The Beach (Film)
| Filmdaten | |
|---|---|
| Plattdüütsch Titel: | — |
| Originaltitel: | The Beach |
| Düütsch Titel: | The Beach |
| Produkschoonsland: | Grootbritannien, USA |
| Johr vun’t Rutkamen: | 2000 |
| Läng: | 119 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Danny Boyle |
| Dreihbook: | John Hodge Alex Garland (Roman) |
| Produkschoon: | Andrew Macdonald |
| Musik: | Angelo Badalamenti |
| Kamera: | Darius Khondji |
| Snitt: | Masahiro Hirakubo |
| Szenenbild: | Andrew McAlpine |
| Kledaasch: | Rachael Fleming |
| Dorstellers | |
| |
The Beach (op plattdüütsch so veel as „De Strand“) is de Titel vun en britisch-amerikaanschen Speelfilm ut dat Johr 2000 vun den Speelbaas Danny Boyle. De Film basseert op den Roman The Beach (dt.: Der Strand) vun den Englänner Alex Garland ut dat Johr 1996. De Hööftrull speelt Leonardo DiCaprio.
Inholt ännern
De US-amerikaansche Student Richard Fischer maakt Urlaub in Thailand. In en rünnerkamen Hotel in Bangkok dröpt he en snaakschen Schotten, de sik sülvst Daffy Duck nöömt un en beten dörhen is. De beiden ünnerholt sik, wobi Daffy em vun dat vollkamen Eiland vertellt.
Den nächsten Dag is Daffy dood, vunwegen dat he Sülvstmoord maakt hett. Man he lett en Landkoort för Richard torüch, de vun Hand tekent is. Dorop is de verstekene Strand intekent, de för normale Touristen nich to finnen is. Richard is neeschierig worrn, man he weet nich recht, woans he dorhen kamen schall. Dorüm fraagt he Étienne un Françoise, en franzöösch Poor, wat se tosamen mit em den paradiesischen Strand söken wüllt. Tosamen maakt se sik op’n Weg. Ünnerwegens lett Richard twee Amerikaners, Sammy un Zeph, de he op Ko Samui dröpt, en Kopie vun de Koort dor.
Mit en hüert Boot kamt de dree toeerst na en Navereiland in’n Ang-Thong-Natschonalpark, mööt denn aver en poor Kilometers na dat nächste Eiland swemmen. En Deel vun’t Eiland warrt vun en Drogenorganisatschoon nütt, woneem se dör mööt. Opletzt mööt se ok noch en Waterfall hendaal springen, üm den op en Kommune to drapen, de den Starnd för sik in Besitt nahmen hett un blots af un to mol Levensmiddel mit en Boot holen doot. De Anföhrers vun de Kommune heet Sal, en Amerikaansche, un Bugs, ehr Leefsten, de tosamen dat Regeer föhrt, wat meist as’n Diktatuur lett. Ne’e Lüüd sünd nicht jüst geern sehn, man torüchschicken doot se jem ok nich, vunwegen dat dat en Gefohr för dat Paradies op dat Eiland dorstellen de. Dat Geheemnis üm dat Eiland schall jo wohrt blieven. Üm in de Grupp opnahmen to warrn, mööt sik de dree gegensietig en sünner’t Brandteken op’n linken Böverarm inbrennen.
Na en poor Daag warrt Richard as Held vun de Grupp fiert, as he en Hai mit en Mess doodmaakt hett. Man, Bugs is niedsch op em un sien heldenhafte Daat. Mit de Tiet kamt Françoise un Richard tosamen, Étienne dorgegen wennt sik daalslahn af. As de Ries to Enn geiht, mutt Sal torüch in die Zivilisatschoon reisen. Se söcht en Freewilligen, de mitkummt. Ofschoonst he sik nich mellen deit, söcht se sik Richard ut. Bugs sett Richard ünner Druck un klemmt em de Genitalien in, dat he sik blots nich an sien Fründin ranmaken schall, wiel se ünnerwegens sünd. Liekers bringt Sal em dorto, dat he mit ehr Sex hett. Se drapt op de US-amerikaanschen Touristen, de vun Richard de Kopie vun de Koort kregen hebbt. Vör Sal stritt he dat natürlich af.
