Rendition

Rendition (op Platt so veel as „noch mol afspelen“; dt. Titel: Machtlos) is de Titel vun en US-amerikaanschen-süüdafrikaanschen Thriller ut dat Johr 2007, de mit ’n Reeg bekannte Stars besett worrn is. Speelbaas weer Gavin Hood.

Filmdaten
Plattdüütsch Titel:	—
Originaltitel:	Rendition
Düütsch Titel:	Machtlos
Produkschoonsland:	USA/Süüdafrika
Johr vun’t Rutkamen:	2007
Läng:	117 Minuten
Originalspraak:	Engelsch
Öllersfreegaav in Düütschland:	FSK 16
Filmkru
Speelbaas:	Gavin Hood
Dreihbook:	Kelley Sane
Produkschoon:	Steve Golin, David Kanter Keith Redmon Michael Sugar Marcus Viscidi
Musik:	Paul Hepker Mark Kilian
Kamera:	Dion Beebe
Snitt:	Megan Gill
Dorstellers
Reese Witherspoon: Isabella Fields El-Ibrahimi Jake Gyllenhaal: Douglas Freeman Yigal Naor: Abasi Fawal Omar Metwally: Anwar El-Ibrahimi Zineb Oukach: Fatima Moa Khouas: Khalid Meryl Streep: Corrine Withman Peter Sarsgaard: Alan Smith Alan Arkin: US-Senator Hawkins J.K. Simmons: Lee Mayer Bob Gunton: Lars Whitman Rosie Malek-Yonan: Nuru El-Ibrahimi

Inholt

De Film fangt in Kapstadt an, woneem Anwar El-Ibrahimi vun Gewarfs wegen to doon harr un nu wedder na Huus flegen deit. El-Ibrahimi is in Ägypten boren, leevt aver siet siene Jöögd un Kindheit al in de USA un wahnt dor nu ok sien junge Fro un sien Söhn. To de glieken Tiet warrt in en noordafrikaansch Land en Bombenanslag veröövt, de gegen den öörtlichen Geheemdeenst Abasi Fawal richt is. Bi den Anslag gifft dat vele Dode, dorünner ok en US-amerikaanschen Agenten vun de CIA. Foorts sett de CIA allns in Bewegen, üm ruttofinnen, wokeen achtern den Anslag steken deit. Dorbi warrt faststellt, dat de Ägypter El-Ibrahimi vun en Telefon anropen worrn is, dat mit den bekannten Terroristen Rashid Silime in Verbinnen bröcht warrt. Korterhand warrt El-Ibrahimi an’n Flaaghaven affungen, verhöört un in dat noordafrikaansche Land utflagen, woneem de Anslag weer. Dor warrt he in en Gefängnis steken un ünner Folter wieter verhöört.

Nu warrt wiest, woans El-Ibrahimi ünner minschenverachten Ümstännen foltert un fangenhollen warrt. Abasi Fawal is meist beseten vun de Vörstellen, dat El-Ibrahimi wat mit den Terroristen Rashid to kriegen harr un versöcht mit all Middel ruttokriegen, wovun Rull he bi den Anslag speelt hett. Beobacht warrt de Folterverhören vun den jungen CIA-Agent Douglas Freeman, de an de Methoden twieveln deit un ok an de Schuld vun El-Ibrahimi, de ganz ogenschienlich nix afweet vun den Anslag.

Gliektietig versöcht in de USA de hoochswangere Fro vun El-Ibrahimi ruttofinnen, woneem ehr Mann beleven is un wennt sik an en ollen Fründ, de för den Senator Hawkins arbeit. Över em finnt se rut, dat de CIA achter dat Verswinnen vun ehrn Mann stickt un he ogenschienlich verdächtig is, in en Terrorfall verwickelt to wesen. Se versöcht allns, wat ehr mööglich is, üm dorför to sorgen, dat ehr Mann wedder freelaten warrt, rennt dorbi aver gegen faste Muern an, de to överwinnen se keen Macht hett

