The Man Who Knew Too Much (1934)
The Man Who Knew Too Much (op Plattdüütsch so veel as „De Mann, de toveel wüss“, dt. Titel: Der Mann, der zuviel wußte) is en britschen Thriller ut dat Johr 1934 na en Originalgeschicht vun Charles Bennett un D.B. Wyndham-Lewis. Hitchcock sülvst hett vun den Film in’t Johr 1956 en Remake ünner den glieken Naam produzeert, wat een vun sien bekanntsten Filmen worrn is.
| Filmdaten | |
|---|---|
| Plattdüütsch Titel: | — |
| Originaltitel: | The Man Who Knew Too Much |
| Düütsch Titel: | Der Mann, der zuviel wusste |
| Produkschoonsland: | Grootbritannien |
| Johr vun’t Rutkamen: | 1934 |
| Läng: | 75 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Alfred Hitchcock |
| Dreihbook: | Charles Bennett Edwin Greenwood |
| Produkschoon: | Michael Balcon |
| Musik: | Arthur Benjamin |
| Kamera: | Curt Courant |
| Snitt: | Hugh Stewart |
| Dorstellers | |
| |
Inholt
ännernDat Ehpoor Bob un Jill Lawrence maakt mit jemehr Dochter Betty Skiurlaub in de Swiez. Jill nimmt dorbi an en Scheetwettstriet in’t Toonduvenscheten deel. Se draapt dor Louis Bernard, de wiel en Ballavend bi’t Dansen mit Jill dör en Finster doodschaten warrt. Kort vördem he dooblifft, seggt he Jill, dat se in sien Kamer na en versteken Naricht söken schall, de se an’n brittschen Geheemdeenst wieterleiden mutt. Bob slickt sik in de Kamer vun den Doden un finnt den Zeddel ok, warrt aver kort dorna vun de Polizei opdeckt un warrt to en Verhöör bröcht. Dor kriggt he en Telegramm, in dat he anwiest warrt, nix to verellen. Sien Dochter Betty is roovt worrn, un nu warrt dormit drauht, dat man ehr Gewalt andeit, wenn he wat över den Inholt vun de Zeddel priesgifft. Bob un Jill seegt also nix un maakt sik in London op egene Verantwoorten op de Söök na jemehr Dochter.
De eenzige Spoor is en Adress op den Zeddel. Tosamen mit Unkel Clive besöcht Bob en Tähndokter. Wohrhaftig stööt se dor op den Verbreker Abott, de jüst dorbi is, en Killer to vertellen, dat he en Staatsgast doodscheten schall. Bob un Clive loopt jem na bit in en Kapell, woneem jüst en Ekte en snaakschen Gottsdeenst afhollen doot. Natürlich warrt de beiden as Frömme kennt. As dat to’n Kamp mit den Killer kummt, sütt Bob in den sien Jackentasch en Intrittskoort för en Kunzert in de Albert Hall. He kann jüst noch Clive, de an’t Weglopen is, achteranropen, dat he Jill anropen un ehr na de Albert Hall schicken schall. Denn kriegt se em beet.
Wiel Bob vun Abott un sien Bande in Sietenrüüm vun de Kapell fasthollen warrt, deit Jill, wat ehr opdragen worrn is. Kort vördem de Killer op den Staatsgast scheten will, fangt se to schreen an un kann op disse Wies den Moord hinnern. De Killer neiht ut un löpt na dat Versteek, warrt dorbi aver vun Scotland Yard verfolgt.
Mit en groten Opmarsch versöcht de Polizei nu, dat Versteek vun de Verbrekers to störmen. De Wedderstand vun de Bande is aver to groot, so dat en wille Scheteree losbreken deit. Bob kann in de Biesternis vun den Kamp sien Dochter freemaken un ehr jüst noch rechttietig op’t Dack redden, vördem he sülvst vun den Killer anschaten warrt. De löpt de Deern op’t Dack achteran, man, vördem he ehr wat andoon kann, warrt he mit en sekeren Schööt vun Jill vun’t Dack schaten. In den sülven Moment brickt ok de Polizei dör, störmt dat Huus un schütt Abott doot.
Cameo-Optritt
ännernHitchcock harr ok in dissen Film een vun sien beropenen Cameo-Optreden: Na ruchweg en halve Stünn vun’n Film dweert he mit en Regenmantel de Straat. Ofschoonst he ok in sien fröhen Filmen faken opduken de, weer sien Cameo to disse Tiet noch nich fast in’t Programm.
Achtergrund
ännernThe Man Who Knew Too Much bargt al all Elementen, för de Hitchcock laterhen beropen warrn schüll. De Film is sien gröttsten Filmspood in England worrn, vördem he in de USA güng. Ok dor harr de Film groten Spood, war ok Grundlaag weer för Hitchcock sien Wessel in de Staaten.
För de Scheeteree, de in den Film wiest warrt, geev dat en echt Vörbild: 1911 harr sik in London en Koppel vun russ’sche Anarchisten in en Huus verkropen. De Polizei hett jem nich bekamen künnt, so dat opletzt de Armee dorto holt warrn müss. In de engelschen Kriminalhistorie is de Fall as de Belagern vun de Sidney Street bekannt.
De austraalsche Komponist Arthur Benjamin hett egens för dissen Film de „Storm Cloud Cantata“ schreven, de in den Film en wichtige rull speelt. Se is in dat Remake vun 1956 ok wedder bruukt worrn, woneem se vun Bernard Herrmann dirigeert worrn is.
As Hitchcock inst na de Ünnerscheden vun de beiden Faten vun 1934 und 1956 fraagt worrn is, hett ne antert, dat disse eerste Faten vun en Amateur mit Talent maakt worrn is, man de tweete vun en Profi.
De düütsche Schauspeler Peter Lorre hett in dissen Film sien eerste Rull in engelsche Spraak speelt. Hitchcock hett em 1936 noch eenmol för den Film Secret Agent ünner Verdrag nahmen. Ok de dormols 15-johrige Dorstellersche vun de roovte Dochter Betty, Nova Pilbeam, hett later noch eenmol in en Hitchcock-Film mitspeelt: Se harr de Hööftrull in Young and Innocent ut dat Johr 1937.
Kritiken
ännern- Reclams Filmführer: Die Handlung des Films ist zwar stellenweise etwas sprunghaft; aber die Spannung ist perfekt kalkuliert, so daß „suspense“ und Überraschungen einander raffiniert ergänzen.[1]
Borns
ännern- ↑ Dieter Krusche, Jürgen Labenski: Reclams Filmführer, 10. Oplaag, Reclam, Stuttgart 1996, S. 397
Weblenken
ännern- The Man Who Knew Too Much in de Internet Movie Database (engelsch)