Piratenpartei Düütschland

De Piratenpartei Deutschland (PIRATEN) is en düütsche politsche Partei, de an’n 10. September 2006 in Berlin grünnt worrn is. Se versteiht sik in Anlehnen an de sweedische Piratpartiet as en Partei vun de Informatschoonssellschop.

Logo vun de Partei

Vörstand vun de Piratenpartei in’t Johr 2009

Parteinaam

De Naamsdeel „Piraten“ is en Anspelen op de Publicitykampagne vun de Musik- un Filmindustrieverbännen, dat Verstöten gegen dat Oorheverrecht as Roovkopien (in’t Engelsche piracy) to nömen. Dat heet aver nich, dat de Partei dat Verbreden vun nich rechtmatige Kopien ünnerstüten deit, man dat se sik dorför insett, de Recht op private Kopie bitobehollen un to verbetern. Se richt sik wieter ok dorgegen, dat de Brukers vun Tuuschbörsen tohoop kriminaliseert warrt. De Partei hett sik as offiziellen Kortnamen „PIRATEN“ utsöcht. De Afkörten PPD warrt ok mitünner bruukt, is aver nich offiziell.

Parteiprogramm

De Piratenpartei lett sik as so nöömte „Een-Tehmen-Partei“ inorden. Dat Grundsatzprogramm seggt, dat ut de Sicht vun de Partei Düütschland in’n Rahmen vun de Digitale Revolutschoon in all Rebeden vun’t Leven jümmer mehr de Gefohr för de Wöörd un de Freeheit vun’n Minschen dör en ümspannen Vernetten vun de Alldags-Saken, vun en duersome vun Rekner ünnerstütt Informatschoonsverarbeiten un en Entwickeln hen to en Bruken vun Informatschoon in’t Nett besteiht. Dat geiht in en Snelligkeit för sik, dat de Meenungsbilln in de Sellschop un ok de Gesettgeven vun’n Staat jüst so wenig Schritt hollen kann, as jede enkelte Minsch sülvst. Togliek weern die Mööglichkeiten jümmer weniger, dissen Vörgang mit demokraatsche Regeln op de Even vun en enkelten Staat mit to bestimmen.

In Döringen arbeit de Piratenpartei op Landseven mit de Grönen tosamen bi dat Thema Freeheit un Börgerrechten. As ok all annern Piratenparteien sütt sik de Piratenpartei Düütschland as Deel vun en internatschonale Bewegen un will dorüm nich en sünnere Grupp vun Lüüd ansnacken. In Massenmedien warrt beschreven, dat de Piratenpartei vör allen de Anliggen vun de „Generatschoon C64“ un de Digital Natives vertreden deit

In’n Detail ümfaat dat Grundsatzprogramm vun de PIRATEN:

Börgerrechten

De Piratenpartei sett sik in för den Bestand und dat Starkermaken vun d Börgerrechten in’n Allgemenen, vun wegen dat de to dull inschränkt worrn sünd ut Sicht vun de Partei.

En wichtigen Eckpunkt to’ Schulen vun de Demokratie is dat Sekern vun’t Feernmellgeheemnis. Dat is ünner annern dör’t Inföhren vun’t Datenspiekern op Vörraat in Gefahr bröcht worrn. Jede Minsch hett en Privatsphäär, de free blieven müss vun Överwachen. Dat dröff keen Bewegungsprofilen, staatlich Övergriepen, keen Lauschangriff un ok keen Rasterfahnden geven. De Kontroll över de Geheemdeensten müss verbetert warrn.

Dat Filter vun’t Internett dör staatliche Steden warrt vun de Partei aflehnt, vun wegen dat dördor op lange Sicht en Zensur in’t Nett un dormit en Verlust vun’n Rechtsstaat tostannen keem. Inföhrt warrn schall en betere Datensekerheit un Sekern vun de Privatsphäär. Lüüd, de bedrapen sünd, schüllt över’t Verarbeiten vun Daten, de op jemehr Person betogen sünd, dör staatliche oder privatweertschoppliche Steden grundsätzlich sülvst dat Seggen hebben.

Biometrische Päss, de Elektronische Gesundheitskoort (eGK) un RFID schüllt nee överdacht warrn, vun wegen dat se de Privatsphäär un de Datenschuul in Gefohr bringt. Un ok de Utbo vun Videoöverwachen an apentliche Plätz schall ophören, vun wegen dat dat blots en schienbore Sekerheit vermiddeln deit, man egentlich blots en Rutsmieten vun Stüergeller is.

