Sharon Christa McAuliffe

Sharon Christa McAuliffe (* 2. September 1948 in Boston, Massachusetts as Sharon Christa Corrigan; † 28. Januar 1986 bi Cape Canaveral, Florida) weer en US-amerikaansch Schoolmeestersche, de as Bruuklastspezialistin an den Space-Shuttle-Floog STS-51-L deelnehm un dorbi to Dood keem.

Christa McAuliffe

Leven

McAuliffe weer dat öldste Kind vun Edward un Grace Corrigan. Se studeer Geschichte an dat Framingham State College in Framingham (Massachusetts) un kreeg 1970 en Bachelor-Afsluss. In dat sülvig Johr hett se hör Früend ut de Jöögd, Steven McAuliffe, heiraadt un truck mit hüm nah Washington, D.C.. Se kreeg 1976 en Söhn un 1979 en Dochter. In Maryland hett se af 1970 as Schoolmeestersche arbeit: tonächst een Johr as Uthülp an de Benjamine Foulois Junior High School in Morningside, dornah an de Thomas Johnson Junior High School in Lanham Amerikaansch Geschichte un Engelsch.

1978 kreeg McAuliffe vun dat Bowie State College en Master in Bildungswesen. De Familie truck nah Concord in New Hampshire üm, wo McAuliffe an de High School Geschichte ünnerrichten dee. Se weer bannig andaan vun de US-amerikaaansch Pionierinnen un führ an hör School en Kurs över de Geschichte vun de US-amerikaansch Fruen in.

Se hett gegen den slechten Tostand vun de apenlich Bildung in den USA kämpt un weer Präsidentin vun de Lehrerinnengewerkschap vun New Hampshire. As se vun dat Teacher-in-Space-Programm vun de NASA erfohren hett, hett se sück bewurben. In hör Bewerbung schreev se: „As Fru weer ik immer afgünstig up de Mannlüüd, de an dat Ruumfohrtprogramm deelnehmen kunnen. Ik funn, dat Fruen tatsächlich utslooten weern vun en vun de spannenst Beropsfelder, de dat gifft. Disse Gelegenheit, mien Fähigkeiten as Pädagogin mit mien Interessen för Geschichte un Ruumfohrt to verbinnen, is en eenzigoortig Chance, mien fröh Drööms wohrtomaaken. Ik weer bi de Gebort vun dat Ruumfohrttietöller dorbi, un ik much geern mitmaaken.“ Se hett haapt, dör hör Deelnahm dat apenlich Interesse an de Situatschoon in dat US-amerikaansch Optreckenswesen waken to können.

An’ 19. Juli 1985 wurr McAuliffe ut rund 11.000 Kandidat(inn)en in’ Rahmen vun dat Teacher-in-Space-Programm („Schoolmeesters in’ Weltruum“) as Liddmaat vun de Shuttle-Besatten utwählt. Hör offiziell Beteeken weer Bruuklastspezialistin (Payload Specialist). För den Floog weer plaant, dat se över dat Feernsehntwee halfstündig Ünnerrichtslektschonen ut den Weltruum afhollen sull: „De ultimative Utfloog“ un „Worüm wi Amerikaner de Weltruum utforschen“.

McAuliffe wurr denn utwählt för de Mission STS-51-L mit dat Space Shuttle Challenger , de an‘ 28. Januar 1986 um 11:38 Ühr Oortstiet vun dat Kennedy Space Center in Florida afhaben is. De anner Crew-Liddmaaten weern Kommandant Dick Scobee, Captain Michael John Smith, Missionsspezialisten Ronald Erwin McNair, Judith Arlene Resnik, Ellison Shoji Onizuka un de Bruuklastspezialisten Gregory Bruce Jarvis. Dör en Leck in den Drievstofftank is de Challenger aber nah 73 Sekunn explodeert un all söben Besattensliddmaaten keemen to Dood.

Ofschons McAuliffe nie de Eerdumloopbahn recken dee, wurrd se vun völ as eerste Schoolmeestersche in’ Weltruum ansehn. To hör Gedenken wurr de 1981 opdeckt Asteroid (3352) McAuliffe nömmt, ebenso en Maandkrater. Ok in de Space-Adventure-Game-Serie Wing-Commander wurr McAuliffe würdigt, indem en Ruumsektor hör Naam kreeg. Hör Ersatzfru Barbara Morgan wurr professionelle Astronautin un is mit de Space-Shuttle-Mission STS-118 in’ August 2007 to de Internatschonale Ruumstatschoon flaagen.

Privates

McAuliffe weer mit en Afkaat verheiraadt. Mit hör Mann Steve harr se een Söhn un een Dochter. De Moder Grace Corrigan, borene George, stammt vun hör Vaders Siet vun maronitisch-christlich Inwahnnerer ut den Libanon af. De Historiker un Orientalist Philip Hitti is en Grootunkel vun McAuliffe.

Weblenken

Sharon Christa McAuliffe. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie