Primal Scream (engelsch för Oorschree) is en schottische Musikgrupp ut de Richt Rock. Jemehr Musik un Naam sünd vun de so nöömten Oorschree-Therapie (Primal Scream Therapy) inspireert.

Primal Scream (2006)

Historie un Loopbahn ännern

De Grupp besteiht ut Bobby Gillespie (fröher bi The Jesus and Mary Chain), Andrew Innes, Robert Young, Gary Mounfield (fröher bi Stone Roses) un Kevin Shields (fröher bi My Bloody Valentine). De Tosamensetten vun de Grupp hett sik in’n Verloop vun de Tiet teemlich faken ännert, wat ok op den Musikstil dörslahn is. De eenzige, de vun Anfang an dorto höört hett, is Bobby Gillespie. Jemehr Warken hebbt Primal Scream bit 2000 op’t Label Creation Records rutbröcht. Vundaag sünd se bi Ignition Records ünner Verdrag.

Anfungen hebbt Primal Scream as Psychedelic-Rock-Grupp. Jemehr Musik weer vun en formlos Gitarrspeel begelidt un schüll dordör instinkthaft un oorsprünglich wirken. Kort later hebbt se Rockelementen mit Dance Music kombineert. Weltwiet bekannt worrn sünd se in’n Rahmen vun de Madchesterbewegen mit jemehr Album Screamadelica ut dat Johr 1991. Dat Album is 2011 vun de Musiktietschrift New Musical Express op den eersten Platz vun de 50 Druggiest Albums Ever wählt worrn. Mit sien Sound hett to de Tiet sünners de DJ un Produzent Andrew Weatherall groten Influss op de Grupp hatt.

In’t Johr 1994 güng Primal Scream in en Phaas, in de se mehr klass’schen Rock in’n Stil vun de Rolling Stones speelen. Later wesseln se to kumplexere elektroonsche un mitünner ok aggressive Musik. Dat Album Vanishing Point vun 1997 weer en Schritt torüch to de psychedelischen Wörteln vun de Grupp. Dorgegen sünd op de Albums XTRMNTR (2000) un Evil Heat (2002) düütliche Elementen vun Electroclash verarbeit worrn. Jemehr bit hüüt hööchste Positschoon in de britischen Single-Charts harrn Primal Scream 2006 mit jemehr Stück Country Girl, dat bit op Platz 5 kamen is.

Albums ännern

  • Sonic Flower Groove (1987)
  • Primal Scream (1989)
  • Screamadelica (1991)
  • Give Out But Don’t Give Up (1994, featuring George Clinton)
  • Vanishing Point (1997)
  • Echo Dek (1997)
  • XTRMNTR (2000)
  • Evil Heat (2002)
  • Dirty Hits (2003) („Greatest Hits“ Compilation)
  • Riot City Blues (2006)
  • Beautiful Future (2008, featuring Josh Homme, Lovefoxx, Linda Thompson, Barrie Cadogan)
  • More Light (2013)

Weblenken ännern