Kathleen Turner

Kathleen Turner (* 19. Juni 1954 in Springfield, Missouri) is en US-amerikaansche Schauspelersche.

Leven un Loopbahn

Turner is as Dochter vun en Diplomat in verschedene Länner opwossen un hett ehr Kindheit un Jöögd in Kanada, op Kuba, in Washington, Venezuela un England leevt. Wiel se in London op de High School gahn is, hett se regelmatig Theater-Opföhren besöcht un weer vun Theater-Stars as Diana Rigg, Christopher Plummer un Angela Lansbury so andoon, dat se Schauspeelünnerricht an de Central School of Speech and Drama in London nahmen hett. As ehr Vadder doodbleven weer, is de Familie torüch in de USA togen. Dor hett Turner toeerst de Southwestern Missouri State University in Springfield besöcht un möök 1977 ehrn Bachelor of Fine Arts an de University of Maryland Baltimore County.

Se is dorna na New York City gahn, woneem se as Kellnersche arbeit hett un in Off-Broadway-Produkschonen speelt hett. 1978 weer se för de Sepenoper The Doctors anstellt, müss aver na blots een Saison wedder gahn. Ehr Kinopremiere harr se 1981 in Lawrence Kasdan sien Film Body Heat, för den se för en Golden Globe vörslahn worrn is. Dormit harr se ehrn Dörbrook. Dör ehr Utsehn, de rookige Stimm un dat dör den Film wunnen Image as Femme fatale weer se mit Lauren Bacall vergleken.

Mit ehr eher komischen Rullen as in The Man with Two Brains (1982) oder Romancing the Stone (1984) künn se sik in Hollywood wieter etableren. In 1984 speel se ok de Rull vun en Hoor in Ken Russel sien Crimes of Passion, un een Johr later tosamen mit Jack Nicholson in Prizzi’s Honor en dreebastig Möörder-Ehpoor. Wietere bekannte Filmen weern Peggy Sue Got Married (1986) un The War of the Roses (1989).

Dör ehr Dorstellen vun starke Froenslüüd weer Turner in de 1980er Johren een vun de spoodrieksten Schauspelersches in Hollywood. Ut disse Tiet stammt ok dat Leed „The Kiss of Kathleen Turner“ vun den öösterriekschen Pop-Singer Falco. Man, ehr Loopbahn hett denn bannig ünner en swore Form vun en rheumatoide Arthritis un de Naklapp vun de dormit verbunnen Medikamenten leden. Ehr letzte gröttere Filmspood weer 1993 de swarte Kummedie Serial Mum. 1999 is Turner wegen ehr Alkoholafhangigkeit freewillig in en Afwennklinik gahn.

In de letzten Johren is Turner in deelwies gröttere Tietafstännen in Charakterrullen in Kino- un Feernsehprodukschonen to sehn wesen. Bito harr se ok in Bühnenrullen Spood. För Rullen an’n Broadway, de fröher al vun Elizabeth Taylor in’n Film dorstellt harr, weer se tweemol för den Tony Award vörslahn.

Turner weer vun 1984 bit 2007 in tweete Eh mit den Grundstücksmakler Jay Weiss verheiraat, mit den se en Dochter hett.

Filmrullen (Utwahl)

Johr	Titel	Synchroonsnacker
1981	Body Heat dt.: Heißblütig – Kaltblütig	Judy Winter
1983	The Man with Two Brains dt.: Der Mann mit den zwei Gehirnen	Traudel Haas
1984	Romancing the Stone dt.: Auf der Jagd nach dem grünen Diamanten	Traudel Haas
1984	A Breed Apart dt.: Die Brut des Adlers	Dagmar Heller
1984	Crimes of Passion dt.: China Blue bei Tag und Nacht	Traudel Haas
1985	Prizzi’s Honor dt.: Die Ehre der Prizzis	Christina Hoeltel
1985	The Jewel of the Nile dt.: Auf der Jagd nach dem Juwel vom Nil	Traudel Haas
1986	Peggy Sue Got Married dt.: Peggy Sue hat geheiratet	Traudel Haas
1987	Giulia e Giulia dt.: Julia und Julia	Dagmar Heller
1988	Switching Channels dt.: Eine Frau steht ihren Mann	Katrin Miclette
1988	The Accidental Tourist dt.: Die Reisen des Mr. Leary	Traudel Haas
1989	The War of the Roses dt.: Der Rosenkrieg	Traudel Haas
1991	V.I. Warshawski dt.: V.I. Warshawski – Detektiv in Seidenstrümpfen	Traudel Haas
1993	Naked in New York dt.: Nackt in New York	Traudel Haas
1993	House of Cards dt.: Das Kartenhaus	Traudel Haas
1993	Undercover Blues dt.: Undercover Blues – Ein absolut cooles Trio	Traudel Haas
1994	Serial Mom dt.: Serial Mom – Warum läßt Mama das Morden nicht?	Traudel Haas
1995	Moonlight and Valentino dt.: Moonlight & Valentino	Traudel Haas
1997	The Real Blonde dt.: Echt blond	Traudel Haas
1999	The Virgin Suicides dt.: The Virgin Suicides – Verlorene Jugend	Traudel Haas
1999	Baby Geniuses dt.: Die Windel-Gang
2000	Beautiful	Traudel Haas
2000	Prince of Central Park
2008	Marley & Me dt.: Marley & ich	Franziska Pigulla
2009	Californication, Feernsehreeg	Ingrid van Bergen
2011	The Perfect Family
2013	Nurse 3-D	Angelika Bender
2014	Dumb and Dumber To dt.: Dumm und dümmehr	Martina Treger
2017	Another Kind of Wedding

Utteken

Turner weer för ehr Filmrullen bit hüüt (September 2014) mehr as dörtig mol för Filmpriesen vörslahn, dorünner ok eenmol vör den Oscar as Beste Hööftdorstellersche in den Film Peggy Sue Got Married. Uttekent weer se bit hüüt föffteihn mol, ünner annern mit:

1984: den LAFCA Award in de Kategorie Best Schauspelersche för Crimes of Passion un Romancing the Stone
1985: den Golden Globe in de Kategorie Best Hööftdorstellersche – Drama/Musical för Romancing the Stone
1986: den NBR Award in de Kategorie Best Schauspelersche för Peggy Sue Got Married
1986: den Golden Globe in de Kategorie Best Hööftdorstellersche – Drama/Musical för Prizzi’s Honor
1993: den Gold Award in de Kategorie Best Schauspelersche för House of Cards
2004: den Pries för’t Levenswark vun’t Savannah Film and Video Festival
2007: den Pries för’t Levenswark vun’t Provincetown International Film Festival

Weblenken

Kathleen Turner. Mehr Biller, Videos oder Audiodateien to’t Thema gifft dat bi Wikimedia Commons.

Kathleen Turner in de Internet Movie Database (engelsch)
Literatur vun un över Kathleen Turner in’n Kataloog vun de Düütschen Natschonalbökeree
Offizielle Websteed vun Kathleen Turner
Kathleen Turner in de Internet Broadway Database