Transparenz vun’n Staat

De Korrupschoon schall indämmt warrn dör en starkere Transparenz op all politische un bedriefliche Evenen. Jede Börger mutt in’n Rahmen vun de Informatschoonsfreeheit dat Recht h ebben, sik bi de Verwalten doröver klook to maken, wat se doot. Utnahmen dorvun schall dat dorgeven, woneem de Datenschuulrechten vun annere Börger bedrapen sünd. Bito will die Piratenpartei de Amtsdrägers beter kontrolleerborer maken. Verboden warrn schüllt Wahlmaschienen, vun wegen dat opstunns de Vörholten, dat se manipuleert warrn künnt, nich utrüümt warrn künnen. Butendem de dör jemehr Insetten de Wahl ok an Transparenz verleren.

Ännern vun Schuulrechten

Reform vun’t Oorheverrecht

De Partei hett dat Teel, dat Oorheverrecht an hüütige ännerte Rahmenbedingen antopassen un dorbi de Proportschoon twüschen Oorhever un Bruker nee wichten. Dat schall dorto denen, de fre’en Uttuusch vun Weten un kreative Warken to ünnerstütten. Dör de technischen Mööglichkeiten vundaag is dat fre’e Koperen vun digitale Warken en Faktum. Dorüm schülln „de Mööglichkeiten vun’t allgemene Verfögen över Warken kennt un nütt warrn“. Dat weer keen Inschränken vun de Intressen vun de Oorhevers, dat geev veelmehr al lang „en Veeltall an innovative Infäll för Gewarfskunzepten“, de de fre’e Nüttborkeit to’n Vördeel vun de Oorhevers bruken un jem unafhangiger vun de hüütigen Marktstrukturen maken künnen. De Partei steiht dorbi in Kuntakt mit Künstler un söcht dissen Kuntakt ok aktiv.

De Piratenpartei Düütschland foddert „en Recht op Privatkopien un en Enn vun’t Kriminaliseeren vun Filesharing“. Dat Oorheverrecht is dör den eensietigen Druck vun de Musikindustrie to’n Vördeel vun de Verweertsellschoppen scharper maakt worrn, wat dorto föhrt hett, dat grote Delen vun de Börger kriminaliseert weern. Na’t hüütige Recht ennt de Oorheverschuul för Warken söventig Johren na’n Dood vun’n Künstler. Mit den egentlichen Sinn vun’t Oorheverrecht harr dat nix mehr to doon, man dat föhr blots to en küsntlich Verknappen vun’t Wetensanbott. De Industrie, de de Rechten verweerten deit, profiteert dorvun op Kosten vun de Börger.

De Piratenpartei foddert dorüm, de Regelschuulfristen vun schuulte Warken körter to maken. Invn Gegentog schall de Kultur beter föddert warrn. Ok de Hinnern vun de Kopeerborkeit, de gegen den Bruker richt sünd, un de na Meenung vun de PIRATEN dör Digitale Rechteverwalten entstaht, schüllt en Enn hebben. En Wahlsprook vun de Piratenpartei is „Fre’en Togang to Weten för all Lüüd“. Dat gell sünners för Scholen un Universitäten. As de Partei seggt, künn Weten ahn de velen Inschränken vun’t Oorheverrecht veel beter vermiddelt warrn. Dormit will de Partei dorför sorgen, dat Weten nich to’n Luxusgoot warrt.

Reform vun’t Patentrecht

De Patenteerborkeit schall weniger warrn, sünners op de Rebeden Software, Gentechnik un Gewarfsideen. Dat haar in enkelte Fäll al to unnormale Patenten föhrt un leet grundätzlich Twievel opkamen, dat de Patenten noch en positiven Effekt harrn.

De Partei foddert dorüm en Reform vun’t Patentsystem, vun wegen dat dat ne’e Utfinnen nich blots hinnern de, man ok för’n Opbo vun Monopolen sorgen de, de faken (negative) Wirken op den Markt mit sien Priesen un de Anstellten har, sünners för lüttere Ünnernehmen. Bito weern Patenten vundaag mehr un mehr blots noch to’n Beschränken vun’n Togang för annere op een Markt bruukt un nich mehr för’t direkte Verweerten oder to’n Wedderinhollen vun Investitschonen.

De egentliche Sinn vun’t Patentrecht is dordör in’t Gegendeel ümkehrt worrn. Dordör warrt weniger geistigen oder kreativen Besitt schuult, man vör allen de Machtpositschonen vun grote Firmen afsekert.

Fre’e Bildung

Fre’en Togang to Bildungsinrichten

De Piratenpartei is gegen Studiengeböhren un för den fre’en Togang to all Bildungsinrichten. Se foddert wieter en Demokratiseeren vun’t Bildungssystem un de individuelle Ünnerstütten vun Enkelte. De fre’e Togang to Informatschoon un Bildung sütt se as en Recht, dat jede Minsch hett. An’n wichtigsten bi de institutschonellen Bildung is dorna dat Ünnerstütten vun den Enkelten „bi’t Entwickeln to en münnigen, kritischen un sozialen Person“. Fre’en Togang to Informatschoon un Bildung weer aver ok en bedüdende weertschoppliche Ressource, vun wegen dat „blots dör’t Bibehollen, Wietergeven un Mehren vun’t Weten de sellschoppliche Wohlstand un dat Wiederkamen op Duer sekert warrn künnt“.

