Resident Evil (Film)
Resident Evil (op plattdüütsch so veel as „Daallaten Övel“) is en Horror-Actionfilm ut dat Johr 2002 mit Milla Jovovich in de Hööftrull. Speelbaas un Dreihbookschriever weer Paul W. S. Anderson. De Film hett sien Grundlaag in de Videospeelreeg Resident Evil. Vun de Filmreeg gifft dat opstunns veer wietere Delen: Resident Evil: Apocalypse (2004), Resident Evil: Extinction (2007), Resident Evil: Afterlife (2010) un Resident Evil: Retribution (2012).
| Filmdaten | |
|---|---|
| Plattdüütsch Titel: | — |
| Originaltitel: | Resident Evil |
| Düütsch Titel: | Resident Evil |
| Produkschoonsland: | Düütschland, Grootbritannien, Frankriek |
| Johr vun’t Rutkamen: | 2002 |
| Läng: | 100 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Paul W. S. Anderson |
| Dreihbook: | Paul W. S. Anderson |
| Produkschoon: | Bernd Eichinger Paul W. S. Anderson Jeremy Bolt Samuel Hadida |
| Musik: | Marco Beltrami Marilyn Manson |
| Kamera: | David Johnson |
| Snitt: | Alexander Berner |
| Szenenbild: | Richard Bridgland |
| Kledaasch: | Richard Bridgland |
| Dorstellers | |
| |
Inholt
ännernAnfang vun’t 21. Johrhunnert is de Umbrella Corporation dat gröttste Industrieünnernehmen vun de USA. De mächtige Kunzern hett groten politischen un finanziellen Infloot in de Sellschop un gellt in de Apentlichkeit as de wichtigste Produzent vun Reeknertechnologie, Biotechnologie un Heelmiddels. Wat de Apentlichkeit nich weet is, dat dat Ünnernehmen sien gröttsten Gewinn aver op de Rebeden Rüstungstechnologie, bioloogsche Wapen un Genmanipulatschoon maken deit: In en geheem Forschungslabor ünner de Eer (Hive) arbeit ruchweg 500 Lüüd. Dor entwickelt se dat so nöömte T-Virus, dat dode Zellen wedderbeleven kann. En Unbekannten roovt Proven vun’t Virus un vun’t Gegenmiddel. Man, üm de Sporen to verwischen, sett he dat Virus in’n Hive free. De Red Queen, de Reekner, de den helen Hive stüert, warrt dorvun wies, versegelt den helen Kumplex un maakt de Mitarbeiters mit Halon-Gas doot. So schall hinnert warrn, dat Menschen, de mit dat Virus infizeert sünd, ut dat Labor rutkaamt.
Alice, en junge Fro, waakt in en Villa ut en Bewusstlosigkeit op un weet nix mehr, wat se vörher doon hett. Denn duukt en Mann, Matt Addison, op un glieks dorop en Grupp vun Lüüd mit Wapen. All tohopen gaht se dör en verstekenen Ingang un föhrt mit en ünnerirdischen Tog na’n Hive. In’n Tog finnt se Spence, de ok bewusstlos is. Jem warrt vertellt, dat se Sekerheitsbeamte sünd, de to’n Schien en Ehpoor speelt. Jemehr Bewusstlosigkeit geiht op en Nervengas torüch, dat de Red Queen freesett hett. De Grupp hett nu de Opgaav, de Red Queen, de schienbor nich mehr ünner Kontroll is, aftoschalten.
De Misschoon is sworer as dat toeerst utsütt. To’n een is de Red Queen beter schuult, as jem kloor weer, to’n annern luert de do’en Mitarbeiters in’n Hive, de mit dat Virus infizeert un to Zombies muteert sünd. De warrt free laten, as se to’n Afschalten vun de Red Queen de Dören apen maken doot. Mit en elektromagneetschen Puls künnt se den Reekner utschalten, man veer Lüüd blievt bi den Versöök doot. Bito hebbt se nu mit de Zombies to doon, de överall luert. Dorto noch warrt jem de Tiet kanpp, vunwegen dat se ut’n Hive rut mööt, vördem de hele Hive automaatsch versegelt warrt.
Na un na weet Alice jümmer mehr, wat sik vör den Twüschenfall afspeelt hett. Ehr fallt wedder in, dat dat en Gegenmiddel to dat T-Virus gifft un woneem dat lagert weer. Man, in’t Labor fehlt dat Gegenmiddel. As sik rutstellt. stickt Spence dorachter: He weer de Unbekannte, de dat Virus roven wull. Alice harr vörher al mit Matt un sien Süster Lisa Addison versöcht, de Apentlichkeit över de illegalen Arbeiten in’n Hive optoklären, wat Spence aver mitkregen harr.
