The Fifth Element

The Fifth Element (op Platt so veel as „Dat föffte Element“; dt. Titel: Das fünfte Element) is en franzööschen Science-Fiction- un Aventüerfilm ut dat Johr 1997 vun den Speelbaas Luc Besson. De Hööftrullen vun de Space Opera weern mit Bruce Willis un Mila Jovovich besett. Dör sien bannig hogen Inspeelresultat vun ruchweg 260 Millionen US-Dollar tellt he to de kommerziell spoodrieksten europääschen Filmen.

Filmdaten
Plattdüütsch Titel:	—
Originaltitel:	The Fifth Element
Düütsch Titel:	Das fünfte Element
Produkschoonsland:	Frankriek
Johr vun’t Rutkamen:	1997
Läng:	121 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Luc Besson
Dreihbook:	Robert Mark Kamen Luc Besson
Produkschoon:	Gaumont Patrice Ledoux
Musik:	Éric Serra
Kamera:	Thierry Arbogast
Snitt:	Sylvie Landra
Szenenbild:	Dan Weil
Kledaasch:	Jean-Paul Gaultier
Dorstellers
Bruce Willis: Korben Dallas Mila Jovovich: Leeloo Gary Oldman: Zorg Ian Holm: Vito Cornelius Chris Tucker: Ruby Rhod Luke Perry: Billy Brion James: General Munro Thomas Lister junior: Präsident Lindberg Maïwenn Le Besco: De Diva (sungen hett Inva Mula) John Neville: General Staedert Lee Evans: Fog Charlie Creed-Miles: David

Inholt

De Film fangt mit en Torüchblenn an in’t Ägypten vun’t Johr 1914. In en verfallen Tempel is en Archäoloog dorbi, en olle Inschrift uteneen to klamüsern, na de dat gresig Böse all 5000 Johren loslaten warrt un versöcht, allns Leven tonichten to maken. Ok vun en Wapen gegen dat Böse steiht dor wat schreven, de as dat „föffte Element“ betekent warrt. Wobi de veer Elementen Füer, Water, Eer un Luft dör veer Stenen repräsenteert warrt, wiel dat föffte in en Sarkophag begraven wesen schall. Dat Böse kann anhollen warrn, wenn de Elementen in’n Tempel opstellt warrt.

De Priester, de op den Tempel oppassen deit, wohrt ok dat Geheemnis vun’t föffte Element. He versöcht den Professer dorvun aftohollen, noch mehr ruttofinnen, as op mol en Ruumschipp mit Butenirdische, neemlich de Mondoshawan (utsnackt as Mondoshiwan), vör’n Tempel lannt. Vun wegen, dat de Eerste Weltkrieg bevörsteiht, weern de Elementen nich mehr seker op de Eer, un so mehtn se jem mit in’n Weltruum. De Priester kriggt aver den Opdrag, sien Weten an de nakamen Generatschonen wietertogeven.

In’t Johr 2263 is dat denn so wiet, dat sik dat Böse wiesen deit un en Kamp twüschen Goot un Böös losgeiht. Dat Böse hett en Verbünnten op de Eer mit den zynischen un kapitalistischen Wapenhännler Zorg, de sik Soldaten vun en gestaltwanneln Raaß, de sik Mangalores nöömt, ranholt, üm för em de Drecksarbeit to maken. Zorg schall de veer Stenen in sien Gewohrsom bringen un se an dat Böse utlevern, ümdat de Eer denn ahn Schuul is.

As versproken, warrt vun de Mondoshawan de Butenirdische Leeloo schickt, üm dat föffte element na de Eer to bringen. Dat warrt bruukt, üm de Eer tosamen mit de annern veer Elementen gegen dat Böse to verdeffenderen. Dat Ruumschipp warrt ünnerwegens aver vun de Mangalores angrepen un afschaten. Vun Leeloo blievt aver noch en poor hele Zellen över, ut de Leeloo vunt Militär op de Eer klont warrn kann. Toeerst is se schier dörhen un ahn Orienteeren. Se neiht ut dat Labor ut un lannt dorbi ut Versehens int Taxi vun Korben Dallas, de fröher mol as Offizeer in en Sünnereenheit deent hett.

Ofschoonst Dallas sik to Anfang gor nich mit er ünnerholen kann, nimmt he de junge Fro bi sik op un bringt er na den Priester Vito Cornelius, de as Nafolger vun den ägyptischen Priester opstunns dat Geheemnis üm de Elementen wohrt. He is de Verbinnensmann to de Mondoshawan un to Leeloo. De Priester un sien Helpsmann bringt Leeloo allens bi, wat se weten mutt, un versöökt wieter ruttofinnen, woneem de Stenen sünd. In de Twüschentiet gifft dat Striet twüschen Zorg un de Magalores, vun wegen dat de Akschoon, dat föffte Element aftofangen, scheef lopen is. Vun nu an jaagt de beiden Parteien unafhangig vunenanner achter de Stenen her.

