Poltergeist II: The Other Side
Poltergeist II: The Other Side (op platt so veel as „Poltergeist II: De annere Siet“; dt. Titel: Poltergeist II – Die andere Seite) is de Titel vun en US-amerikaanschen Speelfilm ut dat Johr 1986 vun den Speelbaas Brian Gibson. De Film föhrt de Geschicht ut den eersten Deel Poltergeist wieter, de 1982 ünner de Regie vun Tobe Hooper entstahn is. De Film keem an’n 23. Mai 1986 in de US-amerikaanschen Kinos un harr an’n 18. September 1986 in Düütschland Premiere.
| Filmdaten | |
|---|---|
| Plattdüütsch Titel: | — |
| Originaltitel: | Poltergeist II: The Other Side |
| Düütsch Titel: | Poltergeist II – Die andere Seite |
| Produkschoonsland: | USA |
| Johr vun’t Rutkamen: | 1986 |
| Läng: | 92 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Brian Gibson |
| Dreihbook: | Michael Grais Mark Victor |
| Produkschoon: | Michael Grais Mark Victor |
| Musik: | Jerry Goldsmith |
| Kamera: | Andrew Laszlo |
| Snitt: | Thom Noble |
| Dorstellers | |
| |
Inholt
ännernDe Film fangt an, as de Indianer Taylor vun Tangina an de Utgraavsteed ünner dat fröhere Freeling-Huus föhrt warrt, dat tonichten maakt weer. De beiden gaht in en düstere Höhle, woneem se verweeste Skeletten finnt. Tangina markt, dat en böse düstere Macht togegen is un se vermoodt, dat hier ünner dat Huus gresige Saken passeert wesen mööt. Taylor will weten, woneem de Freelings vundaag leevt un maakt sik op’n Weg.
De Familie is na jemehr Flucht bi Diane ehr Mudder Jessica ünnerkamen, eenerworrns op’t Land. De sünneren övernatürlichen Gaven vun Carol Anne sünd nich wedder togang kamen, man de Grootmudder markt, dat de Deern ganz wat sünners is un se de glieken Anlagen hett, övernatürliche Saken to sehn. Den nächsten Dag dröpt Carol Anne bi’t Inköpen en unheimlichen ollen Mann mit Hoot, den se dags dorvör moolt hett. Se sütt, dat de Mann dor annere Lüüd dörgahn kann. Carol Anne ehr Mudder will aver nix dorvun weten, dat ehr Dochter de Gaav hett, övernatürliche Saken to sehn.
Een Nacht höört Carol Anne, dat ehr Speelttüchtelefon klingelt. Se snackt mit ehr Grootmudder, de in disse Nacht doodblifft. Snaacksche Saken passeert nu wedder. Diane hett en gresigen Droom vun Zombies, de ehr angriept, un över jemehr Huus tütt sik en düstere Wulk tohopen. Bi de Kinner in de Kamer speelt dat Speeltüüch verrückt. Wedder röpt de dode Grootmudder an un dat hele Huus fangt an to schüddeln un to pultern. De Familie will jüst ut dat Huus utneihn, as de Indianer Taylor vör de Döör steiht. He vertellt jem, dat he jem helpen kann. Toeerst snack he sien Segen över dat Huus.
An’n näächsten Dag dukkt de unheimliche olle Mann wedder op un will in’t Huus rin, üm mit jem to snacken. He stellt sik as Reverend Henry Kane vör un will jem Wohrschau geven vör Taylor. Diane kriggt op eenmol Visionen vun dissen snaakschen Kerl in en Höhle. De versöcht in de Twüschentiet Steven to övertügen, em in’t Huus to laten, bevör dat to laat is. Steven weddersteiht em aver un Kane geiht weg. Taylor vertellt Steven nu, dat de snaaksche Mann verantwoortlich is för de Saken, de mit jem passeert. Dat Böse kummt an’n Avend nu in’t Huus un grippt toeerst Robbie an. Kane geiht dorna nu as Poltergeist üm un bericht, dat he nich dood is un se em ok nich verdrieven künnt. Taylor verkloort jem, dat dat de böse Seel vun en Dämon is, de nich wohrhebben will, dat se dood is un nu in disse Welt kummt, um mit Help vun Carol Anne in’t Licht rövergahn to künnen.
