William Schaus

William Schaus (* 11. Januar 1858 in New York City; † 20. Juni 1942) weer en US-amerikaansch Entomoloog un Lepidopteroloog.

Leven

William Schaus weer de Söhn vun Wilhelm Schaus (1820–1892), en düütsch Inwannerer in de USA un Margaret Connover. Sien Vader weer Kunsthändler un Besitter vun de Schaus-Galerien in New York. Schaus gung anfangs to de PEA in New Hampshire, hett aber ok Scholen in Frankriek un Düütschland besöcht. 1921 kreeg he an de University of Wisconsin sien Master of Arts. En tonächst anstreevt künstlerische Karriere hett he upgeeven, as he ünner den Infloot vun Henry Edwards sien Interesse för de Entomologie, insbesünnere vun de Bottervagels, opdeckt hett. 1919 is he en Stellung an dat Büro för Entomologie bi dat Landwertschapsministerium vun de USA antreeden. Van 1921 an weer he Ehren-Kustos vun de Bottervagelsammlung vun dat National Museum of Natural History. 1925 hett he sien Doktertitel an de University of Pittsburgh maakt (Doctor of Science).

In den Loop vun sien Leven hett he etwa 200.000 Exemplare vun de Ordnung vun de Bottervagels (Lepidoptera) sammelt. Groot Deelen vun sien Sammlung hett he up sien Reisen nah Mexiko, Costa Rica, Guatemala un wiederen Staaten vun Süüdamerika fungen. Insgesamt hett he 327 Genera un över 5,000 Spezies vun Bottervagels, gröttstendeels ut den Tropen vun Süüdamerika, eerstmals beschreeven, as to’n Bispeel Ormetica taniala. Schaus hett sien Sammlung gröttstendeels an dat Smithsonian National Museum of Natural History stift.

Warken (Utwahl)

• American Lepidoptera: illustrations of new and rare species. Part I, London: R.H. Porter, 1892. (Digitaliseert vun Biodiversity Heritage Library bi [1])
• Descriptions of new American butterflies 1902. Kessinger Publishing (2010 Nahdruck)

Weblinks

• William Schaus Papers, 1917-1939 ut de Smithsonian Institution Archives
• Obituary Carl Heinrich & Edward A. Chapin (September 1942) Science 96 (2489): 244–5