört nahdem he sien Dokter maakt harr, en Inlaaden in de USA, um up dit Rebeet an dat Goddard Space Flight Center (GSFC) in Maryland to arbeiten.
Sellers, de to de Tiet as Softwareberader in London arbeiten dee, hett dat Angebot annommen un siedel 1982 tosommen mit sien Fru in de USA över. Mit dree Kuffer un beten wat Geld keemen se in Greenbelt an un twee Daag later hett Sellers sien Deenst antreeden. Vun dor af forsch he an dat Laboratory for Terrestrial Physics vun dat GSFC. Hüm interesseer vör allen, wu sück Atmosphäär un Biosphäär gegensiedig beinflooten. De nächst 13 Johren forsch he up dat Rebeet vun dat Klima un de globalen Erwärmung, um mit Computermodellen, Satellitendaten un Erkunnenflüüg de Tosommenhänge to verstahn. He hett aber nich blots vun't Büro ut arbeit. He hett ok immer weer Expeditschonen ünnernommen un hett mit Kollegen up de ganze Welt tosommenarbeit. So hett he to'n Bispeel in Brasilien den Infloot, de dat Afholten vun den tropischen Regenwald up dat Weer hett, ünnersöcht. Sien Arbeit führ hüm aber ok in de Sahara un nah Kanada.
Astronautentätigkeit
ännern
All as lütt Kind weer Sellers vun de Ruumfohrt andahn. Aber Astronaut weer för hüm tonächst kien Beropswunsch, sonnern Utopie, wiel Grootbritannien kien bemannt Ruumfohrtprogramm ünnerhollen deiht. Mit sien Ümtrecken in de USA änner sück dat. Bald fung he an, sück bi de NASA as Astronaut to bewarfen. Jedes Johr hett he in Houston sien Ünnerlagen vörleggt. Sien gröttst Hinnernis weer sien britische Staatsangehörigkeit, un so leet he sück 1991 sluutend inbörgern.
Piers Sellers keem mit de 16. Astronautengrupp to de NASA. Sellers tell to de insgesamt 2.432 Lüüd, de den formalen Utwahlkriterien entspreeken deen. Dorut gungen123 Finalisten hervör, de tüschen Oktober 1995 un Februar 1996 dat JSC in Houston besöcht, um Bewerbensgespräche to führen un medizinisch ünnersöcht to wurrn. Midden August 1996 fung Sellers tosommen mit de 43 anner Kandidaten de tweejohrig Grundutbillen an.
Piers Sellers wurr nah sien Basistraining to'n Missionsspezialisten dor insett, wo he sien johrenlang Erfohrung inbringen kunn – in de Computerafdeelen. 1999 keem he to de noch jung ISS-Afdeelen. De nächsten tweeeenhalf Johr hett he tosommen mit de russisch Siet an dat Computerprogramm för de ISS arbeit.
Sellers wurr in' August 2001 dat eerste Mal für en Shuttle-Flug upstellt. STS-112 wur in' Oktober 2002 mit de Ruumfähre Atlantis dörführt un broch en 390 Millionen Dollar düer un 14 Tünnen swoor Gitterkonstruktschoon to de Internatschonale Ruumstatschoon (ISS). De so nömmt S1-Utlegger wurr vun Sellers un sien Kolleeg David Wolf bi dree Butenbordinsatzen (EVAs) an de Ruumstatschoon anbrocht. Kommandant vun de Mission weer Jeff Ashby un Pilot weer Pamela Melroy. Dorto keemen de anner Missionsspezialisten Fjodor Jurtschichin ut Russland un Sandra Magnus.
Blots twee Maand nah sien Jungfernfloog wurr Sellers weer för en Mission inplaant: Tosommen mit James Halsell as Kommandant, Alan Poindexter as Pilot, as ok Stephanie Wilson, Wendy Lawrence un Michael Foreman as Missionsspezialisten, sull he de Crew vun STS-120 bilden. De Versörgensfloog to de ISS weer för Februar 2004 vörsehn un sull mit dat Verbinnensmodul Harmony de Ruumstatschoon wieder utbauen. Wegen dat Columbia-Unglück een Johr tovör, muss de Floogplaan vun dat Shuttle-Programm ümstellt wurrn un STS-120 wurr um mehrere Johren verschaven.
In' Juli 2004 nehm de NASA en lütt Ännern bi de Crew vun STS-121 vör. Carlos Noriega wurr ut medizinisch Grünnen vun den Floog wegnommen un dör Sellers ersett. De Mission ünner dat Kommando vun Steven Lindsey un Pilot Mark Kelly wurr nah mehrmalig Verschuuven in' Juli 2006 dörführt. Sellers weer de eenzig Missionsspezialist, de all Mal in't All flagen weer. Lisa Nowak un Stephanie Wilson weer eerstmals in't All as ok Mike Fossum. Hööftupgaav weer nahtowiesen, dat de nah STS-107 un STS-114 vörnommen Ännern an dat Shuttle ok funtschoneeren deen, un to'n annern, de ISS mit Göder to versörgen as ok deren 2-Mann-Crew dör en Astronauten to verstärken. Ut dissen Grund weer de Düütsche Thomas Reiter mit an Bord. Dormit weern siet de ISS-Expeditschoon 6 weer dree Ruumfohrer up de Statschoon. Wiels den twee Wekk düern Floog hemm Sellers un sien Kolleeg Fossum dree EVAs maakt. Dorbi wurrn Reparaturen an de Ruumstatschoon dörführt, en System ut twee Roboterarms up deren strukturelle Integrität test un en neeaardig Spachtelmasse utprobeert, of de in' Weltruum wat dörgen dee.
To sien dart Ruumfloog is Sellers an' 14. Mai 2010 mit de STS-132 start. Dat weer de vörletzte Floog vun de Ruumfähre Atlantis. Kommandant weer ditmal Kenneth Ham un Pilot Tony Antonelli. Dorto kemmen de Missionsspezialisten Michael Good, de Karen Nyberg ersett harr, Stephen Bowen un Garrett Reisman. Sellers weer mit nu dree Ruumflüüg de Erfohrenste vun de Mannschap.
Hööftupgaav weer dat in Russland baut Erweiterungsmodul „Rasswet“ to de Statschoon to bringen. Dorto wurr en nee Ku-Band-Antenne anbrocht un noch söss Batterien mitbrocht, de de old Batterien an dat P6-Element ersetten deen. Ofschons dree EVAs dörführt wurrn, weer Sellers doran aber nich bedeeligt. De Mission gung an' 26. Mai 2010 to Enn'.
2011 is Sellers denn ut den aktiven Deenst utscheeden un wurr stellvertreden Direkter vun dat Sciences and Exploration Directorate un amteeren Direkter vun de Earth Sciences Division at NASA/GSFC.
Privates
ännernSellers un sien britisch Fru kennen sück siet de Studententiet un hemm twee Kinner.In' Januar 2016 hett he mittdeelt dat he an Krebs krank wurrn is[1]
Weblenken
ännern
- NASA: Biografie (engelsch)
- spacefacts.de: Körtbiografie