St.-Nikolaus-Kapell (Heckthusen)

De St.-Nikolaus-Kapell is en kathoolsche Kapell in Heckthusen in’n Landkreis Cuxhoben, de den Hilligen Nikolaus wieht is.

De Kapell liggt an de Wischer Straat 5 (K 30) un höört to de Karkengemeen Hillig Geist in Stood. De wedder liggt in dat Dekanat Ünnerelv von dat Bisdom Hilmssen.

HistorieÄnnern

De Kapell is an’n 6. September 1959 dör Bischop Heinrich Maria Janssen wieht worrn. Vörher is dat Gebüüd as Sprüttenhuus von de Freewillige Füürwehr Heckthusen bruukt worrn. De Kapell hett to de Karkengemeen von de St.-Ansgar-Kark in Warstood tohöört.

Knapp dörtig Johr later is de Kark renoveert worrn un dorbi is de Kark denn ok binnen nee inricht worrn, üm de Vörgaven von dat Twete Vatikaansche Kunzil ümtosetten. Dorbi hett de Kapell ünner annern ok en levensgrote Bronzplastik von’n Hilligen Nikolaus kregen.

An’n 1. September 2010 is de Karkengemeen von Warstood un dormit ok Heckthusen Deel von de Karkengemeen Hillig Geist in Stood worrn.

InrichtungÄnnern

Plastik von’n Hilligen NikolausÄnnern

Rechts blangen den Ingang steiht en Bronzplastik von’n Hilligen Nikolaus. De Bischop böögt sik na de Person dal, de in de Kapell rinkummt, un schenkt em symboolsch en gollen Appel.

AltorÄnnern

De Kapell hett en ut Holt timmert Altor. De Altor is ut oold, reten Boholt boot. De Hölter sünd in Fackwark-Booord tohoopföögt.

AmboÄnnern

Dat sülve gellt ok för de Marien-Steel un den Ambo. De in Flammen un fürige Tungen oplööste Duuv is dat Symbol von’n Hilligen Geist.

Altorkrüüz un TabernakelÄnnern

Dat Altorkrüüz is ut Iesen smeedt. Jüst as Altor, Marien-Steel un Ambo is ok de Verkledung von’n Tabernakel ut Ekenholt. De Snittjereen op’n Middeldeel wiest in de runne Form von en Hostie Ohren un Druven, de Teken för Brood un Wien.

FinsternÄnnern

De veer Finstern ut Bleeglas sünd in de liturgschen Klören utföhrt.

  1. Dat Vigelett symboliseert de Passionstied. En groot anleggt Krüüzform wiest dat Lieden un den Dood von Jesus Christus.
  2. Gegenöver strahlt in Goldgeel un Witt – as Teken von dat Opstahn Jesu – de verkloorte Liev Jesu Christi in’t Symbol von dat Altarsakrament.
  3. Gröön as de Klöör von dat Leven un dat Höpen steiht för de Schöpfung von de Welt.
  4. Toletzt blifft de warvelnde Form in Rood. Mit düt Teken is dat Weihen von’n göddlichen Geist meent. Pingsten is de hillige Geist mit Störmgebruus över de Minschen wegfeegt un hett de grote Wandlung inleidt, as in de Apostelgeschicht beschreven.

StatuenÄnnern

De Pietá un de Hillige Elisabeth sünd Reprodukschonen na ole Vörbiller. De söven Karsen an de Marien-Steel charakteriseert de Söven Smarten von Maria. Besünners is ok de Snittjereearbeid von de Hillige Elisabeth in’n gootschen Stil.


Koordinaten:53° 38′ N, 9° 15′ O