Fre’en Togang to Fackliteratur

Togang ahn Geböhren (Open Access) to de Resultaten vun Forschen un Entwickeln, de dör Stüergeller finanzeert worrn sünd, mööt sülvstverständlich warrn. Jede Börger schall dordör Togang hebben to dat Weten un de Informatschonen, to he de dör sien Stüergeller sülvst mit bidragen hett.

Utbo vun de Internett-Infrastruktur

De Infrastruktur vun’t Nett müss wieter utboet warrn, so dat beteren Togang ok in Rebeden mööglich warrt, de aflegen sünd. Dordör schüllt all Lüüd wat vun’t Wiederkamen hebben.

Organisatschoonsstruktur

De aktuelle Vörsitter Bernd Schlömer

Vörstand

Op de Grünnenversammeln is de eerste Vörstand wählt worrn. De Vörstand warrt siether jeed Johr op’n Bundsparteidag vun de Liddmaten, de dor sünd, wählt. In’t Johr 2009 is op’n veerten Bundsparteidag de Opbo vun den Vörstand dör en Ännern vun de Satzung nee maakt worrn.

Vorstännen vun de Piratenpartei Düütschland

Johr	Vörsitter	Viez-Vörsitter	Schattmeester	Politisch Gewarfsföhrer		Generalsekretär		Wahl
2006/07	Christof Leng	Jens Seipenbusch	Peter Böhm	Jan Huwald		Stefan Lamprecht		10. September 2006
2007/08	Jens Seipenbusch	Sven Riedel	Peter Böhm	Jan Huwald		Bastian Grundmann		20. Mai 2007
2008/09	Dirk Hillbrecht	Jens Seipenbusch	Sebastian Schäfer	Bernhard Schillo		Hauke Kruppa		18. Mai 2008
				veer Bisitters
2009/10	Jens Seipenbusch	Andreas Popp	Bernd Schlömer	Stefan Koenig (utpeddt an’n 10. Mai 2010), Nicole Hornung, Thorsten Wirth un Jan Simons				4. Juli 2009
2010/11	Jens Seipenbusch	Andreas Popp	Bernd Schlömer	Benjamin Stöcker (trüchpeddt an’n 5. August 2010), Christopher Lauer, Daniel Flachshaar un Wolfgang Dudda				15./16. Mai 2010
				Politisch Gewarfsföhrer	Generalsekretär		Bisitters
2011/12	Sebastian Nerz	Bernd Schlömer	Rene Brosig	Marina Weisband	Wilm Schumacher		Matthias Schrade, Gefion Thürmer	14.–15. Mai 2011
2012/13	Bernd Schlömer	Sebastian Nerz, Markus Barenhoff	Swanhild Goetze	Johannes Ponader	Sven Schomacker		Klaus Peukert, Matthias Schrade, Julia Schramm	28.–29. April 2012
2012/13	Bernd Schlömer	Sebastian Nerz, Markus Barenhoff	Swanhild Goetze	Katharina Nocun	Sven Schomacker		Klaus Peukert, Andi Popp, Christoph Chan Hin	10.–12. Mai 2013

Ünnerverbännen

Siet Mitt 2009 hett de Partei Landsverbännen in all 16 Bundsläner, de sik in de Struktur deelwies düütlich ünnerscheedt. Bezirksverbännen gifft dat in Bayern in jeden Regeerensbezirk, in Noordrhien-Westfalen gifft dat dorvun twee un in Baden-Württembarg opstunns een. De Landsverbännen vun Noordrhien-Westfalen un Berlin hebbt dat so nöömte Kru-System inföhrt. Dat heet, dat sik an Steed vun Bezirks-, Kreis- un Oortsverbännen „Krus“ mit fief bit negen Milldmaten grünnen künnt. Kreisverbännen gifft dat in Baden-Württemberg, Bayern, Hessen, Neddersassen, Brannenborg, Döringen un Rhienland-Palz.

Jöögdorganisatschoon

Logo vun de Jungen Piraten (JuPis)

De Jungen Piraten (kort: JuPis) billt den Jöögdverband vun de Piratenpartei. De Vereen is an’n 18. April 2009 in Wiesbaden grünnt worrn.. Siet de uterordigen Vörstandssitzung vun’n 4. November 2009 is Heiko Herberg de ne’e kommissaarsche Vörsitter. Liddmaat kann man wesen bit to’t 27. Levensjohr, en Ünnergrenz gifft dat nich. Dat Maskottchen in’t Logo vun de Jungen Piraten hett den Naam Flummi.