In de Twüschentiet warrt de Folter för El-Ibrahimi jümmer duller un he kann dat nich länger uthollen. Blots, dat de Pien ’n Enn hett, gifft Ibrahimi to, dat he vun Rashid anropen worrn weer un em wat över Sprengstoff verklort hett. He vertellt ok ’n Reeg vun Naams, de mit den Anslag to doon hebben schüllt, ofschoonst he an sik gor nix dormit to doon hett. As nu klor warrt, dat de Naams, de El-Ibrahimi optellt, hett allns Speler vun en fröhere Footballmannschop vun Ägypten weern, beslutt de junge CIA-Mann Freeman, em freetolaten ahn sien Basen dorvun wat to vertellen. He bringt El-Ibarhimi ut dat Gefängnis rut bit na en Schipp, mit dat he eerstmol ut dat Land rutkummt un gifft em sien Pass un de Green Card torüch.

Parallel dorto warrt de Geschicht vun Abasi Fawal sien Dochter Fatima vertellt, de na jemehr Traditschoon verheiraadt warrn schall. Man, se hett sik in Khalid verkeken, den se vun de Uni kennt. As se een Dag Striet mit ehrn Vadder hett, neiht se ut un krüppt bi Khalid ünner. Em lehrt se as en emotschonalen Minschen kennen, de schöne Biller maalt, sik aver ok politisch stark maakt. As bi en Razzia dör de Polizei in de Universität en drangen Fründ vun Khalid fastnahmen warrt, is klor, dat ok de in dat Foltergefängnis bröcht warrt un jemehr geheeme Grupp opflegen warrt. Nu stellt sik rut, dat Khalid sik as Sülvstmoord-Attendäder verplicht hett un nu en Anslag op den Fawal maken schall. Fatima kriggt dor nix vun mit, waakt aver fröh morgens op un stellt fast, dat Khalid nich dor is. In sien Wahnung finnt se nu aver klore Henwiesen dorop, dat Khalid en Anslag plaant, bi den ehr egen Vadder ümbröcht warrn schall. Se neiht em achteran un kummt jüst noch rechttietig vör den Anslag an. Wohrhaftig bringt se em dorto, Twievel to kriegen bi dat wat he vörhett, man de Terrorgrupp hett mit en Scharpschütten vörsorgt. As klor warrt, dat Khalid den Anslag nich maakt, warrt schaten. Fawal warrt dorbi verfehlt un kann in Sekerheit bröcht warrn. Man ok Khalid warrt vun de Terroristen doodschaten. Wobi he den Utlöser för de Bomb fallen lett, de denn doch noch tünnert un so ok Fatima mit in’n Dood ritt.

To’n Enn hen finnt Abasi Fawal rut, dat sien Dochter bi Khalid ünnerkamen is un söcht na ehr. In dat Huus finnt he aver blots en olle Fro vör, de üm ehrn Söhn truert. Eerst nu warrt klor, dat de beiden Geschichten in de Tiet versett speelt hebbt. Khalid hett also de Sülvstmoord-Anslag maakt hatt un nu eerst weet Fawal ok, dat sien Dochter dorbi mit üm’t Leven kamen is.

De Film geiht dormit to Enn, as Anwar El-Ibrahimi wedder in Chicago bi sien Familie ankummt.

Kritiken

Roger Ebert hett in de Chicago Sun-Times vun’n 19. Oktober 2007 schreven, dat de Film, de de Theorie un de Praxis vun’t Foltern un de persöönlichen Verantwoorden behannelt, kostbar un roor weer. He snack vun en „intelligenten“, „wichtigen“, „souveränen“ un „wirkungsomen“ Thriller.

Todd McCarthy hett in de Tietschrifft Variety vun’n 10. September 2007 schreven, dat sülvst de inspireerte Reese Witherspoon, de eenfache Figuren un unsinnige Dreihböker Swung geven künn, nich veel mehr maken künn, as na verscheden Wiesen to söken, bedrapen uttosehn. Mehr „Saft“ weer in de Dorstellen vun de arabischen Figuren to finnen, sünners in de Dorstellen vun Omar Metwally

Op Reel Film Reviews hett David Nusair schreven, dat de Dreihbookschriever för wirksomen Utgliek twüschen de verscheden Figuren un de enkelten Geschichten sorgt. De Film weer nich dat Drama, dat to’n Nadenken provozeert, as dat eendüdig de Afsicht vun’n Speelbaas weer. Liekers geev dat pacende Momenten.

