The Sallyangie
The Sallyangie weer en britisch Folk-Duo, dat 1967 grünnt worrn is. De Musikgrupp bestünn ut Sally Oldfield un ehrn Broder Mike, de to de Tiet 14 Johr old weer. Mike Oldfield is denn aver to de Grupp Barefeet wesselt un speel 1971 al bi Kevin Ayers in sien Grupp The Whole World.
Vun The Sallyangie geev dat blots een Musikalbum, dat 1968 ünner den Titel „Children of the Sun“ rut keem. Dat Duo hett sik aver in dat lieke Johr noch splitt, wiel de beiden Oldfields künstlerisch teemlich ünnerscheedliche Vörstellen harrn. Dat hett sik denn jo ok in de verscheeden Stilrichten wiest, welke de beiden as Solo-Künstler inslahn hebbt. Beide harrn mit jemehr egen Oort düchtig Spood.
Dat Album tellt seker nich to de groten Mielensteen vun de Folk- un Rockhistorie, stellt aver liekers den Grundsteen för de latere Karriere vun de beiden dor un wiest Markmolen vun de Persönlichkeiten vun beide wedder. Tosätzlich to de Langspeelplatt sünd ok twee Singles rutkamen mit Leeder, de nich op de Platt weern. Beide gellt as roor Sammlerstückens ünner Mike-Oldfield-Kenners.
In dat Johr 2002 is dat Album „Children of the Sun“ noch mol as en remastered nee’ opleggt worrn. Bito geev dat en poor Bonusleeder vun Mike Oldfield un sien Süster, de bit dorhen nich publizeert weern.