Grootmudderbloom

De Grootmudderblomen (Viola wittrockiana) sünd Blomen ut dat Plantengeslecht vun de Violen (Viola) un höört to de Familie vun de Violenplanten (Violaceae) mit to. Se sünd tostanne kamen as Kultuurplanten ut dat Krüzen un Tüchten vun verschedene Aarden vun dat Plantengeslecht.

Grootmudderbloom, Gesichterbloom Steefmömekens Steifmariken
Grootmudderbloom
Systematik
Ornen: Malpighiales Familie: Violenplanten (Violaceae) Geslecht: Violen (Viola)
Wetenschoplich Naam
Viola wittrockiana
Gams ex Nauenburg & Buttler

Wie de Plant utsütt

Grootmudderblomen sünd meist tweejöhrige Planten. In dat eerste Johr wasst se ut de Saat un sünd man bloß gröön, un eerst in dat tweete Johr bleiht un vergaht se denn. Wenn se bitieds utseiht weert (bit Juli) bleiht se man ok in dat eerste Johr al duchtig. Wenn dat goot löppt, könnt se ok as mehrjöhrige Planten wassen, man de Gaarner hett dor keen Lust mehr up, vunwegen datt se nich mehr schöön utseht un en beten wat stakelig weert, wenn se öller, as twee Johre sünd. De Plant warrt bit to 20 cm hooch. Se bleiht vun April bit Oktober. De Blöten sünd 4 bit 6 cm groot un hefft fiev Kroonblöer.

Wie de Plant vermehrt warrt un wat for'n Formen dat gifft

Grootmudderblomen weert utseiht (in'n Winter för en Vörjohrs- oder Summerblome, oder in'n Summer för de Harfst- un Vörjohrsblome) oder dör Paten vermehrt. Hüdigendags gifft dat en unbannigen Barg vun Tuchtformen. Dor sünd nich bloß all Farven, man ok ganz verschedene Formen un Schaddens bi. Ok verscheden Farven up ene Blöte oder ene Plant sünd nich roor. Wenn een de Planten sülms tehn deit, is de Utwahl vun Farven veel grötter, as wenn he jem köfft. Dat swarte Ooge, wat to düsse Planten tohöörn dö, is midderwielen bi veele Sorten wedder wegtücht'.

• 
  'Delta Pure Deep Orange' Orange Bloom
• 
  'Delta Premium Pure White' Witte Bloom
• 
  'Delta Pure Yellow' Geele Bloom
• 
  'Delta Light Blue' Hellblaue Bloom
• 
  Blaue Bloom
• 
  Rode Bloom
• 
  Vigelette Bloom
• 
  Knallbunte Bloom

Wie de Plant insorteert warrt

De Botaniker Veit Brecher Wittrock hett de Plant 1896 beschreven, man he hett ehr keen Aaart-Naam geven, vunwegen sik dat dor ja um en Mischling ut Krüzungen bi hanneln dö. Unner den Naam Viola wittrockiana is se to'n eersten Mol 1925 vun den öösterriekschen Botaniker Helmut Gams beschreven wurrn. Vunwegen dat datt nich kumplett ween is, wat he dor schreven hett, konn dat in de Wetenschop nich as Eerstbeschrieven gellen. Dat fehl en Dokumentatschoon, de na de Sieten vun de Wetenschop her up Schick weer. De is denn erst in dat Johr 2007 vun den Biologen Johannes D. Nauenburg vun'n Botaanschen Goorn vun de Universität Rostock, tohopen mit sien Kollegen Karl Peter Buttler ut Frankfort an'n Main afgeven un in de Tiedschrift Kochia rurbröcht wurrn Nu heet de Grootmudderbloom för de Wetenschop richtig Viola wittrockiana. De Grootmudderblomen sünd Krüzungen vun de Aarden Viola altaica, Viola lutea un Viola tricolor.

Annere plattdüütsche Naams

In plattdüütsche Gemarken is de Grottmudderbloom ok noch bekannt unner düsse Naams:

• Gesichterbloom
• Steefmömekens
• Steifmariken

Kiek ok bi

• Projekt:Plantennaams up Platt
• Vijöölken
• Hoornvijöölken

Literatur

• Friedrich Dietert: Unser Gartenstiefmütterchen. Leipzig 1932.

Weblenken

Viola × wittrockiana. Mehr Biller, Videos oder Audiodateien to’t Thema gifft dat bi Wikimedia Commons.

• Grootmudderbloom