Utteken

De Film is 2007 mit den Mill Valley Film Festival Award för Gavin Hood uttekent worrn in de Kategorie Beste vertellen Film. In dat Johr dorop weern Jake Gyllenhall un Reese Witherspoon beide för den Teen Choice Award vörslahn, hebbt aver nich wunnen.

Produkschoon

De Film is in Anaheim, in Los Angeles, in Washington D.C., in Kapstadt (Süüdafrika) un in Marrakesch (Marokko) dreiht worrn. De Weltooropföhren weer an’n 7. September 2007 op dat Toronto International Film Festival 2007, de brede Publikatschoon güng dorna an’n 19. Oktober 2007 in de USA, Grootbritannien un in Kanada los. in Düütschland keem de Film an’n 22. November 2007 rut. In de US-amerikaanschen Kinos hett de Film bit to’n 15. November 2007 üm un bi 9,7 Millionen US-Dollar inspeelt.

Wohre Achtergrund

De Filmkonzern Warner Bros. sülvst hett dat nafolgen Statement to den Inholt vun’n Film afgeven:

Gavin Hood (Speelbaas vun den mit’n Oscar uttekenten Film „Tsotsi“) grippt mit sien packen Thriller in de Grauzoon twüschen links un rechts, Recht un Unrecht, ahn eenfacke Antwoorten praat to hebben. He smitt en provokant Slaglicht op de kumplizeerten Utwirken vun de as „extraordinary rendition“ (utermaten Utlevern, Överstellen in de Redchtslosigkeit) bekannte US-Politik: In’n Rahmen vun dit Verfohren warrt Nich-Amerikaners, de as Gefohr för de natschonale Sekerheit ansehn warrt, roovt un in geheeme Gefängnisse buten de USA verhöört.

De Film grippt also de Praxis vun de extraordinary rendition op, de opstunns begäng is. Dat heet, dat Överstellen vun Lüüd ünner Terrorverdacht in Drüttstaaten, to’n Deel in de Hapen, dat se dor ünner Folter wichtige Informatschonen priesgeevt. Dat Verfohren warrt vun de US-Utlandsdeensten maakt, un is ünner annern dör de Fangenen in’n Naloop vun de Afghanistan- un Irak-Invasionen vun de USA, tomindst för den US-egenen Gefängnisoort Guantanamo Bay in Kuba in de westlichen Medien bekannt worrn. Vun Sieten vun de USA warrt jümmer wedder ünnerstreken, dat sik dat dorbi nich üm en Rebeet vun de US-Verfaten hannelt, so dat de Grundrechten vun de US-Verfaten nich griepen doot, un ok nich üm Kriegsfangene, so dat – tomindst ut dat Sülvstverständnis vun de USA rut – keen Notwännigkeit besteiht, de Genfer Konventschoon antowennen. De Presse hett dit meist kuntaktlose Fangensetten vun de Bedrapenen fakener mit dat spraakliche Bild vun’t „Swarte Lock“ betekent.

In’n Tosamenhang mit disse utermatige Överstellen geev dat ok al op hööchste Even vun de EU Diskusschonen, sünners wegen de dormit verbunnen Luftbewegen un de transporteerten Lüüd. Starke Henwiesen gifft dat op solke US-Lagers in Polen un Rumänien. Jüst so gifft dat Henwiesen op Överstellen vun disse Oort oder gliekweertige intensive Mitwirken vun de USA bi’t Fangensetten vun Minschen in Gefängnissen vun Drüttlänner, as to’n Bispeel in denn noch anduern Fall vun den düütsch-syrischen Staatsmann Mohammed Haydar Zammar. An’n Enn staht de US-Behöörden all Mööglichkeiten apen, jeden Utlänner to’n gegnerischen Kämper aftostempeln, üm dormit en grötteren Speelruum to’n Winnen vun Informatschonen to hebben.

Weblenken

• Rendition in de Internet Movie Database (engelsch)
• Kritiken to’n Film op Rotten Tomatoes
• Tosamenstellen vun Filmkritiken op film-zeit.de (hoochdüütsch)
• Machtlos, offizielle Filmsiet bi Warner Bros.