Santiago Perdomo
Santiago Alberto „San“ Perdomo (* 22. April 1934; † 31. Juli 2011) weer en Politiker ut Brietsch-Honduras/Belize (PUP, UDP).
Leven ännern
Perdomo is 1934 as Söhn von Epifania Palomo un Tiburcio Perdomo boren un in Belize-Stadt opwussen.[1][2] Carlos Perdomo is sien Broder. Perdomo weer in Belize-Stadt op de Holy Redeemer Primary School un op dat St. John’s College.[2] He weer för en Tied Schoolmeester an dat Lynam College in Stann Creek Town.[2]
Na de Tied an’t Lynam College is Perdomo na San Ignacio tagen.[1][2] He weer in eerste Eh mit Lileth, borene Habet, verheiraadt.[1][2] De beiden hebbt in San Ignacio tohoop en Restaurant bedreven un harrn veer Kinner.[1][2] Ut siene twete Eh hett Perdomo twee Döchter.[1] He hett noch en drüdd Maal heiraadt, ut düsse Eh aver keen Kinner mehr.[1]
Perdomo is an’n 31. Juli 2011 doodbleven.[1] Sien Truurfier weer an’n 3. August 2011 in de Kark Our Lady of Guadalupe in Belmopan.[1]
Politik ännern
Perdomo weer 1964 bet 1965 Börgermeester von San Ignacio/Santa Elena.
Bi de Parlamentswahl in Brietsch-Honduras 1961 weer he Kannedaat för de PUP in’n Wahlkreis Cayo Süüd un hett de Wahl mit 61,3 % von de Stimmen gegen Eduardo Espat von de CDP un Pedro Mena von de NIP wunnen. Ok bi de Wahlen 1965 (59,9 % von de Stimmen gegen Pedro Mena, NIP), 1969 (50,0 % gegen Pedro Mena, NIP, un den unafhängigen Miguel Ruiz) un 1974 (59,8 % gegen Pedro Mena, UDP) kunn he sik in’n sülven Wahlkreis wedder dörsetten.
Dormit weer he von 1961 bet 1963 Afornten von de Legislativversammlung, de to’n 1. Januar 1964 in dat Repräsentantenhuus övergahn is, von dat Perdomo von 1964 bet 1979 Maat weer.
Perdomo is 1961 toeerst Minister för Bildung worrn un weer as Minister för Bildung tiedwies tosätzlich för Huusbo un Arbeid tostännig. En Tied lang hett he ok dat Ministerium för Bueree övernahmen.[2] He weer Minister för Natürliche Ressourcen un toletzt bet 1979 Minister för Hannel un Industrie.
An’n 30. Juni 1981 is Perdomo von de PUP na de United Democratic Party (UDP) wesselt, nadem George Cadle Price Said Musa för’n Senaat nomineert harr. Perdomo dee Musa as Sozialisten wohrnehmen.
In de Johren 1980 weer Perdomo Baadschopper för Zentraalamerika un Panama.