A Knight’s Tale
A Knight’s Tale (op platt so veel as „De Geschicht vun en Ridder“; dt. Titel: Ritter aus Leidenschaft) is de Titel vun en US-amerikaanschen Aventüerfilm ut dat Johr 2001 vun den Speelbaas Brian Helgeland. Helgeland hett ok dat Dreihbook schreven, dat op de Canterbury Tales vun Geoffrey Chaucer baseert.
| Filmdaten | |
|---|---|
| Plattdüütsch Titel: | — |
| Originaltitel: | A Knight’s Tale |
| Düütsch Titel: | Ritter aus Leidenschaft |
| Produkschoonsland: | USA |
| Johr vun’t Rutkamen: | 2001 |
| Läng: | 131 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Brian Helgeland |
| Dreihbook: | Brian Helgeland |
| Produkschoon: | Todd Black Brian Helgeland Tim Van Rellim |
| Musik: | Carter Burwell |
| Kamera: | Richard Greatrex |
| Snitt: | Kevin Stitt |
| Szenenbild: | Tony Burrough |
| Kledaasch: | Caroline Harris |
| Dorstellers | |
| |
Inholt
ännernDe Film speelt üm 1360 in England. De junge William Thatcher kummt ut en eenfack Huus: sien Vadder is Dackdecker un kann em nich dat beden, wat he för sien Jung will. So gifft he em Sir Hector an de Hand, üm bi em Knapp to warrn un een Daag villicht sien Droom wohr maken to künnen, Ridder to warrn. Sir Hector leevt dorvun, dat he an Wettstrieden in de Tjost deelnehmen deit un dorvun Priesgeller kriggt.
Deelnehmen dröff an disse Ridderspelen blots de Adel. Man, twölf Johren later blifft Sir Hector bi en Turneer in Frankriek dood. Dat Priesgeld drauht verloren to gahn, un so beslutt William, dat he in de Rull vun den Ridder slippen deit, ofschoonst he dat vun se Afkumst her nich dröff. In Hector sien Rüstung un mit sien Peerd maakt he dat Turneer to Enn un winnt mit Hülp vun Hector sien annern Deenstlüüd, Wat un Roland. As dat nu eenmol klappt hett, besluut se, dat ok op annere Turneren to versöken.
Sik dor antomellen is man gor nich so licht. Eerst as se Hülp vun den noch nich so bekannten Schriever un Dichter Geoffrey Chaucer kriegt, den se ünnerwegens na’t Turneer in Rouen draapt, hebbt se een, de de nödigen Adelsbrefen namaken kann. Vun nu an stellt sik William ünner sien ne’e Identität „Sir Ulrich vun Liechtenstein“ ut Gelderland vör. Geoffrey övernimmt de Rull vun sien Herold, de sien Herrn vör’t Publikum ankünnigen deit. Wat un Roland treedt as Knappen vun Sir Ulrich op.
In Rouen verkiekt William sik in Lady Jocelyn, un ok se schient an em Gefallen to finnen. he is aver nich de eenzige: Ok Graaf Adhemar von Anjou, de op dat Turneer de starkste Gegner vun William is, maakt Jocelyn den Hoff, wiel he sik togliek över den Kampstil un de olle rüstung vun Sir Ulrich lustig maakt. Wat William nich weet: Bi dat Turneer maakt ok de Kroonprinz Edward mit, de inkognito ünner den Naam Sir Colville antreden deit. Colville gifft gegen William gegenöver to,dat he sik kuum noch op’t Peerd holen kann, un William gifft em de Mööglichkeit, sik ehrenhaft vun’t Turneer torüch to tehn. Dormit winnt he de Acht vun Colville, oder egentlich vun’n Prinz.
As de olle Rüstung vun Sir Hector bi en Wettstriet ordig wat afkriggt, lett William sik bi de Smittsche Kate en ne’e maken. Se hett en lichtere Rüstung, de togliek aver ok bestänniger is, vunwegen dat se hard Stahl bruken deit. William steiht goot in’t Turneer, man gegen Adhemar, de noch keen Turneer verloren hett, kann he sik nich dörsetten. Kate warrt liekers in de Grupp opnahmen, as se för William en Kleedaasch för’t Turneerbankett maakt un em dat Dansen bibringt. Adhemar versöcht em apentlich blot to stellen, man Jocelyn wiest, dat se op William sien Siet steiht.
Bi en Turneer in Lagny-sur-Marne drapt se wedder openanner. Adhemar mutt bi de Tjost gegen Sir Colville rieden, tütt aver torüch, as he markt, dat sik de Prinz Edward achter den snaakschen Ridder verbargen deit. Ok William hett dat mitkregen, tritt aver liekers gegen Edward an. Wedder winnt he dordör an Acht. Opletzt winnt William dat Turneer, is aver nich tofreden, vunwegen dat he nich gegen Adhemar rieden künn. Ut Frust stritt he sik mit Jocelyn. As de Grupp wieterteihn deit na dat nächste Turneer in Bordeaux is Jocelyn nich mehr bi de Tokiekers. Man ok Adhemar is nich mehr dorbi, vunwegen dat he in’n Krieg ropen worrn is. So winnt William alias Sir Ulrich dat Turneer un ok de nächsten. Langsom stiggt he to’n spoodrieksten Turneerridder op.
