Swemmkävers

Bi de Swemmkävers (Dytiscidae) hannelt sik dat um en Familie mank de Kävers. Weltwiet gifft dat dor bi 3.200 Aarden vun. In Europa leevt bi 375 Aarden, dormank in Middeleuropa bi 152 Aarden.

Swemmkävers
Allerhand Swemmkävers
Systematik
Stamm: Liddfööt (Arthopoda) Ünnerstamm: Tracheendeerter (Tracheata) Böverklass: Sessfööt (Hexapoda) Klass: Insekten (Insecta) Ünnerklass: Fleeginsekten (Pterygota) Böverornen: Neeflunken (Neoptera) Ornen: Kävers (Coleoptera) Ünnerornen: Adephaga Familie: Swemmkävers (Dytiscidae)
Wetenschoplich Naam
Dytiscidae
Leach, 1815

Kennteken

Dat gifft bannig lüttje (2 mms), man ok grote (mehr as 48 mms) Swemmkävers. Meist fallt se vun’e Farven her nich groot up un sünd swatt, oder bruun, man se könnt ok roodgeel oder bunt ween mit allerhand Placken, Striepen un Sööm umto. Dat Lief is platt wölvt un hett de Form vun en Ellipse. De Achterbeen (Swemmbeen) sünd unnerscheedlich an de Bewegen in’t Water anpasst. Se sünd platt un an de Schenen un de fiev Lee vun’n Foot (Tarsus) sitt Bössen an, de sik afspreden doot, wenn se dor mit paddelt.

Wo se vorkamen doot

De Deerter sünd up de ganze Welt tohuse. Se laat sik meist in all Waters in finnen, wo dat veel Planten in gifft. In Dieke, Pööl, Seen, Beeke un Ströme kaamt se vor, to’n Deel sogor in Brackwater.

Wie se leven doot

De lüttjen Aarden mank de Swemmkävers mütt faken wekenlang nich na boven kamen. Se kriegt vun de Waterplanten noog Suerstoff. Man de gröttern Aarden mütt faken updükern un sik frische Luft holen. Dor „hangt“ se sik bi an de Böversiet vun dat Water un dat Achterenne vun ehr Lief kickt en beten ut dat Water rut. Se maakt dor dat Achterlief en beten krumm bi. So kummt twuschen de Deekflunken un dat Achterlief en Gatt tostanne: Dor kann de Luft denn dörströmen na de Atengöter twuschen de Segmente vun dat Achterlief. Ehre Budden hefft sunnerliche Anbacksels an’t Enne vun’t Achterlief un nehmt denn mit de achterlichsten Stigmen Luft up in ehre groten Tracheenstämm. Allerhand Swemmkävers könnt leifig flegen. So könnt se en anner Water upsöken, wenn ehr Pool utdröögt is oder wenn dat dor nix mehr to freten gifft. Sik utbreden un annere Waters besiedeln doot se ok sunnerlich dör de Luft.

Wat se freten doot

Waterkävers freet Fleesch un Aas. So fangt de Budden un de Kävers sunnerlich Pielepoggen, lüttje Fisch un Budden vun annere Insekten. Ok an dode Deerter gaht se bi. Wieldes de Kävers ehre Büte upfreten doot, könnt de Budden nich kauen, nich dalsluken un ok nich verdauen. Se maakt dat, as ehre Vörwesers, de Loopkävers, un verdaut buten dat egen Lief. Dör de scharpen Tangen vun ehre Mandibeln löppt en fienen Kanal dör. He münnt nich wietaf vun dat Mandibelenn. Hett de Budde en Büte grepen, sprütt se in’n sülbigen Momang dör düssen Kanal en Sekret to’n Verdauen in de Büte. In düt Sekret sitt Trypsin in. Fix warrt de Büte verlahmt un dat geiht los mit dat Vörverdauen vun dat Deert. Achternah suugt de Budde de Büte ut. Heken un Seken verscheelt sik bi allerhand Aarden düütlich. Paaren doot se sik unner Water. Achternah leggt se de Eier af. Je nadem backt se de an Planten an, schuuvt se mit en Leegbohrer (Ovipositor) unner de Plantenhuud oder deeper in de Plante rin. De Budden leevt jummers in’t Water un bruukt dree Statschonen, bit se utwussen sünd. Wenn se sik verpoppen wüllt, gaht de Budden vun de meisten Aarden ut dat Water rut un buddelt sik Kuhlen in’e Eer. Dat hangt vun de Temperatur af, wie lang dat duert, bit de Kävers utkrupen doot. Meist sünd dat twee bit fiev Weken. Dornah overwintert se denn. Dat gifft Aarden, de könnt en Reeg vun Johre leven.

Systematik

Allerhand Aarden ut de Geslechter Colymbetes, Copelatus, Meladema, Hydaticus, Rhantus un Graphoderus

Europääsche Unnerfamilien un Geslechter vun de Swemmkävers, dorto utwählte Aarden:

• Agabinae
  • Agabus
    • Agabus bipustulatus
  • Ilybius
  • Platambus
    • Placken-Stroomkäver (Platambus maculatus)
• Colymbetinae
  • Colymbetes
    • Slichten Poolswemmer (Colymbetes fuscus)
  • Meladema
  • Melanodytes
  • Rhantus
• Copelatinae
  • Copelatus
• Dytiscinae
  • Acilius
    • Slichten Fohrenswemmer (Acilius sulcatus)
  • Cybister
    • Cybister lateralimarginalis
  • Dytiscus
    • Geelrandkäver (Dytiscus marginalis)
    • Breedrand (Dytiscus latissimus)
    • Swattbuuk (Dytiscus semisulcatus)
  • Eretes
  • Graphoderus
  • Hydaticus
• Hydroporinae
  • Bidessus
  • Deronectes
  • Graptodytes
  • Herophydrus
  • Hydrocolus
  • Hydroglyphus
  • Hydroporus
    • Lüttjen Sessplacken-Swemmkäver (Hydroporus palustris)
  • Hydrovatus
  • Hygrotus
  • Hyphydrus
    • Glatten Kogel-Swemmkäver (Hyphydrus ovatus)
  • Iberoporus
  • Laccornis
  • Metaporus
  • Methles
  • Nebrioporus
  • Oreodytes
  • Porhydrus
  • Rhithrodytes
  • Scarodytes
    • Scarodytes halensis
  • Siettitia
  • Stictonectes
    • Stictonectes optatus
    • Stictonectes abellani
  • Stictotarsus
  • Suphrodytes
  • Yola
• Laccophilinae
  • Laccophilus
    • Grundswemmer (Laccophilus minutus)

Literatur

• B. Klausnitzer: Käfer im und am Wasser, ISBN 3-89432-478-3
• Jiři Zahradnik, Irmgard Jung, Dieter Jung et al.: Käfer Mittel- und Nordwesteuropas. Parey, Berlin 1985, ISBN 3-490-27118-1

Weblenken

Swemmkävers. Mehr Biller, Videos oder Audiodateien to’t Thema gifft dat bi Wikimedia Commons.