An’n nächsten Avend övernimmt de böse Geist Steven, üm em insichtig to maken un Carol Anne so to sik to hollen un in de annere Siet to roven. De Plaan geiht aver scheef vun wegen dat de Leef vun Diane Steven redden deit. De Dämon wiest nu sien wohr Gesicht in Form vun en gresig Monster. De Freeling seht sik wedder dwungen, jemehr Huus un Besitt achter sik torüch to laten.
Se teht nu los, üm dat Böse för all Tieten torüchtoslahn, ümdat se wedder in Roh leven künnt. Tosamen föhrt se na de Ruin vun jemehr oolt Huus un stiegt tosamen mit Tanigna in de Höhle rünner. Se finnt eenige Dutzen Skeletten vör vun Minschen, de hier ünnen doodblieven müssen. Kane weer en Fanatiker, de vör vele Johren en Koppel vun Lüüd in de Höhle bröcht harr, üm jem vörtomaken, dat he jem vör Unheel bewohren künn. Man he hett jem nicht mehr gahn laten. Den Utgang hett he dicht maakt un de Minschen müssen gresig to Dood sticken.
Nu wüllt de Selen, de keen Roh finnen künnt, sik Carol Anne holen, ümdat se jem in’t Licht föhren deit, woneem se Freden finnt. Kane will dat aver nich tolaten un ritt Carol Anne un Diane an sik. Blots de Leev vun jemehr Familie kann jem nu noch redden. Mit siene magischen Kräft, helpt Taylor jem, den Dämon to verdrieven. De kann noch mol wedder Carol Anne an sik bringen un tütt ehr mit op de annere Siet. Man, op eenmol duukt de Geist vun de doden Grootmudder wedder op un bringt de Deern torüch na ehr Familie.
An’t Enn wiest Steven Taylor sien Dankborkeit un schenkt em sien ollt Auto.
Achtergrund
ännern- Poltergeist II is mit en Filmbudget vun ruchweg 19 Millionen US-Dollar produzeert worrn. Dreihöörd weern ünner annern Canyon de Chelly, Chinle (Arizona) un Red Rock Canyon State Park Cantil (Kalifornien). Alleen in de USA hett de Film an’t Startwekenenn (vun’n 23. bit 26. Mai 1986) ruchweg 12,3 Millionen US-Dollar inspeelt, wat de Innahmen vunvn eersten Deel wiet överdrapen hett. Man opletzt künn he ünner’n Streek nich an de Samtinnahmen vun den eersten Deel rankamen. Wiel de eerste Deel 22 Weken in de Kinos lopen is, weer disse tweete Deel al na söss Weken wedder ut dat Programm nahmen.
- Na eenige katastrophale Opföhren to Proov, hett dat Studio Metro-Goldwyn-Mayer Order geven den Film vun Grund op to överarbeiten. Ahn Tostimmen vun Speelbaas Brian Gibson weer de Speeltiet vun 130 Minuuten op 92 Minuuten tosamenkört. Bedrapen weern dorvun meist blots Dialogszenen, dorünner sogor en wichtige to Anfang, de vun de Johren twüschen de Filmen hannelt un verkloort, worüm Tangina so dorachter ran is, de wohren Achtergrünnen üm Kane optodecken. Ok warrt verkloort, dat de öllere Dochter Dana wegen ehr College nich bi de Familie is. De Dorstellersche Dominique Dunne, de in’n eersten Deel Dana speelt harr, weer kort na den eersten Deel ümbröcht worrn.
- Dat Design vun den Dämon is vun den Swiezer Surrealist H.R. Giger entwickelt worrn, de sik ok al för den Science-Fiction-Film Alien ut dat Johr 1979 dat butenirdische Monster utdacht harr.
Utteken
ännernDe tweete Deel weer för söss Filmpriesen nomineert, dorünner för den Oscar in de Kategorie Best Trickeffekt. Wunnen hett de Film 1987 blots een vun de Priesen, neemlich den BMI Film Music Award för Jerry Goldsmith.