Silverado (1985)
| Filmdaten | |
|---|---|
| Plattdüütsch Titel: | — |
| Originaltitel: | Silverado |
| Düütsch Titel: | Silverado |
| Produkschoonsland: | USA |
| Johr vun’t Rutkamen: | 1985 |
| Läng: | 128 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Lawrence Kasdan |
| Dreihbook: | Lawrence Kasdan Mark Kasdan |
| Produkschoon: | Lawrence Kasdan |
| Musik: | Bruce Broughton |
| Kamera: | John Bailey |
| Snitt: | Carol Littleton |
| Szenenbild: | Ida Random |
| Kledaasch: | Kristi Zea |
| Dorstellers | |
| |
Silverado is de Titel vun en’n US-amerikaanschen Western mit en Reeg beropen Schauspelers ut dat Johr 1985.
De Geschicht ännern
Emmett is ünnerwegens na Turley, woneem he sien Broder drapen will, üm mit em över Silverado wieter na Kalifornien to rieden. As he een’n Dag Puus maken deiht, warrt he vun dree Revolverhelden angrepen, man he is de betere Schütt un kummt jem bi. Op’n Weg stött he in de Wööst op den bit op de Ünnerbüchs utroften Paden, den he vör’t Verdössen rett. Tohopen riedt se wieter na Turley. Dor warrt se Tügen, woans de Swatte Mal wegen sien Huutfarv ut de Stadt verdreven warrt. Se hülpt em.
Man in Turley sitt Jake, de Broder vun Emmett, in’n Gefängnis un is al to’n Galgen veroordeelt, wiel he en Kerl doodschaten hett – in Nootwehr, as Jake seggt. Emmett un Paden hollt em rut un flücht för den Sheriff mit sien Lüüd. De jachtert natürlich achterran un is ok kott dorvör, jüm intohollen. Aver ut’n Versteek kriegt Emmet un Paden Hülp vun Mal, de sik dormit för den Vörfall in de Stadt bedankt. Vun nu an riedt de veer tohopen – elk vun jüm en Meesterschütt, vun den toeerst nich klor is, woneem he afkummt un wat he beleevt hett. Un elk mit sien lütte Egenheiten.
De veer kommt also in Silverado an, woneem de Veehtüchter un Landbesitter McKendrick mit sien Lüüd nee’e Siedlers dat Leven to Höll maken deit un ok rechtmatige Landbesitters to verdrieven versocht – to Noot ok mit Gewalt. McKendrick nimmt dat Gesett sülvst in de Hand un hett dorbi Sheriff Cobb un sien Deputies, de all ehmolige Kameraden vun Paden sünd, ünner sien Fuchtel. As nu Emmett un Jake in de Stadt kommt, spitzt sik de Situatschoon to. Emmett hett neemlich, as sik rutstellt, vör Johren al den Vadder vun McKendrick in Nootwehr doodschaten un hett dorvör lange Tiet sülvst in’t Gefängnis setten.
As McKendrick denn ut Raffgier Mals Vadder ümbringen lett un sik ut Afrekenlüsten an Emmetts Familie vergeiht, löpt dat Fatt över. Und as denn ok noch Sheriff Cobb Paden to Verstahn gifft, dat he sien Frünnen beter nich to Hülp kommen schall, betütt he sien Positschoon gegen den Sheriff. De veer findt sik an’n End tohopen un schickt McKendrick un sien Lüüd to’n Düvel. Opletzt stellt Paden Cobb to’n Duell un winnt.
Inholden ännern
Silverado is en Western na dat klassische Vörbild, wo de Fründschap twüschen Mannslüüd in de Harten vun oprechte Aventüerers över alln’s annere steiht un de wirkliche Held to’n rechten Tietpunkt nipp un nau weet, wat he doon mutt. In’n Vördergrund staht Whisky drinken Brekers un Slagdoods, de dat Gesett wedder liek böögt, wenn smerig Handlangers de rechtschoppend eenfachen Siedlers drauht un dat Gesett in de Figur vun den Sheriff för Geld den Beek rünner geiht.
De Welt in Silverado dreiht sik üm Land, üm Veeh un üm Macht. Tyypsch Speelöörd vun de Geschicht sünd Pokerdischen, dat Gefängnis oder de Bar in’n Saloon un even dat wiete Land. Froonslüüd fallt in disse Welt kuum en Bedüden to, afsehn dorvun, dat se Warms un Leev geevt oder op jemehr Kinner oppasst – kuum en Klischee fehlt in’n Film. En Utnahm dorvun is aver de Barfro Stella, de sik mit ehr Arbeit achtern Tresen ehr’n Levensdroom wohrmaakt hett, letzt Enns denn aver doch to’n Speelball vun Sheriff Cobb warrt, den de Laden tohöört.
Silverado is somit en lienentro Western, de gor nich eerst versöcht, mit ole Klischees to breken, man mit jem arbeidt un jem nütt. De Film sett ganz un gor op Spannen un anhollend Action, wobi he aver to lieken Tiet ok en dördacht Geschicht antobeden hett, de eerst na un na dat ganze Utmaat vun de Verwickeln vun de enkelten Figuren mit de sik opbooend Situatschoon pries gifft. Faken noog gaht ok de Helden in de Fall un blievt dormit normale, verwundbore Minschen. Natürlich nimmt de Film en goot End – ok wenn dorför toeerst veel Blood vergaten warrn mutt.
Kritik ännern
Silverado weer ungefäähr to lieken Tiet in de Kinos to sehn as Pale Rider mit Clint Eastwood, de ok Speelbaas wesen is. Beid Filmen hebbt en Oort Renaissance för den Westernfilm utlöst. De Kritiken weern mehrstendeels goot. Sünners goot gefallen harr Kevin Costner, de as wehlig jungen Revolverheld en markensweert Beweglichkeit an’n Dag legg un sünners dör sien akrobatsch Riedkunst övertüügt hett.
Utteken ännern
- De Film weer 1986 för den Oscar nomineert in de Kategorien Best Toon un Best Filmmusik
- Ok 1986 weer de Film för den Artios vun de Casting Society of America nomineert.
Websteden ännern
- Silverado (1985) in de Internet Movie Database (engelsch)