Dat T-Virus as ok dat Gegenmiddel harr he in’n Tog versteken, vördem dat Sekerheitssystem vun de Red Queen em mit dat Gas utschallt harr. He lett de restlichen Lüüd vun dat Team torüch un versöcht sik dörtoslahn, warrt aver an’n Tog vun en muteert Leevwesen doodmaakt, dat bi en Experiment tüügt worrn is. Alice un de annern künnt opletzt freekamen un stellt dat Gegenmiddel un dat Virus seker. Mit den Tog versöökt se ut’n Hive wedder ruttokamen. Man, dat muteerte Wesen maakt all bit op Alice un Matt doot. As se torüch in de Villa sünd, fangt ok Matt an to muteren, vunwegen dat he vun dat Wesen en Wunnen kregen hett. Vördem Alice em en Gegenmiddel sprütten kann, warrt se vun Umbrella-Forschers ut’nanner hollen un ünner Quarantäne stellt.
An’n Sluss warrt Alice in’t Krankenhuus vun Raccoon City wedder waak. Se neiht ut dat Krankenhuus ut un finnt buten en Stadt ahn Minschen vör, de vullstännig verwööst is. Dat T-Virus mutt an de Böverflach kamen wesen un hett sik utbreedt.
Kritik
ännern- Andreas Borcholte schreev op Spiegel Online, dat al vele Lüüd vergeevs versöcht harrn, en spoodriek Reeknerspeel as Film ümtosetten. Mit de in Düütschland produzeerten Kinofaten vun „Resident Evil“, weer aver en spannenden Horror-Thriller tostannen kamen, de sogor ne’e Impulsen för’t Genre bringen de.[1]
- Hans Schifferle meen in de Süddeutsche Zeitung, dat meist all Mannslüüd in den Film blass un swack utsehn deen, egal wat se goot oder slecht, dapper oder feeg weern. Man, de Fronslüüd sünd de Heldinnen. Bi de Rull vun de Kampdeern Rain (Michelle Rodriguez), harr Anderson ’n beten överdreven, wiel Alice (Milla Jovovich) een in’n Bann tehn de.[2]
- Sebastian Handke oordeel in Die Tageszeitung, dat dat Muster vun’n „Survival Horror“, dat ut dat Speel övernahmen weer, keen Dagsiet, keen Verloop un keen natürlich Enn harr – blots Levels, in de tellt to överleven. Andreson beteken he mehr as en Designer as ’n Speelbaas. De köhlen un klaustrophoben Böverflacheneffekten verraden, wo veel Möh un Geld dorin verbennt worrn is. „Resident Evil“ weer de eerste Adapschoon vun de Game-Logik, de nich in de Büx gahn weer. Liekers künn Alien dat beter, un dor geev dat de Spelen eerst achteran.[3]
- Dat Lexikon vun’n internatschonalen Film beschrifft dat Wark as en op Spannung trimmte Verfilmen vun en populär Videospeel, de in Effekten un Utstatten övertüügt, man afsehn vun buitere Action un Balleree kuum wat vörtowiesen harr. Sünners de Figuren bleven dör de Bank blass.[4]
Utteken
ännernResident Evil hett keen Filmpriesen wunnen, man, de Film weer veer mol nomineert. 2002 weer he in de Kategorien Best Horrorfilm un Best Dorstellersche för den Saturn-Pries vörslahn. 2003 weer de Filmeditor Alexander Berner för den Düütschen Kamerapries nomineert.
Produkschoon
ännern
Bernd Eichinger hett 1997 för Constantin Film de Filmrechten an Resident Evil vun den Speleentwickler Capcom köfft. Plaant weer, dat George A. Romero dat Dreihbook schrieven un Speelbaas wesen schüll. Sien Dreihbookskizze, de den Film mehr an dat Speel orienteert harr, is aver aflehnt worrn. Romero segg, dat blots Eichinger gegen sien Dreihbook wesen weer un is 1999 vunwegen „kreative Differenzen“ ut dat Projekt utscheedt. De an de Filmprodukschoon bedeeligte Videospeel-Utfinner Yoshiki Okamoto hett aver in en Interview mit dat Magazin Electronic Gaming Monthly kloorstellt, dat dat Dreihbook eenfach slecht wesen weer un Romero dorüm rutflagen is. Dat Dreihbook is later eerst in’t Internet publizeert worrn.[5]
Dreiht weer de Film vun’n 5. März 2001 bit to’n 19. Mai 2001. Dat meiste is in Berlin in’t Studio Berlin Adlershof un an verschedene Öörd in de Ümgegend dreiht worrn. De U-Bahnhoff Bundestag (ehmols Reichstag nöömt), de to de Tiet noch nich fardig stellt weer, deen as Kulisse för en Togang to’n Laborkumplex (Hive). De markanten Sülen vun den Bahnhoff sünd in’n Film düütlich to kennen. In Potsdam weer dat Slott Lindstedt för Szenen in de Villa bruukt. Butendem deen de Potsdamer Kaserne vun de Heeres-Rietschool in Krampnitz as Kulisse. De letzte Szeen an’t Enn vun’n Film, as dat verwööste Raccoon City wiest warrt, is in Toronto dreiht worrn.
