South Stann Creek
Dit Woort hett noch annere Bedüden: kiek dorför ünner Mayan King.
| South Stann Creek | ||
|---|---|---|
| Laag | Stann Creek, Belize | |
| ||
| Stroomsystem | South Stann Creek | |
| Läng | 64 km | |
| Afströömrebeed | 270 km² | |
| Born | in de Maya-Bargen | |
| Münn | in de Karibische See | |
| Koordinaten Münn: | Koordinaten:16° 43′ N, 88° 18′ W16° 43′ N, 88° 18′ W | |
| linke Blangenströöm | Sittee Branch | |
De South Stann Creek is en Stroom in’n Distrikt Stann Creek von Belize, de in de Karibische See münnt.
De Stroom hett en Afströömrebeed von üm un bi 270 km². Tohoop mit sien Bornarm Juan Branch is he 64 Kilometer lang, ahn Juan Branch 45 Kilometer.
De North Stann Creek is en kumplett separaten Stroom 30 Kilometer wieder in’n Noorden.
Verloop
ännernDe Stroom billt sik in de Maya-Bargen bi 16° 46′ N, 88° 31′ W ut Juan Branch un Cockscomb Branch.
De Juan Branch hett sien Born nich wied af von de Grenz von de Distrikte Toledo un Stann Creek bi 16° 42′ N, 88° 37′ W (teihn Kilometer in’n Noordwesten von Maya Mopan). Von dor flütt he för 19 Kilometer na Noordoosten bet he mit’n Cockscomb Branch tohoopflütt.
De Cockscomb Branch hett sien Born an’n Süüdhang von de Cockscomb Range (mit’n Victoria Peak) bi 16° 45′ N, 88° 36′ W un flütt von dor ölven Kilometer na Oosten. Kort vör dat Tohoopfleten mit’n Juan Branch nimmt de Cockscomb Branch noch den Mexican Branch op. De hett sien Born in de Neegd von’n Born von’n Juan Branch bi 16° 42′ N, 88° 36′ W un flütt von dor 14 Kilometer na Noordoosten.
Dat kumplette Rebeed liggt in dat Cockscomb Basin Wildlife Sanctuary. Nadem de beiden Arms Juan Branch un Cockscomb Branch tohoopflaten sünd, flütt de South Stann Creek na Oosten, blifft aver noch en lange Tied wiedaf von de Zivilisatschoon in’n Oorwoold. He nimmt von links den Sittee Branch op, de sien Born bi 16° 49′ N, 88° 39′ W hett un von dor 22 Kilometer na Oosten de Cockscomb Range langs flütt.
Eerst bi de Öörd Mayan King un Santa Cruz drippt de South Stann Creek op bewahnt Rebeed. De Southern Highway geiht hier mit en Brügg över’n Stroom weg.
De South Stann Creek mäandert nu för de letzten üm un bi 20 Kilometer dör en Kulturlandschop mit Plantaaschen. Öörd gifft dat direkt an’n Stroom nich. De South Stann Creek münnt knapp veer Kilometer in’n Noorden von Riversdale in de Karibische See.