Wobeta

Wobeta (ok Wubbeta) is een olen plattdüütschen Vörnaam för Deerns.

Herkamen

Wobeta is de plattdüütsche Form vun den olen germaanschen Naam Wigberta. De sett sik, as dat bi germaansche Naams begäng is, ut twee Delen tohopen: Wig (Striet) un beraht (glinsterig; beröhmt).

Vörkamen

De Naam Wobeta weer in de Dörper rund um Bremen to ganz begäng. Man ok in dat Ommeland vun Grunneng un in Oostfreesland geev dat düssen Naam.

Fundöörd

In ole Listen un Urkunnen (un Graffsteen) finnt sik de Naam

• bi 1750 in Overneeland bi Bremen (Wubbeta)
• 1838 in Dunge (bi Lesum) (Wobeta)
• bi 1850 in Bremen (Wobeta)
• 1875 in Bunnendoor (Wobeta)

Anner Formen

De Naam Wobeta/Wubbeta kümmt noch in en ganze Masse anner Formen vor. Toeerst warrt de Naam afkört to Wobe, Wubbe, Wübbe oder ok Wiebe, denn warrt dor to'n Lüttjer maken noch een Diminutiv anbackt, so dat de Naam denn Wübbecke, Wiebke, Wübke oder Wubke heet. Een anner Form is Wiete. Dat sünd allens lütt maakte Formen vun den Naam Wobeta sien eersten Deel. Man dat gifft so'n Formen ok vun den tweeden Deel vun den Naam: Beta. Bi düssen Naam is nu de eerste Deel vun Wobeta wegbleven. Un dor gifft nu ok Diminutive vun: Beetjen oder Beetje. Dat sünd allens Formen vun Wobeta oder Wubbeta.

Kiek ok nah bi: List vun plattdüütsche Vörnaams