Michael Greis

Michael Greis (* 18. August 1976 in Füssen) is en ehmalger düütsch Biathlet.

Greis hett dree Goldmedaillen bi den Olympisch Winterspelen 2006 as ok dree Mal Gold bi Weltmeesterschapen. Buterdem kunn he in de Saison 2006/07 den Gesamtweltcup för sück entscheeden. De Hauptfeldwebel weer Liddmaat vun de Sportfördergruppen vun de Bundswehr. An' 5. Dezember 2012 hett Greis sien Rückträe vun den Leistungssport verklort.

Kindheit un Utbillen

De Söhn vun en Bestattungsünnernehmer is in Nesselwang in' Allgäu upwussen. Michael Greis hett en een Johr öllere Süster, de sülvst Biathlon bedreeven. Nah de School hett he en Utbillen to'n Kommunikatschons-Elektriker (Fackrichtung Informatschonstechnik) maakt, worup dat Fachabitur an en Telekolleg folg.

En anfungen Studium in dat Fack Internatschonales Management an de Fackhoochschool Ansbach hett Greis wegen den grooten Tietupwand nich afslooten.

Karriere

Anfänge un Rinkommen in dat Weltcupteam

Michael Greis fung as alpiner Skilöper an, ehe he in dat Öller vun elf Johren bi den SK Nesselwang to'n Skilangloop wesselt is. Gemeensam mit öllere Sportler lehr he dor later ünner Anleiden vun den fröheren Weltklasse-Athleten Andreas Schweiger den Biathlonsport kennen, bi den he denn bleev. In dat Öller vun 20 Johren kreeg Greis en Bataillonsstäe bi de Bundswehr un fung af 1996 in Ruhpolding an, ünner Fritz Fischer to traineeren. Een Johr later belegg Greis bi de düütsch Meesterschapen all en darten Platz.

Nah goot Ergevnissen in' Europacup as ok den Sieg mit de Staffel un den tweeten Platz in de Verfolgung bi de Europameesterschapen 2001 in Haute Maurienne wurr Michael Greis Enn' vun de Saison 2000/01 eerstmals in' Biathlon-Weltcup insett. Bi de olympisch Generalproov in dat US-amerikaansch Soldier Hollow leep he sien eerste Weltcup-Rennen. Nah en 66. Platz in sien allereerst Rennen hett de Allgäuer mit twee sösste Platzen in' Sprint un de Verfolgung överrascht. . In de folgen Weeken keem Greis noch to eenig wiedere Insatzen, reck dorbi aber kien nennenswerte Platzeeren. Eerstmals intensiver hett Greis up sück upmarksom maakt in' Januar 2002 in Oberhof, as he in Sprint un Verfolgung up de Platzen 7 un 5 keem. Een Week later reck he achter den Franzoosen Raphaël Poirée mit den tweeten Platz in' Sprint vun Ruhpolding sien eerst Podestplatzeeren.

Af dissen Tietpunkt hörr Greis to'n fasten Weltcupkader un wurr ok bi de Olympisch Winterspelen 2002 insett. Dor reck he in Sprint un Verfolgung de Platzen 15 un 16. Nah de Olympisch Spelen wurr Greis in Östersund as ok all in Ruhpolding weer Tweet in' Sprint, dit mal achter sien Mannschapskollegen Sven Fischer. Sien tweet Weltcup-Saison hett Greis as 17. vun den Gesamtweltcup afslooten. In de Saison 2002/03 weer Greis eerstmals vun Saisonbeginn an bi jeder Weltcupstatschoon an' Start. Ofschons he bedüüdend mehr Rennen bestrieden dee as in de Vörsaison, hett he blots twee Top-10-Platzeeren schafft, dorvan en 5. Platz bi de letzt Weltcupstatschoon in Östersund. Bi de Weltmeesterschapen 2003 is Greis blots in' Sprint an den Start gahn un kunn dor mit Platz 29 ok nich övertüügen. Ok in' Gesamtweltcup harr he sück verschlechtert, dor keem he blots up Platz 26.. Een Erfolg in disse Saison weer för Greis aber denn de gemeensam mit Martina Glagow errungen Sieg bi de eerstmals in de Arena Auf Schalke in Gelsenkirchen utdragen World Team Challenge.