De Produkschoonskosten warrt op ruchweg 32-33 Millionen US-Dollar schätzt. In de USA is de Film an’n 15. März 2002 in de Kinos kamen. In Düütschland lööp he an’n 21. März 2002 an. Weltwiet hett de Film üm un bi 102 Millionen Dollar inspeelt, dorvun alleen 40 Millionen in de USA un ruchweg 5 Millionen US-Dollar in Düütschland.[6][7]
Anners wat
ännern- De Naam vun de Protagonistin (Alice) warrt in’n Film nich wiest un ok keenmol seggt. Eerst in’n Afspann warrt de Tokieker gewohr, woans se heet. In’t engelsche Original warrt ok de Begreep Zombie nich seggt, woll aver in de düütsche Synchronisatschoon.
- In de eerste Faten vun’t Dreihbook geev dat en annert Enn, dat aver ut Kostengrünnen ännert weer. Dorbi weer vörsehn, dat Alice in dat Unbrella-Hööftquarteer ringeiht un Matt befreet. En Deel vun disse Szeen is al dreiht wesen un kann as Bonus-Material op de DVD ankeken warrn. Opletzt föhrt Alice un Matt söss Maanden later in en panzert Fohrtüüch op New York City to, wat tonichten maakt is, üm dor na Lüüd to söken, de överleevt hebbt.
- Alice’s Adventures in Wonderland un Through the Looking-Glass, and What Alice Found There vun Lewis Carroll tellt to Anderson sien leefsten Böker. Bito hett de Speelbaas na egen Vertellen strukturelle Vergliekborkeiten twüschen Resident Evil un de Geschichten vun Carroll sehn, vunwegen dat sik bi beide en Heldin op en wunnersome Reis in’n Ünnergrund begifft, woneem se op snaaksche un unheimliche Saken draapt. Tallrieke Anspelen in’n Film un de Naam Alice vun de Protagonistin weern Referenzen an Carroll, de Andertson mit Afsicht inboet hett.
- Ofschoonst de Film en engenstännigen Inholt hett un de Protagonistin Alice in de Videospeel-Vörlagen nich vörkummt, wiest he doch en grote Tall vun Parallelen to’t Speel op. Transportmiddels as Töög sünd en Stilmiddel, dat in de Spelen jümmer wedder opduukt. Ok warrt se in de Regel to’n Schauplatz vun Angrepen un Kämp. De chroonsche Knappheit vun Munitschoon speelt jüst so in Speel un Film en bedüden Rull.
- De Afwehrmechanismus vun de Red Queen is Bestanddeel vun en Level vun dat Speel Resident Evil 4, dat dree Johren later rutkamen is. Ok hier mutt een en Laser utwieken.
- De Film schüll oorsprünglich Resident Evil: Ground Zero heten. Man, na de Terroranslääg vun’n 11. September 2001 un de Verbinnen vun den Begreep Ground Zero mit den Anslag hett man dorvun afsehn, disse Beteken in’n Film to bruken.
Literatur
ännern- Patrick Steinwidder: Perfect Girls: Die Computerspiel-Verfilmungen „Lara Croft: Tomb Raider“, „Resident Evil“ und „Final Fantasy“, in de Tietschrift Medien-Impulse, rutgeven vun’t öösterrieksche Bundsministerium för Wetenschop, Kunst un Kultur, Dezember 2003
- Keith R. A. DeCandido: Resident Evil: Genesis, Panini Verlag, 2004, ISBN 978-3-8332-1130-0 (Roman to’n Film)
Borns
ännern- ↑ Filmkritik Milla im Monsterland
- ↑ Filmkritik Alice in Bunkerland
- ↑ Filmkritik Virtual Transfer
- ↑ Lexikon des Internationalen Films – Resident Evil: Genesis
- ↑ Dreihbook-Faten vun George A. Romero (engelsch)
- ↑ http://www.imdb.de/title/tt0120804/business
- ↑ http://www.boxofficemojo.com/movies/?id=residentevil.htm
Weblenken
ännern- Resident Evil (Film) in de Internet Movie Database (engelsch)
- Kritiken to’n Film op Rotten Tomatoes