The Bourne Identity (2002)

The Bourne Identity (op Platt so veel as „Bourne sien Identität“; dt. Titel: Die Bourne Identität) is en US-amerikaansche Literaturverfilmen ut dat Johr 2002. Speelbaas vun dissen Actionfilm weer Doug Liman, de Hööftrullen weern vun Matt Damon un Franka Potente speelt. De Film bassert op den Bestseller mit glieken Naam vun Robert Ludlum. De Geschicht is later wietermaakt worrn mit de Filmen The Bourne Supremacy (2004), The Bourne Ultimatum (2007) un The Bourne Legacy (2012).

Filmdaten
Plattdüütsch Titel:	—
Originaltitel:	The Bourne Identity
Düütsch Titel:	Die Bourne Identität
Produkschoonsland:	USA Düütschland Tschechien
Johr vun’t Rutkamen:	2002
Läng:	119 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Doug Liman
Dreihbook:	Tony Gilroy W. Blake Herron
Produkschoon:	Patrick Crowley Richard N. Gladstein Doug Liman
Musik:	John Powell Moby
Kamera:	Oliver Wood
Snitt:	Saar Klein Dennis Virkler
Szenenbild:	Dan Weil
Kledaasch:	Pierre-Yves Gayraud
Dorstellers
Matt Damon: Jason Bourne Franka Potente: Marie Helena Kreutz Chris Cooper: Chester Conklin Brian Cox: Ward Abbott Clive Owen: De Professer Gabriel Mann: Danny Zorn Julia Stiles: Nicolette „Nicky“ Parsons Adewale Akinnuoye-Agbaje: Nykwana Wombosi

Inholt

De Film fangt op en Fischerboot an, woneem de Fischers en Mann ut dat Middelmeer tehn doot, de sien Bewusstsien verloren hett. In sien Rüch finnt de Sanitäter an Boord twee Kugeln, de den Mann darpen hebbt, un butendem en lütt Redschopp, de ünner de Huutstickt un mit en Laser de Tall vun en Swiezer Banksluttfack anwiest. De frömme Mann kummt wedder to sik, man he weet nich wokeen he is un wat he in sien Leven doon hett. Na twee Weken geiht he an Land un föhrt eertmol na Zürich in de Hapen, dat he sien egen Identität wedder op de Spoor kummt. In dat Sluutfack finnt he en Pistool, Geld in verschedene Soorten un grote Mengden un en half Dutz namaakte Utwiesen. De eerste Pass, den he apensleiht is de US-amerikaansch. Dorin finnt he den Naam Jason Bourne.

Togliek warrt de Tokieker dör Szenen, de in’t CIA-Hööftquarteer in Langley speelt, wies, dat Bourne vun de CIA jaagt warrt un se em utschalten wulln. In de Bank in Zürich kamt se em meist op de Spoor un he mutt weglopen. Dorbi fallt em op, dat he ahn groot Natodenken nipp un nau weet, wat he to doon hett. Mit Help vun de düütschen Studentin Marie Kreutz kann he na Paris utneihn, woneem he fröher mol arbeit to hebben schient. Wohrhaftig warrt he glieks kennt un man slutt em sien Wahnung apen. Wiel he sik dor ümkieken deit, warrt he vun en Killer överfallen, den he in’n Nahkamp aver torüchslahn kann un de sik dorophen ut’t Finster stört. Jason un Marie mööt wedder weg, kamt sik op de Flucht aver nöger, wiel jem de CIA-Afdeelbaas Chester Conklin vun de USA ut en grote Tall Agenten achterher jaagt, üm jem an de Siet to maken.

Dör Informatschonen, de he sik tosamensöcht, kummt Bourne nu wedder dorop, dat he sik in’t Middelmeer an Boord vun de Yacht vun en Afrikaansch Ex-Diktater ophollen hett. Un he weet nu ok wedder, dat he den Opdrag harr, em ümtobringen, dat aver vör de Ogen vun sien Kinner nich över’t Hart bröcht hett. Op de Flucht is he vun twee Kugels drapen worrn un füll in’t Water.

Jason un Marie föhrt ut Paris rut op’t Land un versteekt sik bi’n Fründ vun Marie, man ok dor warrt he vun en CIA-Killer funnen. De beiden Mannslüüd, de dorto utbillt sünd, annere doodtomaken geevt sik in de fre’en Natur en Duell, bi dat Bourne sien Gegner an de Siet maakt. Man vun em höört he vun dat Treadstone-Projekt. Marie lett he dor un föhrt alleen na Paris torüch, woneem he op Conklin dröpt, de em utschalten laten will. Bourne is em aver wedder en Schritt vörut.