Eerste Erfolge bi Weltmeesterschapen

Bedüüdend spoodrieker verleep för den Allgäuer aber de Saison 2003/04. Bi den Weltcup in Pokljuka in' Januar 2004 wurr Greis in' Massenstart Dart un muss sück blots ganz knapp den beid Norwegern Halvard Hanevold un Ole Einar Bjørndalen slahn geven. Twee wiedere Platzeeren ünner de best teihn Athleten reck Greis bi den vör de Weltmeesterschapen stattfinnen Weltcup in Antholz. Dör de Platzen 5 in' Sprint un 9 in de Verfolgung bi de Weltmeesterschapen 2004 in Oberhof hett sück Greis, de tovör eerst dree Mal in en düütsch Staffel in' Weltcup insett wurrn weer, för dat Staffelrennen. Gemeensam mit Frank Luck, Ricco Groß un Sven Fischer wurr Michael Greis as Slusslöper Weltmeester mit de düütsch Biathlon-Staffel, de bi 40 Schööt blots twee Nahlader bruuken dee. Ok de Rennen nah den Weltmeesterschapen verlieepen för Greis recht spoodriek, in dat amerikaansch Fort Kent gelung hüm to'n darten Mal in sien Loopbahn en tweet Platz in en Weltcuprennen. An' Sluss vun de Saison keem Greis as 13. vun den Gesamtweltcup up mehr as düppelt so völ Weltcuppunkte as in de Vörsaison.

In de Saison 2004/05 kunn sück Greis wieder stiegern. Anfang Dezember gelung hüm dat in Oslo mit den Platzen 6, 5 un 9 to'n eersten Mal in sien Karriere, all dree an en Weltcup-Oort utdragen Rennen ünner de Top-10 aftosluuten. Ebenso gelung dat Greis in disse Saison ok regelmatig, sück ünner de Top-30 to platzeeren un somit Weltcuppunkte to erlangen. In' Februar 2005 wunn Greis bi de olympisch Generalproov in San Sicario bi Cesana Torinese (Italien) sien eerst Weltcuprennen: In' Eenzel sieg he mit en Scheetleistung ahn Fehler vör de dree Russen Sergei Tschepikow, Sergei Roschkow un Iwan Tscheresow. Bi de Weltmeesterschapen in' März 2005 in Hochfilzen wunn Greis mit en Rückstand vun blots knapp teihn Sekunn up den Tschechen Roman Dostál Sülver in dat Eenzelrennen över 20 Kilometer, sien eerst Eenzelmedaille bi Grootereignisse. Ok de anner WM-Rennen verleepen för hüm mit de Platzen 6 in' Sprint, 5 in de Verfolgung as ok 10 in' Massenstart spoodriek. Ofschons Greis ok in de Staffel en goot Eenzelleistung wies, reck dat wegen de wat swaaker Ergevnisse vun de dree anner Löpers blots to Platz 6. An' Enn' vun de Saison leeg Greis up Platz 9 vun de Weltcup-Gesamtwertung un dormit eerstmalig ünner de best Teihn , mit den Eenzel-Disziplinenweltcup wunn he ok sien eerste Weltcupwertung. To'n Afsluss vun de Saison wunn Greis gemeensam mit Uschi Disl, Kati Wilhelm un Ricco Groß de Bronzemedaille in de Mixed-Staffel. In' Sömmer 2005 wunn he buterdem bi den eerstmals utdragen City-Biathlon in Püttlingen.

Triumph bi Olympia 2006

Nahdem de düütsch Athleten de eerste Weltcupstatschoon to dat Vörbereiten utlaaten harrn, fung de Saison 2005/06 för Michael Greis bannig spoodriek an. Glieks in sien eerst Saisonrennen reck he Anfang Dezember in Hochfilzen Platz 3 in' Eenzel, en Week later dreemal Platz 4 in Osrblie. To Anfang vun dat Johr 2006 gelungen hüm mit Platz 4 in Oberhof, Platz 3 in Ruhpolding as ok Platz 6 in Antholz wiedere goot Ergevnisse, so dat he in de Tüschentiet up den tweeten Platz vun den Gesamtweltcup leeg.

De bit to dissen Tiepunkt gröttste Spood vun sien Karriere gelung Michael Greis an' 11. Februar 2006 to'n Uptakt vun de Olympisch Winterspelen 2006 in Turin, as he in't Eenzel över 20 km eerst Olympiasieger vun de Spelen wurr. Mit blots een Scheetfehler bi dat eerst Stahnscheeten as ok de dartflinkste Looptiet kunn he sück vör de Norweger Ole Einar Bjørndalen un Halvard Hanevold behaupten. Dat weer de tweete Sieg in de Karriere vun Michael Greis, an glieker Stäe, an de he in dat Johr 2005 ok sien eersten fiern kunn. Dree Daag later funn dat Sprintrennen statt, wo he aber blots up Rang 33 rinkeem. In de denn folgen Verfolgung kunn he sück denn aber noch up Platz 8 vörkämpen.

