The Man with Two Brains
The Man with Two Brains (op plattdüütsch so veel as „De Mann mit twee Bregens“; dt. Titel: Der Mann mit zwei Gehirnen) is en US-amerikaansche Filmkummedie ut dat Johr 1983 vun den Speelbaas Carl Reiner. De Hööftrullen spelen Steve Martin, Kathleen Turner un David Warner. In Düütschland is de Film 1985 in de Kinos kamen.
| Filmdaten | |
|---|---|
| Plattdüütsch Titel: | — |
| Originaltitel: | The Man with Two Brains |
| Düütsch Titel: | Der Mann mit zwei Gehirnen |
| Produkschoonsland: | USA |
| Johr vun’t Rutkamen: | 1983 |
| Läng: | 93 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Carl Reiner |
| Dreihbook: | George Gipe Steve Martin Carl Reiner |
| Produkschoon: | William E. McEuen David V. Picker |
| Musik: | Joel Goldsmith |
| Kamera: | Michael Chapman |
| Snitt: | Bud Molin |
| Dorstellers | |
| |
Inholt
ännernDr. Michael Hfuhruhurr is en Neurochirurg, de böös wat los hett, aver togliek aver ok teemlich egozentrisch is. Dat is al’n beten her, dat he sien Fro verloren hett, wat em noch bannig tosetten deit. As he in sien Auto en Interview geven deit, föhrt he ut Versehen de schöne Dolores Benedict över’n Hopen, de he kort later in sien OP dat Leven redden deit. He verkiekt sik in Dolores un heiraat ehr korte Tiet later. Man, wat he nich weet is ehr Verlangen dorna, Mannslüüd to trietzen un to quälen. Duert also nich lang, bit he ehr slechten Sieten kennenlehrt, vun wegen dat ehr dat opletzt blots üm sien Geld geiht. De Dokter dorgegen freit sik gresig op Sex mit sien schöne Fro, de aver jümmers ’n ne’en Vörwand finnt, nich mit em to slapen. Se föhlt sik neemlich apensichtlich mehr to annere Mannslüüd hentogen.
Op de Hochtietsreis lehrt Michael wiel en medizinschen Kongress in Wien den snaakschen unheimlichen Bregenspezialisten Dr. Necessiter kennen, de in sien Labor en Reeg vun Bregens in Nehrlösen opbewahren deit. Mit disse Bregens experimentiert he rüm un versöcht jem to transplanteeren. Bi sien Besöök nimmt de Bregen vun Anne Uumellmahaye över en Oort Telepathie Kuntakt op to den Dokter. Un so entwickelt sik in Michael sien Kopp en stille Romanze mit Anne, för de he Geföhlen wegen ehr binneren Weerten entwickeln deit.
Man, de Tostand vun Anne ehrn Bregen warrt gau slechter, vun wegen dat dat al länger in de Nehrlösen liggt. Michael weet nich wat he doon schall. För em wennt sik allns to’n Go’en, as Dolores dat Opper vun’n berüchtigten Fohrstohlmöörder warrt. Michael transplanteert in’t Labor vun Dr. Necessiter den Bregen vun Anne in den doden Lief vun Dolores, wiel de Polizei in de glieken Tiet versöcht, de Wahnung mit en Rammbuck to störmen.
De Operatschoon hett Spood, liekers hett de Fusion vun Anne ehrn schönen Geist un Dolores ehrn schönen Lief en lütten Haken: As sik rutstellt, weer Anne in ehr vörig Leven eetsüchtig. In de Tiet na de Operatschoon hett se bannig Schokolaad in sik rinstoppt un is rund worrn, so dat Michael ehr toeerst gor nich wedderkennt. Man, dat maakt em nix ut. Dör den Influss vun Anne stieht he doröver.
Kritiken
ännernRoger Ebert hett in’t Dagblatt Chicago Sun-Times vun’n 7. Juni 1983 schreven, dat Steve Martin mit den Film en lange Reeg vun Filmen över fimmelige Wetenschopplers as Young Frankenstein vun Mel Brooks wieterföhren de. He geev to, dat he Steve Martin an sik nich sünners witzig finnen deit, bi disse Kummedie aver lachen künnt hett. Loff fünn he för’t Dorstellen vun Kathleen Turner un David Warner.
Weblenken
ännern- The Man with Two Brains in de Internet Movie Database (engelsch)
- Kritiken to’n Film op Rotten Tomatoes