Prairie Pothole Region
De Prairie Pothole Region is en groot Rebeet in'n Norden vun de Great Plains mit allerhand Water un natte Gemarken. Düsse so nömmten Potholes sünd tostanne kamen dör de leste Gletschertied, de vör bi 10.000 Johre toenne gahn is. Dat Iesschild hett dat Land formt un dor Schuuvmergel in Grundmoränen unregelmatig bi aflagert. So is en Keed vun Doodiesmeere tostanne kamen. Vun mehr as de Hälft vun düsse Doodiesmeere is midderwielen dat Water aflaten wurrn. So sünd se in dröög Land for de Bueree umwannelt wurrn.[1][2] In de wecken Regionen sünd al mehr as 90 % vun de Doodiesmeere dröögleggt wurrn.[3] De Meere, de dat hüdigendags noch gifft, sünd bannig wichtig for Deerter, as Aantenvagels un annere, de Water bruken doot. For mehr as 50 % vun all Aarden vun Treckvagels in Noordamerika, de an't Water leven doot, speelt düsse Doodiesmeere en afsunnerlich grote Rull. Hüdigendags gifft dat private un staatliche Initschativen, de schuult de Meere. Jägers hefft de Grupp Ducks unlimited (Aanten sunner Grenzen) grünnt. De hett en Oog up mehr as 50.000 km². To'n Deel is dat Land köfft wurrn.[4] De United States Fish and Wildlife Service kriggt Geld ut den Verkoop vun Duck Stamps un köfft dor Waterfowl Production Areas in de USA vun. Duck Stamps sünd Gebührenmarken, de een kopen mutt, wenn en Watervagels jagen will.[5] Mit de Winnst sünd mehr as 36.000 lüttje un luerlüttje Schuulrebeeden köfft wurrn.[6]
Belege
ännern- ↑ [1], togrepen an'n 16. Januar 2009, engelsch
- ↑ The Prairie Pothole Region [2] Mountain Prairie, togrepen an'n 16. Januar 2009, englisch
- ↑ = Basin Fact Sheets togrepen an'n 16. Januar 2009, englisch}}
- ↑ Ducks unlimited: About Ducks Unlimited (afropen an'n 25. August 2010)
- ↑ U.S. Fish and Wildlife Service: Waterfowl Production Areas (afropen an'n 25. August 2010)
- ↑ U.S. Fish and Wildlife Service: Welcome to the National Wildlife Refuge System (afropen an'n 25. August 2010)
Literatur
ännern- Ned H. Euliss jr., David M. Mushet, Dale A. Wrubleski: Wetlands of the Prairie Pothole Region. Invertebrate Species Composition, Ecology, and Management. In: D. P. Batzer, R. B. Rader, S. A. Wissinger (Rutg.): Invertebrates in Freshwater Wetlands of North America. Ecology and Management. Wiley, New York 1999, ISBN 0-471-29258-3, S. 471–514.