De düütsche Staffel gull, nahdem se dree vun veer Saisonrennen wunnen harr, ok bi de Olympisch Spene as Favorit. Gemeensam mit Mannschapskollegen Ricco Groß, Michael Rösch un Sven Fischer seker sück Michael Greis an' 21. Februar 2006 mit de düütsch Staffel den Sieg vör Russland un Frankriek un wunn dormit sien tweet Olympiagold. Greis weer de achte Biathlet, de dat schafft hett, sowohl olympisch Eenzel- as ok Staffelgold to recken.

An' 25. Februar 2006 wunn Greis in dat eerstmalig utdragen olympisch Massenstart-Rennen över 15 km sien darte Goldmedaille bi disse Spelen vör den poolsch Biathleten Tomasz Sikora un den norweegsch Favoriten Ole Einar Bjørndalen. Dormit is Greis de eerste düütsch Olympiadeelnehmer, de in den Verloop vun een un de sülvige Olympisch Winterspelen dree Goldmedaillen winnen kunn. Bi Olympia 2006 weer blots de söüdkoreaansch Shorttrack-Löper Ahn Hyun-soo spoodrieker, de dreemal Gold un eenmal Bronze winnen kunn.

Wiel Greis nah de Olympisch Spelen blots noch bi den Sprint in Pokljuka an' Start weer un bi de letzt acht Saisonrennen wegen Problemen mit sien Teenen nich mehr antreeden is, full he in den Gesamtweltcup van' 3. Platz, den he nah Olympia beleggt harr, noch up den 10. Platz torüch. In disse Weltcup-Phase wurrn aber kien Eenzelrennen mehr utdragen, so dat Greis as ok all in de Vörsaison as Winner vun den Eenzel-Disziplinenweltcups faststunn.

Gesamtweltcupsieger vun de Saison 2006/07

Greis in' Februar 2007

De Saison 2006/07 fung mit twee dart Platzen to'n Uptakt in Östersund as ok den tweeten Platz in' Sprint vun Hochfilzen för Michael Greis bannig spoodriek an. Liekers stunn he in' Schadden vun Ole Einar Bjørndalen, de de eerst fiev Saisonrennen allesamt winnen kunn, bi den as Ersatz för Osrblie een Week later weer in Hochfilzen utdragen Weltcups aber nich an' Start weer. Sien eerst Weltcupsieg vun de Saison 2006/07 gelung Michael Greis bi dat Sprintrennen in Hochfilzen an' 14. Dezember 2006, dör en 9. Platz in dat tweet Sprintrennen övernehm Greis eerstmals in sien Karriere dat Geel Trikot vun den Weltcupführenden. Vun de düütsch Sportjournalisten wurr Greis in' Dezember as eerst Biathlet överhoopt to'n Sportler vun dat Johr 2006 wählt.

Dat eerste Rennen 2007 in Oberhof weer ok dat eerste Rennen in sien Karriere, bi dat Michael Greis in dat Geele Trikot antreeden dee. He reck in' Sprint den 2. Platz achter den Russen Nikolai Kruglow. Dör eenige swaakere Ergevnisse verlor Greis dat Geel Trikot in Ruhpolding an Bjørndalen, unn sück dat aber in Pokljuka torüchhalen, wiel de Norweger ok disse Weltcupstatschoon utlaaten dee.

De Biathlon-Weltmeesterschapen 2007 in Antholz fungen mit de Platzen 19 in' Sprint un 12 in de Verfolgung för Michael Greis tonächst weniger goot an. In de wiederen Rennen vun de WM kunn he sück aber stiegern. In dat Eenzelrennen över 20 Kilometer wunn he achter den Franzoosen Raphaël Poirée Sülver, mit de Staffel reck dat to de Bronzemedaille. In dat afsluuten Massenstartrennen wunn he mit de best Looptiet trotz twee Fehler in't eerst Stahnscheeten Gold vör sien Mannschapskollegen Andreas Birnbacher un Raphaël Poirée, womit he sien Medaillensatz vun Antholz kumplett maaken kunn. Mit disse Eenzelgoldmedaille is Michael Greis nah de beid Düütschen Mark Kirchner un Sven Fischer, de twee Norweger Halvard Hanevold un Ole Einar Bjørndalen as ok den Russen Nikolai Kruglow de sösste Biathlet, de sowohl bi Weltmeesterschapen as ok bi Olympisch Winterspelen Eenzel- un Staffelgold winnen kunn.

Bi dat eerst Weltcupweekenenn' nah de WM in dat finnisch Lahti weer Bjørndalen nich an' Start, so dat Greis sien Vörsprung up den Norweger in' Gesamtweltcup utbauen kunn. Bi de vörletzt Weltcupstatschoon in Oslo gungen de Podestplätze in de dree Rennen meest ahn Utnahm an Greis, Poirée und Bjørndalen, de somit vör de letzt Weltcuprennen in Chanty-Mansijsk eng binanner an de Tipp vun de Gesamtwertung leegen. Poirée harr aber all to dissen Tietpunkt sien Weltcupkarriere afslooten. Nahdem Bjørndalen in dat Sprintrennen vun Chanty-Mansijsk blots Platz 48 beleggt harr, reck Greis in de Verfolgung Platz 6. Platz, um sück vör de Tiet den Gewinn vun den Gesamtweltcup to sekern, in dat letzt Saisonrennen beleg he in' Massenstart achter den Russen Iwan Tscheresow den tweeten Platz.