Dat he sülvst en Opdragskiller vun de CIA is, dröpt em hard. He finnt rut, dat Jason Bourne en vigeliensch utklamüstere Schienidentität is un he Deel vun de Geheemoperatschoon Treadstone weer. Bourne haut Conklin bewusstlos un neiht wedder ut. Conklin will em achteran, warrt nu aver sülvst dör en CIA-Killer ut’n Verkehr togen. Op de Wies versökt sien Ban den Fehlslag vun dat Treadstone-Projekt to vertuschen.

As de tostännige CIA-Macker denn för en Ünnersökenskomitee utseggen mutt, verklort he dor, dat Treadstone en Projekt to’n Utbilln vun Agenten weer, dat sik aver vun wegen de hogen Kosten nich lohnt harr. Dat Komitee gifft sik mit disse Leeg tofreden un geith to’t nächste Thema över.

In de Twüschentiet is Marie in Grekenland ünnerduukt un verleht dor Motorrollers. Een Dag steiht Jason Bourne bi ehr in de Döör, un för de beiden fangt en nee Leven an.

Kritiken

Prisma-online: Trotz einiger Längen und nicht gerade glaubhaften Wendungen bietet Regisseur Doug Liman (Swingers, Go) mit dieser recht freien Adaption des Robert-Ludlum-Bestsellers spannende Unterhaltung. Dank der Darsteller – allen voran Franka Potente als hilfreiche Deutsche – verzeiht man die ein oder andere unlogische Verwicklung. Um die Kussszene mit Matt Damon zu überstehen, stärkte sich Franka angeblich mit einem deftigen Jägermeister, genauso wie der ebenso nervöse Matt.

Kunzept

The Bourne Identity schüll en untyypischen Actionfilm warrn. Anners as bi Filmregen as James Bond oder Mission Impossible warrt dat Leven vun en Agenten dorüm veel realistischer dorstellt. De Film sett dorüm nich op rekneranimeerte Tietlupen-Action as t. B. bi The Matrix, man op resolute Nahkampszenen. As in’t wirkliche Leven mööt Wapen in den Film nalaadt warrn un Autos fleegt nich glieks in de Luft, wenn se tohopenstöten doot. Liekers gifft dat vele Szenen, de sik böös an’n Rand vun de Realität bewegt, so as an’t Enn vun’n Film, as Bourne in en Treppenhuus mitsamt en Liek veer Stockwarken deep springen deit, in’t fre’e Fallen mit en Koppschööt en Gegner doodmaakt un opletzt meist ahn Besehren op de Liek lannen deit.

In’n Vergliek to de Romanvörlaag ut dat Johr 1980 un de eerste Verfilmen The Bourne Identity (dt.: Agent ohne Namen) mit Richard Chamberlain is de Figur Jason Bourne in dissen Film düütlich jünger utfallen un de Geschicht is an de technische un politische Entwickeln vun de verleden Johren anpasst worrn. An sik kann een nich direkt vun en Literaturverfilmen snacken, vun wegen dat de Inholt vun den Roman mit Utnahm vun de Naams vun eenige Personen un vun de Utgangssituatschoon vun den Agenten mit Amnesie nich mehr veel mit den Film gemeen hett.

Filmpriesen

De Film weer vör söven Filmpriesen vörslahn un hett dree dorvun wunnen:

• 2003: den American Choreography Award in de Kategorie Rutragen Leistung in Kampchoreografie för Nick Powell
• 2003: den Taurus Award in de Kategorie Best Arbeit mit en Fohrtüüch för de Stunt-Fohrers
• 2003: den ASCAP Award in de Kategorie Top Box Office Films för John Powell

Anners wat

De Film is mit en Budget vun 60 Millionen US-Dollar dreiht worrn. Weltwiet hett he mehr as 213 Millionen US-Dollar inspeelt.

Deelwies speelt de Film in Zürich, man dreiht worrn sünd disse Szenen ut Kostengrünnen in Prag. De Telefonzellen, Restaurants un enige annere Saken sünd dorüm as in’t Original naboet worrn. De Stratenbahnen, de in’n Film to sehn sünd, drägt de Farven vun de Züricher Stratenbahn (blau-witt) un seht teemlich echt ut, man in Wohrheit sünd dat Bahnen vun den tschechischen Hersteller Tatra.

Dat Titelleed vun den Film Extreme Ways is vun Moby.

Literatur

• Robert Ludlum: Die Bourne Identität. Heyne, Mai 2003, ISBN 3-453-87195-2

Weblenken

• The Bourne Identity in de Internet Movie Database (engelsch)
• Kritiken to den Film op Rotten Tomatoes