Hoochschoolgruppen

De eersten Hoochschoolgruppen hebbt sik kort na de Europawahl 2009 an de Universitäten Ulm, Karlsruhe, Mainz, Koblenz, Tübingen, Hamborg un Mönster grünnt.

Historie

Grünnenveranstalten in de c-base

Na den eersten Spood vun de swedischen Piratenpartei un de Grünnen vun de Piratenparei Öösterriek hebbt sik in’t Internett Intresseerte tosamenfunnen un en Satzung un en Parteiprogramm utarbeit. De offizielle Grünnenversammeln weer an’n 10. September 2006 mit 53 Lüüd in de Berliner c-base. An’n 18. April 2009 hebbt sik de JuPis in Wiesbaden grünnt.

Wahlen

An’n 27. Januar 2008 hett de düütsche Piratenpartei to’n eersten mol an en Wahl deelnahmen, neemlich bi de Landdagswahl in Hessen, un kreeg dorbi knapp 7.000 Stimmen (0,3 %). Bi de Landdagswahl in Hessen 2009 kreeg se in’n Vergliek to’t Vörjohr meist dubbelt so vele Stimmen. Dat Resultat leeg 0,5 %. Bi de Kommunalwahlen in Noordrhien-Westfalen 2009 hett de Partei je een Sitt in de Stadtrööt vun Aken un Mönster kregen. Bi de Bundsdagswahl 2009 kandideer de Partei in all Bundslänner mit Utnahm vun Sassen – dor wull man sik na Utkunft vun’n Landsverband op de Landdagswahlen kunzentreeren – un hett 2,0 % vun de Stimmen kregen. Sünners stark weern de Resultaten vun de Piratenpartei in Universitätsstäder, sünners in’n Oosten vun Düütschland. To’n Bispeel harr de Partei in Ilmenau 6,1 % un in Jena 4,8 % vun de Tweetstimmen.

Siether is de Piratenpartei in de Gunst vun de Wählers anstegen. Mit Stand vun’n September 2011 is de Partei mit mehr as 100 Sitten in de kommunalen Parlamenten in verschedene Bundslänner vertreden. Mit de Wahl to’t Berliner Afordentenhuus an’n 18. September 2011 hett de Piratenpartei mit 8,9 % to’n eersten mol ok den Sprung in en Landsparlament henkregen. Bi de Bundsdagswahl 2013 hett se 2,2 % kregen.

Johr	BW	BY	BE	BB	HB	HH	HE	MV	ND	NW	RP	SL	SN	SA	SH	DÖ
2008		n. a.				0,2	0,3		n. a.
2009				n. a.			0,5					n. a.	1,9		1,8	n. a.
2010										1,6
2011	2,1		8,9		1,9	2,1		1,9			1,6			1,4
2012										7,8		7,4			8,2
2013		2,0					1,9		2,1
2014				1,5									1,1			1,0
2015					1,5	1,6

Legenn

Intog in’n Landdag

höchst Resultat in den enkelten Bundslänner, ahn Intog

n. a.: nich antreden

Liddmaten

Entwickeln vun de Tall vun de Liddmaten

Siet Juni 2009, as de Partei na de Europawahl jümmer bekannter warrt un ok as Folg vun de Diskusschoon üm de plaante Gesett to’n Versworen vun’n Togang to Websteden mit kinnerpornograafsche Inholten, stiggt de Tall vun de Liddmaten in de Piratenpartei bannig an. Mit mehr as 7200 Liddmaten is se na egen Angaven siet September 2009 de sövtgröttste Partei in Düütschland. Dat Mindstöller för Liddmaten liggt bi sössteihn Johren. Siet Mitt Oktober hett de Partei mehr as 11.000 Liddmaten.

Schandaal üm en intern Dokument vun’t bayerische Justizministerium

In’n Januar 2008 hett de Partei en Dokument publik maakt, dat ut dat bayerische Justizministerium stammen schüll. Dorin weern Priesen för Spionaasch-Software bekannt geven, de en privaten Deenstleister to’n Insatz anboden hett, un wies dorop hen, dat dat Övernehmen vun de Kosten nich klor weer. Dat geev Twivel, wat dat Dokument echt weer, man in’n September 2008 geev dat en Huusdörsöken bi’n Pressespreker vun de Piratenpartei, de mit dat Besehren vun Deenstgeheemnissen un mit Hinnern vun Ermittlungsbehörden begrünnt weer.

Weblenken

Piratenpartei Deutschland. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Websteed vun de Partei
• 7 Fragen an de PIRATEN to de Europawahl 2009 – Bundszentraal för politische Bildung