Nah den Gesamtweltcup-Sieg vun Sven Fischer in dat Johr 1999 weer de Spood vun Greis nah acht Johren de eerste Gesamtweltcupsieg, de nich an Raphaël Poirée oder Ole Einar Bjørndalen gung. Twee Daag tovör kreeg he all de lüttgere Kristallkugel för den Gewinn vun den Sprint-Disziplinweltcup. Greis profiteer aber dorvan, dat sien Konkurrent Ole Einar Bjørndalen knapp een Drittel vun de Saisonrennen utlaaten harr. Wiels Bjørndalen elf Rennen för sück entscheeden kunn, wunn Greis in' Verloop vun Saison blots twee Saisonrennen. Liekers leeg Greis, de all Saisonrennen mitloopen weer, 794 Punkten an' Enn' 58 Punkte vör den Norweger.

Vun de Olympisch Spelen 2010 in Vancouver bit to'n Rückträe

Michal Greis kunn bi sien veer Eenzelwettbewarfen bi de Olympisch Winterspelen 2010 en Podestplatz recken (Verfolgung un Staffel (Platz 5), Teihnt in' Eenzel un Massenstart un 21. in' Sprint), weer aber dreemal best düütsch Starter in dat Biathlonteam vun de Mannlüüd. De Saison 2011/12 fung mit dörwussen Leistungen an, nah etwa en Drüddel vun de Saison full Greis för den Rest vun de Saison ut gesundheetlich Grünnen ut. För de folgen Saison hett he versöcht, sück noch mal heran to kämpen, keem aber bi den Saisonuptakt in Östersund nich ünner de best 60 vun dat Eenzel. Wiels dit Rennen is de Entsluss riept torüchtotreeden, de bei folgend Rennen hett he denn ok all nich mehr bestreeden. An 5. Dezember 2012 is Greis offiziell vun den Biathlonsport torüchtreeden. Nah sien Rückträe wull he sück intensiver mit sien Studium befaaten.

Statistik

Olympisch Winterspelen

Olympisch Winterspelen		Eenzel	Sprint	Verfolgung	Massenstart	Staffel
Johr	Oort
2002	Salt Lake City, USA	–	15.	16.	–	–
2006	Turin, Italien	(1.)	33.	8.	(1.)	(1.)
2010	Vancouver, Kanada	10.	21.	5.	10.	5.

Weltmeesterschapen

Weltmeesterschap		Eenzel	Sprint	Verfolgung	Massenstart	Staffel	Mixed-Staffel
Johr	Oort
2003	Chanty-Mansijsk, Russland	–	29.	DNS	–	–	Nich utdragen
2004	Oberhof, Düütschland	–	5.	9.	21.	1.
2005	Hochfilzen, Öösterriek	2.	6.	5.	10.	6.
2005	Chanty-Mansijsk, Russland	In Hochfilzen utdragen					3.
2006	Pokljuka, Slowenien	Olympisch Winterspelen in Turin					–
2007	Antholz, Italien	2.	19.	12.	1.	3.	5.
2008	Östersund, Sweden	36.	–	–	13.	3.	1.
2009	Pyeongchang, Süüdkorea	19.	7.	13.	DNF	3.	3.
2010	Chanty-Mansijsk, Russland	Olympisch Winterspelen in Vancouver || –
2011	Chanty-Mansijsk, Russland	7.	9.	11.	20.	7.	2.
2012	Ruhpolding, Düütschland	11.	26.	23.	22.	3.	–

Utteknungen

• 2006 – Bayerisch Sportpries Kategorie „Persönlicher Preis des Bayerischen Ministerpräsidenten“
• 2006 – Sportler vun dat Johr in Düütschland
• 2006 – Champion vun dat Johr
• 2006 – 3. Platz bi de Wahl to’n Sportler vun dat Johr in Europa
• 2011 – Holmenkollen-Medaille

Sonstiges

Michael Greis droog bi Wettbewarfen immer Kuntaktlinsen, hett sück aber in’ Harvst 2008 de Hornhuutverkrümmen operativ korrigeeren laaten. Van Midden 2008 bit 2010 weer he mit de Sportkollegin Kathrin Hitzer tosommen.

Weblinks

Michael Greis. Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun Michael Greis
• Michael Greis in de Datenbank vun de IBU (engelsch)