Río Tapalapa

Río Tapalapa
Laag	Santa Bárbara, Honduras
Stroomsystem	Río Chamelecón
Läng	47 km
Born	in de Montaña del Joconal
Münn	in’n Río Chamelecón
Koordinaten Münn:	15° 16′ N, 88° 30′ W
linke Blangenströöm	Quebrada Azacualpa, Quebrada del Naranjo
rechte Blangenströöm	Quebrada La Chorrera, Quebrada del Zapotal

De Río Tapalapa is en üm un bi 47 Kilometer langen Stroom in dat Departamento Santa Bárbara, Honduras, de von rechts in’n Río Chamelecón münnt.

De Born as Quebrada Peña Blanca liggt in de Montaña del Joconal (1.538 m över de See, an de Waterscheed to de Quebrada del Joconal in’n Noordwesten un de Quebrada de Totoca, de in’n Süüdoosten na’n Río Jicatuyo flütt). Dat liggt dicht bi dat Eck, an dat sik de Municipios San Luis, Protección un Naranjito draapt. Von dor flütt de Río Tapalapa na Noordoosten dör dat Municipio San Luis un an de Öörd Tejutales un San Luis langs. En Stück in’n Süden von San Luis flütt de Quebrada Peña Blanca mit de Quebrada La Chorrera tohoop. In de Gegend von San Luis warrt de Stroom denn ok Río Pescado nöömt. Von links nimmt he de Quebrada Azacualpa un de Quebrada del Naranjo op un von rechts de Quebrada del Zapotal. Bi’n Oort Quebrada Oscura dreiht de Stroom denn op en Noordwest-Kurs un warrt hier Río Tapalapa nöömt. He löppt dor dör en eng Daal dör de Bargen un kummt op dat Rebeed von dat Municipio San Marcos. Söven Kilometer vör de Münn kummt he ut de Bargen rut un flütt in dat Quimistán-Daal (Valle de Quimistán). He löppt an dat Dörp Chumbagua langs un münnt in’n Río Chamelecón, de later sülvs in de Karibische See flütt. De Münn is een Kilometer stroomaf von de Münn von’n Río Blanco. Pp dat Över güntsiet münnt de Río Chiquila.