Süderwisch (Cuxhoben)

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Cuxhoben
Inwahners:
Postleettall:	27474
Vörwahl:	04721
Geograafsche Laag:	53° 51′ N, 8° 41′ O

Süderwisch is en Deel von de Gemeen Cuxhoben in’n Landkreis Cuxhoben, Neddersassen. De Oort billt binnen Cuxhoben tohoop mit Westerwisch de Oortschop Süderwisch-Westerwisch.

Geografie

Süderwisch liggt in de Masch, hett mit’n Drangst aver ok en Geestinsel. Na Westen hen slütt sik denn de Geest von de Hoge Lieth an.

De Naveröörd sünd Westerwisch un Cuxhoben in’n Noorden, Groden in’n Oosten, Olenwoold in’n Süden, Holt un Spangen in’n Süüdwesten un Sahlenborg in’n Noordwesten.

Historie

De Naam Süderwisch weer toeerst de Naam von de Wischen in’n Süden von Ritzbüttel. Dör de Wischen lööp de Weg (later Schossee) na Olenwoold. Langs dissen Weg hett dat denn en poor enkelte Hööv geven, de denn ok Süderwisch heten hebbt.

Süderwisch hett sik 1873 mit Westerwisch to een Gemeen tohoopdaan un de Gemeen Süderwisch-Westerwisch billt.

Na’n Westen to liggt as Geestinsel in de Masch de Drangst. De Drangst weer bet in’t 19. Johrhunnert noch en leddig Feld, vondaag is dat en Wahnrebeed. De Wischen twüschen Drangst un de Schossee sünd denn na’n Tweten Weltkrieg beboot worrn. In’n Süden von’n Drangstweg liggt dat Boomviddel, in dat de Straten na Bööm nöömt sünd, un in’n Noorden dat Oostprüßenviddel, in dat de Straten na Strööm un Öörd in de Oostrebeden nöömt sünd. Noch en Stück wieder in’n Noorden liggt dat Dichterviddel, in dat de Straten na plattdüütsche un hoochdüütsche Dichters nöömt sünd.

An’n 1. März 1935 is Süderwisch Deel von de Gemeen Cuxhoben worrn. Vondaag billt Süderwisch-Westerwisch binnen de Gemeen Cuxhoben en Oortschop mit en egen Oortsvörstand.

Inwahnertall

Johr	Inwahners
1826-00-001826	54 Inwahners, 7 Hüüs
1847-00-001847	49
1866-12-033. Dezember 1866	73
1871-12-011. Dezember 1871	33

Religion

Süderwisch is evangeelsch-luthersch präägt un billt mit de Gnadenkark en egen Kaspel. Bet 1907 hett Süderwisch to dat Kaspel Olenwoold höört, later denn to de Martinskark in Ritzbüttel. An’n 1. Januar 1962 is de Karkengemeen denn egenstännig worrn.

Infrastruktur

Verkehr

Süderwisch liggt an de Bundsstraat 73 un an de Kreisstraat 8. De B 73 löppt in’n Noorden na Cuxhoben rin un in’n Süden na Olenwoold un denn wieder an de Autobahn 27. De K 8 löppt von de B 73 af na Westen na Spangen hen. Ans gifft dat noch de Theodor-Heuss-Allee, de von de B 73 na Noordwesten afgeiht, bi Westerwisch de K 2 krüüzt un denn na Döös un Duhnen wiederlöppt.

De nächste Bahnhoff is in Cuxhoben an de Bahnlien Bremen-Cuxhoben un de Nedderelvbahn na Hamborg, wat so bi veer Kilometer weg is.

Scholen

En egen Volksschool hett de Oort fröher nich hatt, de Kinner sünd ganz fröher in Olenwoold na School gahn un toletzt in Ritzbüttel. An’n 11. Oktober 1955 hett denn de Süderwischschool apenmaakt, wat en Grund- un Hauptschool is, mit vondaag 35 Schoolmeesters un 360 Schölers.

De DRK-Kita Süderwisch is an’n 1. Februar 1995 in’n Matthias-Claudius-Weg 17a grünnt worrn.