Severin Slüter
Severin Slüter (* 18. Oktober 1571 in Halle; † 16. Juli 1648 in Hamborg) weer en düütschen Schoolmann un evangeelschen Theoloog.
Slüter is 1571 as Söhn von Berend Slüter in Halle boren. He weer op de Gymnasien in Herwede un Ossenbrügge. Na de School weer he an de Universitäten Köln, Erfurt un Helmstidde. In Helmstidde hett he den akadeemschen Graad von en Magister von de Philosophie kregen un hett denn toeerst as Huuslehrer un Hoffmeester arbeidt. 1603 güng he as Kunrekter an dat Gymnasium Athenaeum in Stood un is dor denn ok kort later Rekter worrn.
Von Stood is he 1613 as Preddiger na Bücken in de Graafschop Heien beropen worrn. 1615 is he Pastoor in Winsen an de Aller un an’n 22. April 1617 Hauptpastoor von de St.-Jacobi-Kark in Hamborg worrn. Nadem he düt Amt an’n 20. Juni 1617 ok aktiv övernahmen harr, höll he von 1621 bet 1625 theoloogsche Vörlesungen an dat Akadeemsche Gymnasium un weer siet 1646 as Senior von dat Hambörger Geistliche Ministerium de Spreker von de luthersche Pastoornschop von Hamborg.
Slüter hett to de bedüdendsten Theologen von siene Tied höört. He fünn nich blots von Johann Arndt Tospraak, man ok von Johann Gerhard. Sien Index expurgatorius hispanicus von 1667, is op’n Index lannt un dröff nich leest warrn.
Slüter hett Maria Funke (Dochter von’n Pastoor Daniel Funke) freet. De beiden harrn twölv Kinner, von de en groten Deel noch as Kind doodbleven is. Blots siene Dochter Catharina un sien Söhn Johann Slüter (later Börgermeester von Hamborg) sünd in dat Grootwussenen-Öller kamen.
Warken
ännern- Disputatio Logica ex c. IX ad Romanor methodo Ramea concinnata, qua controversiae de aeterna Dei electione ac reprobatione modeste deciduntur. Hamborg 1597
- Anatomia Logicae Rameae. Hamborg 1607
- Anatomia Logicae Aristoteleae. Hamborg 1610
- Antithesis Philantropiae divinae & misanthropiae Calvinianae circa aeternam hominum salutem qua ostenditur, Deum valle omnes hommes salvos fieri, & nullum aeterno exitio, absoluto decreto destinasse. Hamborg 1611
- Commentarius in Petri Rami dialecticam. Hamborg 1612
- Diascursus theologicus de unione essentialium patrium S. Coena. Bruunswiek 1616
- Syncrisis controversiarum, quae a Ramaeis & Peripateticis motae sunt. Darmstadt 1608
- Disputatio ex Cap. IX. Epist. Ad Romanos