Torüch op dat Eiland duukt na en poor Daag de Touristen an’n Strand vun dat Navereiland op. Sal veroordeelt em dorto, op en Felsen Wacht to hollen, üm de Koort tonichten to maken, wenn de Touristen versöken schülln, an Land to gahn. Bito vertellt se in’t Camp vun jemehr Affär, worophen Françoise mit em Sluss maken deit. Richard nimmt togliek jümmer mehr Afstand to de Realität un spioneert de militanten Cannabisbuern ut. Dorbi kiekt Richard mit an, dat de Touristen vun de Drogenlüüd doodschaten warrt. He versöcht dorophen, wedder Kuntakt to de Franzosen to kriegen.
Tosamen överleegt de dree, dat se vun’t Eiland utneihn wüllt. Richard is kloor, dat de Cannabisbuern mööglicherwies gau in de Kommune ankamen doot. Dat passeert wohrhaftig kort later. Mit jemehr Scheetwapen drauht se de Inwahners vun de Kommune, dat se jem Gewalt andoot, wenn se dat Eiland nich verlaten doot. Sal denkt aver gor nich doran, so dat de Anföhrer vun de Drogenorganisatschoon ehr en Ultimatum stellen deit: Wenn de Grupp op dat Eiland blieven will, mutt Richard vun Sal doodschaten warrn. Wohrhaftig nimmt se den Revolver un drückt af. Man, de eerste Patronenkamer is leddig, un so blifft Richard an’t Leven. De Inwahnerswarrt nu aver opbröcht, vunwegen dat Sal för jemehr Geheemnis den Dood vun en Minschen in Koop nahmen hett. Se verlaat dorophen all bit op Sal dat Eiland un kehrt torüch in jemehr fröher’t Leven.
In de letzten Szeen is to sehn, as Richard in en Internetcafé en Nettbreef vun sien Öllern kriggt un ok en vun Françoise, in de en Gruppenbild vun den Strand to sehn is.
Kritik ännern
Cineclub.de kritiseer, dat de Film bannig op’t Dorstellen vun DiCaprio tosneden is, wat för „normale“ Tokiekers langwielig weer. Eenzig de Sluss warrt loovt, vunwegen dat de Figuren denn ok mol Geföhlen wiesen doot.[1] Christoph Elles schreev in sien Kritik op jump-cut.de, dat man den Film woll naseggen künn, dat he DiCrapio op Kosten vun de annern Figuren in’n Vördergrund stell. Liekers wies he sik andoon vun de unkonventschonellen Oort un Wies mit de Boyle deels ok gegen de Regeln vun de Filmkunst arbeiden de, wodör he den Film vun de Lienwand torüch in’t Leven bringt.[2]
Utteken ännern
De Film hett keen Priesen wunnen, weer aver vör tosamen söven Utteken vörslahn, dörünner dreemol för den Teen Choice Award aver ok för de Golden Himbeer för DiCaprio as Slechtst Dorsteller.
Achtergrund ännern
En groten Deel vun den Film weer op de thailännschen Inselgrupp Phi Phi dreiht, ünner annern an’n Strand vun Maya Bay. De Film wiekt in grote Delen vun de Roman-Vörlaag af, vör allen wat de Relatschonen twüschen Richard un Françoise bedrapen deit.
Vun RTL2 gifft dat en sneden Faten vun den Film, de free af 12 Johren is. Bi disse Faten fehlt ruchweg 5 Minuuten, de ut ölven Szenen rutsneden worrn sünd. Dat bedröpt enige Szenen, in de Lüüd doodschaten warrt, in de de Sehren na den Hai-Angreep ut de Neeg to sehn sünd un vör allen ok de Szenen, as Richard in’n Wald to halluzineren anfangt un he kort vör Sluss den swoor besehrten Christo starven lett, indem he em den Mund tohollen deit.[3]
Borns ännern
- ↑ Filmkritik op Cineclub.de afropen an’n 12. Mai 2012
- ↑ Filmkritik vun Christoph Elles op Jump-cut.de afropen an’n 12. Mai 2012
- ↑ Vergliek vun de FSK 16 Faten mit de FSK12 Faten vun RTL2 op schnittberichte.com; afropen an’n 12. Mai 2012
Weblenken ännern
- The Beach in de Internet Movie Database (engelsch)