Zentrosom

In de Zellen vun Deerter liggt just buten vun de Karnmembran dat Zentrosom (Spillliefken). Dat besteiht ut twee Zentriolen, de lootrecht een up dat annere staht, in en Proteinmatrix. Dat Zentrosom verdubbelt sik, wenn de Karn deelt weern schall. Achternah geiht elk Zentrosom langsam na een Sieten vun den Karn hen. Mit de Tied spinnt sik in de Gemarken vun elk Zentrosom en Struktur vun Mikro-Fadens ut (fröher is annahmen wurrn, de weert in de Zentrosomen produzeert, man dat lett, as wenn de Fadens ok tostanne kaamt, wenn de Zentrosomen fehlt): Dat is de Spillapparaat. Wenn de Zentrosomen beide an een Siet vun den Zellkarn ankamen sünd, is dor en Nettwarks vun Fadens produzeert wurrn un spannt sik over den ganzen Karn. Düsse Fadens sorgt dor for, datt de Chromosomen in de Zellen (de sitt bi de Zelldeelen loos in dat Zellplasma) in’e Midden holen weert.

Tostannekamen un Wark vun den Spillapparaat (gries) bi de Mitose - I: Interphase; II: Prophase; III: Prometaphase; IV: Metaphase; V en VI: Anaphase; VII: Telophase; VIII: Zytokinese

Zentriolen

Bi de Zellen vun Deerter besteiht dat Zentrosom oder Spillliefken ut twee Zentriolen. Elk Zentriol warrt tostanne brocht dör negen Gruppen vun jummers dree bannig dünne Röhren (negen Gruppen vun je dree Mikrotubuli = Triplett). De Zentriolen staht jummers lootrecht de een up dat annere. Ehre Funktschoon bi de Zelldeelen is noch nich bekannt. Ok sunner Zentriolen kann de Zellen vun en Deert sik delen.

Platwörmer

Bi Unnersöken is rutkamen, dat allerhand Plattwörmer keen Zentrosom in ehre Zellen hefft. Liekers lett dat so, as wenn se en normole Zelldeelen hebben döen. Vundeswegen is ok nich kloor, wat for en Rull dat Zentrosom eentlich spelen deit. Bekannt maakt wurrn sünd düsse Unnersökens in de wichtige wetenschoppliche Tiedschrift Science