St.-Michaelskark (Bremervöör)

De Michaelskark in Bremervöör is en röömsch-kathoolsche Kark in dat Dekanat Ünnerelv von dat Bisdom Hilmssen. Ehren Naam hett se von’n Arzengel Michael. De Michaelskark is en Filialkark von de Hillig-Geist-Kark in Stood.

Historie

Na de Reformatschoon hett dat in Bremervöör keen kathoolsche Gemeenschop mehr geven, de groot noog weer för en egen Kark. Eerst na’n Tweten Weltkrieg hett dat dör Heimatverdrevene en gröttere Grupp Katholiken in de Stadt geven. Toeerst is de Seelsorg von 1940 af an von Geestmünn ut daan worrn. Von’n 1. Oktober 1945 af an weer denn Pastoor Wilhelm Machens as fasten Seelsorger för Bremervöör bestellt. In de Floodstraat is 1948 en Noodkark inricht worrn, de 1956 en Kuratiegemeen un 1980 en Parr worrn is.

An’n 1. September 2010 is de Karkengemeen mit de Karkengemenen von Hillig Geist in Stood un St. Ansgar in Warstood tohoopleggt worrn. De ne’e Karkengemeen driggt den Naam Hillig Geist.

De hüdige Kark an’n Mahlersbarg hett Bischop Heinrich Maria Janssen in’n August 1963 wieht. De Kark is von de Architekten Logemann/Brandt plaant worrn. Dat Parrhuus hebbt se 1966 boot.

An de Altorfront hett de Kark en fiev Meter hoog Kruzifix un rechts en ut Holt snittjert Figur von’n Arzengel Michael. De Altor is ut graue Basaltlava. De Ambo is ut Bronz. An de Wand von dat rechte Siedenschipp gifft dat en Mosaik von Marie un dat Jesuskind. Dor vör steiht dat Döpelbecken ut Basaltlava.

1986 hett de Kark en Örgel von de Bröder Oberlinger kregen. 1995 hett de Kark denn noch twee ne’e Klocken kregen, för de de Karkentoorn höger maakt worrn is.

Kaspel

To de Kark höört en Kaspel, dat 180 km² groot is un to dat en groten Deel von’n olen Kreis Bremervöör un von de fröhere Samtgemeen Olendörp in’n Landkreis Stood höört. Dor höört över 50 Öörd to, in de üm un bi 2000 Katholiken wahnt.

Weblenken

• Websteed von de Kark (hoochdüütsch)