Terroransläge in Paris vun'n November 2015
De Terroransläge in Paris vun’n November 2015 sünd an'n 13. November 2015 in de franzöösche Hööftstadt Paris utöövt wurrn. Dor hett sik de Terrormiliz Islaamschen Staat to bekannt.[1] Bi de Ansläge sünd ok Börgen nahmen wurrn. Islamisten stunnen dorachter un harrn sik afsnackt, de Ansläge an sess verschedene Stäen in dat 10. un 11. Arrondissement in Paris un in de Vorstadt Saint-Denis ut to öven. De franzöösche Regeerung hett seggt, dor weern tominnst 132 Lüde bi dood maakt wurrn. Mehr as 350 Lüde sünd verwunnt wurrn, 97 vun jem swaar.[2] De Reeg vun Angreepe gung los an’n Freedagavend, Klock 21:17 h MET[3]. An dree Stäen is mit Gewehren rumballert wurrn, an een Stäe sünd Börgen nahmen wurrn un in de Bataclan-Kunzerthall hett dat en Massaker geven. Bi de Ansläge hefft sik Sülvstmordattentäters mit Sprengwesten bi in'e Luft jaagd un seven Exploschonen utlööst. So wat harr dat vordem in Frankriek noch nich geven. Sess vun de seven doden Angriepers sünd umkamen, vunwegen datt se sik sülms in'e Luft jaagt hefft, een is doodschaten wurrn, as de Polzei de Kunzerthall störmen dö.[4] Dree Exploschonen sünd direktemang neven dat Stade de France in Saint-Denis passeert. Dor weer um düsse Tied en Football-Fründschopsspeel twuschen de franzöösche un de düütsche Football-Natschonalmannschop.[5] Vunwegen de Ansläge hett de franzöösche Regeerung den Nootfall-Tostand utspraken[6] – to’n eersten Mol siet de Lawei in Frankriek 2005 in de Banlieus vun Paris.[7] – bovendem is en Staatstroer for dree Dage anordent wurrn. Präsident François Hollande hett seggt, Frankriek stunn in’n Krieg un he mookde kunnig, dat Land würr nu bannig gegen den Terror gegenan gahn. Ok annere Staaten ännern ehre Sekerheitspolitik un wollen an Frankriek Stütt un Stöhn geven, sän se. Up de ganze Welt hefft Lüde düütlich maakt, datt se sik an Frankriek siene Sieten stunnen.
Kiek ok bi
ännernBelege
ännern- ↑ [1] Terror in Paris: IS bekennt sich zu Anschlägen von Paris, Spiegel Online, 2015-11-14
- ↑ Zahl der Todesopfer steigt auf 132 – Paris November 2015 [2] vun'n 2015-11-15, FOCUS Online
- ↑ [3] Nationalteams Freundschaftsspiele, 2015, 6. Spieltag, rutg. Kicker-Sportmagazin, vun’n 2015-11-13
- ↑ Attentats à Paris – Alain Bauer: „La nouveauté, c’est le côté kamikaze“[4] Oliver Übertalli, 14.11.2015
- ↑ [5], Terror in Paris, 2015-11-13, in: Spiegel Online
- ↑ [6] At least 120 dead in Paris attacks, Hollande declares emergency (engelsch), Reuters US, 14. November 2015, vun Ingrid Melander un Marine Pennetier.
- ↑ Décret n°2005-1386 du 8 novembre 2005 portant application de la loi n°55-385 du 3 avril 1955
Weblenken
ännern
Terroransläge vun’n 13. November 2015 in Paris. Mehr Biller, Videos oder Audiodateien to’t Thema gifft dat bi Wikimedia Commons.