Willi Koops
Willi Koops (* 13. November 1896 in Näb’nstä; † 11. Januar 1972 in Dannenbarg) weer en düütschen Politiker von de CDU.
Koops is 1896 in Näb’nstä boren.[1] Na de Volksschool hett he op’n Buurhoff von sien Vader mit arbeidt.[1] In’n Eersten Weltkrieg weer he von 1916 bet 1919 Soldaat.[1] He hett von 1922 af an as Speditör arbeidt.[1] Na’n Tweten Weltkrieg is he in de CDU rin.[1] 1945 is he Stadtraad in Dannenbarg worrn un weer denn in’n Kreisdag von’n Landkreis Lüchow-Dannenbarg un von 1946 af an ok Landraad von’n Landkreis Lüchow-Dannenbarg. Von 1949 bet 1968 weer he Börgermeester von de Stadt Dannenbarg. Bi de Wahl 1953 to’n Düütschen Bundsdag hett he mit 25,5 % von de Eerststimmen dat Mandaat in’n Wahlkreis Lümborg-Dannenbarg wunnen. Dormit weer he von 1953 bet 1957 Afornten in’n Bundsdag. In’n Bundsdag weer he Maat von’n Utschuss för Verkehrswesen un Viez-Maat von’n Utschuss för Finanz- un Stüürfragen.
Koops weer in’n Vörstand von’n CDU-Kreisverband Lüchow-Dannenbarg un Vörsitter von’n Elv-Jeetzel-Diekverband un von’n Waterbeschaffungsverband.[1]
Footnoten
ännern- ↑ a b c d e f Rudolf Vierhaus un Ludolf Herbst (Rutgevers): Biographisches Handbuch der Mitglieder des Deutschen Bundestages 1949–2002. Band 1, A–M, Saur, München 2002, ISBN 3-598-23781-2, Sied 444