Dat Militär gifft in de Twüschentiet Korben Dallas den Opdrag, sik op en Krüüzfohrt-Ruumschipp mit en Singersche to drapen, de de veer Stenen bi sik hett. Ok Cornelius, Zorg un de Mangalores versöökt unafhangig vunenanner de Stenen to kriegen, man Dallas flüggt opletzt sülvst mit Leeloo na dat Schipp un mutt dor as Ehrengast vun den exzentrischen Showmaster Ruby Rhod herhollen. Cornelius flüggt as blinnen Passager mit. Zorg un de Mangalores griept dat Schipp aver an. De Singersche blifft bi den Angreep dood, man Dallas kann de Stenen un ok Leeloo redden, de bi den Kamp gegen Zorg un gegen de Mangalores böös verstört warrt. Dallas, Leeloo, Ruby un de Priester künnt mit en lütt Schipp vun Zorg utneihn. Bi en Bombenexplosion, de an Boord vun de Mangalores utlöst warrt kummt Zorg denn aver üm.

Dat Böse flüggt dorgegen wieter op de Eer to un steiht kort dorvör mit den Planet tohopentostöten, as Dallas un de annern an’n ägyptischen Tempel ankamt. Mit de veer Stenen künnt se de Wapen gegen dat Böse to’n Deel aktiveeren, man dat föffte Element – neemlich Leeloo sülvst – fehlt noch. Dör ehr Insichten in de Gewalt un dat Tonichtenmaken is se aver so dörhen, dat se kort dorför is, doodtoblieven. Se sütt keen Sinn, en so gewalttätige Raaß as de Minschen to redden. Se fraagt Korben, dat he ehr en Grund seggen schall, worüm de Minschen verdeent hebbt to överleven. As Korben ehr dorophen en Söten gifft un ehr seggt, dat he eher leev hett, warrt se as föfft Element aktiveert. Dat Böse warrt Sekunnen vör de Kollision vun en Lichtstrahl, de vun de veer Stenen utsennt un vun dat föffte Element bünnelt warrt, anhollen un torüchsmeten. Ahn op de militäärschen Ehren to achten, fiert Korben un Leeloo an’t Enn jemehr Tosamenkamen.

Kritiken

• Lexikon vun’n internatschonalen Film: Ein virtuos mit Filmzitaten gespickter Film, bei dem Dekor und Effekte alles, Handlung und Logik hingegen pure Nebensache sind. Laut, bunt und oft auf dem Niveau einer Freak-Show, versteht der Film sein Publikum doch besser zu unterhalten als die Mehrzahl seiner uniformen Hollywood-Konkurrenten.

• James Berardinelli hett den Film op ‚ReelViews‘ mit de Science-Fiction-Filmen Stargate, Independence Day un Judge Dredd vergleken. He schreev, de Film höör to de Filmen, de den Tokieker mit Trickeffekten ‚angriepen‘ un de Logik un de ‚Intelligenz‘ vergeten laten. En hogen Filmetat weer keen Garantie för’n go’en Film, un dat weer goot wesen, wenn een en poor tosätzliche Dollars för en ‚beter’t Dreihbook‘ utgeven harr.

• Martin Soyka seggt dorgegen: Insgesamt ist „Das fünfte Element“ etwas ganz Eigenes geworden. Gut konsumierbar, nicht unintelligent, witzig, schnell und mit ungeheuerer Chuzpe erzählt.

Utteken

De Film weer för 25 Filmpriesen nomineert, dorünner ok eenmol för den Oscar in de Kategorie Best Tooneffekt. Uttekent worrn is de Film mit söven Priesen:

• 1997: mit den Bogey Award in Sülver
• 1997: mit de Golden Lienwand
• 1998: mit den BAFTA Film Award in de Kategorie Best Trickeffekt för Mark Stetson, Karen E. Goulekas , Nick Allder , Neil Corbould , Nick Dudman
• 1998: mit den César in de Kategorie Best Kameramann för Thierry Arbogast
• 1998: mit den César in de Kategorie Best Speelbaas för Luc Besson
• 1998: mit den César in de Kategorie Best Szenenbild för Dan Weil
• 1998: mit den Lumiere Award in de Kategorie Best Speelbaas för Luc Besson

Achtergrund

De Dreihbookschriever Luc Besson harr de Idee to so en Geschicht al in’t Öller vun 16 Johren. To disse Tiet hett he den eersten Roman to „The Fifth Element“ schreven. In’t Johr 1990 hett de Arbeit an’t Dreihbook anfungen, een Johr later schüll de Produkschoon mit Gaumont un Warner Bros. as Produkschoonsfirmen losgahn, man Warner hett kortfristig torüchtogen wegen de plaanten gresigen Produkschoonskosten bun mehr as 100 Millionen US-Dollar. Na Besson sien Spood mit Léon künn dat 1996 denn mit de Arbeit an’t Projekt wietergahn. Een Jahr later keem de Film in de Kinos.

Weblenken

• The Fifth Element in de Internet Movie Database (engelsch)
• Kritiken to’n Film op Rotten Tomatoes