Poppeermöhl Ooldklooster
De Poppeermöhl Ooldklooster weer en Watermöhl an de Eest in Ooldklooster, de as Poppeermöhl bruukt worrn is. Dat Rebeed von de fröhere Möhl liggt vondaag in de Gemeen Buxthu in’n Landkreis Stood, Neddersassen.
Historie ännern
En Möhl an de Eest in Ooldklooster kummt al in de Stiftoorkunn von dat Ole Klooster 1196 oder 1197 vör.[1]
De Poppeermöhl is 1622 anleggt worrn.[1] An’n 12. Oktober 1622 harr Jacob Hovern dat Privileg kregen, in dat Arzstift Bremen Lumpen to sammeln, de för de Produkschoon von Poppeer en roren Rohstoff weren.[1]
1816 hett Johann Hinrich Winter de Möhl köfft.[1] Sien Söhn Johann Asmus Winter hett 1838 dat Leid kregen.[1]
1854 hett de Fabrik en Dampmaschien un Turbin kregen un dat ole Waterrad is nich mehr bruukt worrn.[1] Later hebbt de Söhns von Johann Asmus, Johann Heinrich un Otto Christian, de Fabrik övernahmen un ehr 1865 in en Aktiensellschop ümwannelt.[1]
Üm 1900 rüm hebbt in de Fabrik mehr as 300 Lüüd arbeidt.[1]
1917 is de Fabrik bi en Füür meist kumplett dalbrennt.[1] De Besitters hebbt versöcht, de Fabrik wedder nee optoboon.[1] Aver 1925 is de Poppeerfabrik Winter in Kunkurs gahn.[1] In de Tied twüschen 1925 un 1954 hebbt dor de Firmen Wagenbo Thomas un Karosserie- un Fohrtüügbo Brüning seten.[2]
In de Tied von 1954 bet 1968 hett de Mosteree Klindworth op dat Gelänn denn Fruchtsäft produzeert.[1]
In dat Johr 1968 is dat Klindtworth-Wark in Buxthu von dat Ünnernehmen Granini övernahmen worrn.[1] Dat Wark hett dichtmaakt, nadem dat Ünnernehmen 1994 mit Eckes fusioneert is, üm de annern Standöörd von dat Ünnernehmen beter uttolasten.
1999 hett de Hanseaatsche Grundbesitt- un Vermögenssellschop ut Stood sik dat Grundstück sekert un wull dor en Kaufland-Worenhuus boon.[2] Dor is aver amenn nix von worrn, von wegen, dat de Stadt Buxthu en Plaza-Markt an en annere Steed in de Stadt nich genehmigen wull un de beiden Ünnernehmens gliek behanneln müss.[2]
De Gebüüd stünnen denn bet 2011 leddig. In dat Johr sünd de Gebüüd afreten worrn un dor is en Lidl-Markt boot worrn.[2] Tosätzlich sünd 2014 in en eersten Boafsnidd söven Stadtvillen mit 77 Wahnungen un 2015 in en tweten Boafsnidd söss Stadtvillen mit 48 Wahnungen boot worrn.[3] To dat ne’e Wahnquarteer höört ok en Deepgaraasch mit 160 Stellplätz.[3]
Footnoten ännern
- ↑ a b c d e f g h i j k l m Christiane Tauer: Altklosters Herz schlug am Mühlenteich, Hamburger Abendblatt an’n 11. März 2011
- ↑ a b c d Christiane Tauer: Neues Leben auf Granini-Gelände, Hamburger Abendblatt an’n 8. März 2011
- ↑ a b Björn Carstens: Neues Wohnquartier an der Este: exklusiv und hochmodern, Wochenblatt an’n 26. November 2014