Rabil (Boa Vista)

Rabil is en Stadt op dat Eiland Boa Vista in de Republiek Kap Verde.

Blick vun’n internatschonalen Flaaghaven ut op’n Stadtrand vun Rabil

Dat ne’e Flaaghaven-Huus bi Rabil lett as’n lütt Fasten

Geografie un Stadtbild

Na de Hööftstadt Sal Rei, de üm un bi 3 km wiet weg an’n Noorden to liggt, is Rabil de tweetgröttste Oort op dat Eiland. De Inwahnertall liggt bi ruchweg 1.000 Lüüd. Veel to sehn gifft dat in Rabil nich, afsehn villicht vun de Kark un en Pötteree.

Dat Rebeet üm den Oort is bannig even un wöstenordig mit veel Steen un wenig Grasland (Hammada), so dat dat Ümfeld meist as op’n Mars utsütt. Na Süüden un Oosten hen kiekt af an to mol en Bargtipp in’n Himmel, na’n Westen to kann een de Küstenlien sehn. In de nöördlichen Ümgegend gifft dat ok mol en poor Rebeden, woneem Gras wassen deit, un en poor wenige landweertschoppliche Flachen, de vör allen för’n Anbo vun Koorn bruukt warrt oder as Weiden för Rindveeh. Tomaten, Bananen un annere Aaft- un Grööntüüchsorten sünd kuum to finnen, vun wegen dat dat blots wenig Water gifft to’n Watern vun de Feller.

Verkehr un Weertschop

Vun Rabil föhrt en asphalteerte Straat na Oosten in dat Rebeet vun Norte, woneem toeerst dat Dörp João Galego kummt. En poor olle Straten un vör allen tomeist Sandpisten föhrt in verscheden annere Delen vun’t Eiland, to’n Bispeel na de Sandwööst Deserto de Viana oder na’n Süüden vun Boa Vista. Blangen Rabil liggt ok de Flaaghaven Rabil (IATA-Kood: BVC), de fröher nipp un nau in’n Oort leeg.

In’t Johr 2007 is de Flaaghaven op internatschonalen Standard utboot worrn, dat ne’e Flaaghaven-Huus steiht nu dichter na Sal Rei un is över’n Snellstraat mit de Hööftstadt verbunnen, de to glieken Tiet boot worrn is. Dör dissen Neebo schall op dat Eiland de Tourismus vöranbröcht warrn, wat de gröttste Utsicht för de Weertschop op Boa Vista bargt.

De Inwahners vun Rabil sünd to’n Deel Buerslüüd, de vun’n Anbo vun Bananen un Ananasplanten leevt, de annern arbeidt tomeist in Ladens, in’n Haven oder in annere Rebeden. Elektrischen Stroom un Telefonverbinnen gifft dat in Rabil eerst siet Enn vun’t 20. Johrhunnert.