Üm Jocelyn wedder to sehn laadt William ehr schriftlich to dat Turneer in Paris in. Se foddert vun em aver en Teken vun sien Leev un seggt em, dat he mit Afsicht verleren schall. William geiht dorop in un verlütt de eersten Runnen. Jocelyn acht sien Teken un sien Geföhlen. Nu schall he wedder för ehr winnen. Se warrt en Poor, ofschoonst ok Jocelyn ahnen deit, dat William nich Wohrheit keen Ridder is. As in London de Weltmeesterschop utdragen warrt, is Adhemar wedder dorbi. Noch vördem dat Turneer losgeiht, sütt he, as William sien Vadder in’t Armeneerdel besöcht. So finnt he sien wohre Afkumst rut un veraat em. Jocelyn un William sien Frünnen wüllt mit em tosamen utneihn, man William lett dat nich to. OK wenn he keen wohren Ridder is, will he sik doch as en Ridder verholen – und Ridder loopt nich weg. Dorför, dat he an de Ridderspelen deelnahmen hett, wat he as Nich-Adeligen nich dröfft hett, warrt he fastnahmen un an’n Pranger stellt.
Denn aver kummt em Prinz Edward to Hülp, de dorvun andoon is, dat William nich weglopen is – ofschoonst he wüss, dat he verhaft warrt. He holt em rünner vun’n Pranger. Togliek ehrt Edward em dorvör, dat he sik bi de Turneren as en Ridder verholen hett un sleiht em to’n Ridder. Nu kann William doch noch to Recht an’t Turneer deelnehmen un dröpt dorbi ok op Adhemar. De bruukt – gegen de Regeln – en anspitzte Lanz gegen William un besehrt em dormit. Man William is beseelt dorvun to’n eersten mol ünner sien egenen Naam rieden to künnen, dat he wietermaakt. Mit Ünnerstütten vun Jocelyn, sien Frünnen un sien Vadder kann he Adhemar vun’t Peerd stöten un winnt dormit dat Turneer. Opletzt hett William dat also henkregen, sien Schicksal to ännern: He is in de Sellschop opstegen un kann op en Leven ahn Stören mit sien Jocelyn hapen.
Kritik
ännern- Dat Lexikon vun’n internatschonalen Film beschrifft den Film as en amüsante un handwarklich go’e Neeoplaag vun’t Ridder-Genre, dat Figuren opwiest, de gloovhaft moderniseert worrn sünd. Mit dat Ünnerlegen vun Rockmusik-Hymnen stell de Film en Vergliek vun de fröheren Ridderspelen mit hüütige Sportveranstalten an.
- TV Spielfilm schrifft vun en poppig Crossover ut Kostümaventüer, MTV-Dänz un „We Will Rock You“-Chöör un beteken den Film as romantisch, alvern un hartig.
- De Associated Press meen, dat de Film aver nich wegen de Hööftfiguren sehnsweert weer, man wegen twee Randfiguren. Dat een weer Paul Bettany, de as Dichter mit markige Spröök un Kummedie-Talent Acht op sik tütt, un de annere weer Laura Fraser, de as Smittsche mehr Anmoot wiest as de Hööftfigur.
Utteken
ännernDe Film weer för tosamen veerteihn Filmpriese vörslahn, to’n Bispeel in mehrere Kategorien vun de MTV Movie Awards un de Teen Choice Awards. Uttekent weer de Film mit veer Priesen:
- 2002: mit den ALFS Award in de Kategorie Britisch Nevendorsteller vun’t Johr för Paul Bettany
- 2002: mit den Golden Trailer Award in de Kategorie Best Action
- 2002: mit den Taurus Award in de Kategorie Best Arbeit mit Deerten för Pascal Madura
- 2002: mit den Taurus Award in de Kategorie Hardsten Slag för Thomas DuPont
Achtergrund
ännernNa Helgeland sien Utkunft orienteert sik de Geschicht an den Opstieg vun William Marshals (Guillaume le Maréchal) (1144-1219), de ut en eenfach Ümfeld keem un opletzt – vör allen ok dör sien Spood as Turneerridder – eerste Earl vun Pembroke un Regent vun England worrn is.[1][2][3]
In den Film gifft dat en Reeg vun Anachronismen, also Saken, de an sik nich to de dorstellte Tiet passen doot. So warrt de Tjoste as „Sport“ beschreven un de Tokiekers as „Fans“ betekent, de bi’t Turneer La Ola („De Bülg“) maken doot, as se vundaag begäng is. Grote Deelen vun den Film sünd mit moderne Musik ünnerleggt, as to’n Bispeel de bekannte Ingangsszeen, as de Tjosten-Tokiekers to dat Leed We Will Rock You vun Queen mitklatschen doot. An moderne Anpselen is ok dat Nike-Firmenteken op William sien ne’e Rüstung. Ok de Spraak is teemlich modern holen. Man, dat gifft noch vele annere Saken.
De Dreiharbeiten sünd in Prag maakt worrn. För een Szeen in London weer eegens en middelöllerliche Version vun’t London Eye maakt, de in’n Film to sehn weer. De Geschicht speelt för den Achtergrund vun en Tjosten-Liga mit Rang- un Punktsystem, wobi sik de Dreihbookschrievers an de bekannten Ligen vun’n Europääschen Football orienteert hebbt. In de Szeen na William sien eersten Sweertkamp maakt Geoffrey en Anspraak as Herold. Man npümms harr de rumäänschen Statisten vertellt, dat se dorna jubeln schülln. De Szeen is an sik en Outtake, weer aver in’n film binnen laten.
Bi de Proov vun den Afloop vun de Bewegen bi en Tjosten-Szeen hett Heath Ledger den Speelbaas mit’n Bessen en Vörtähn uthaut. Paul Bettany kreeg dorgegen wiel de Dreiharbeiten en Kehlkoppsweer, vunwegen dat he so luut börgen müss as Herold. Bi de eersten Szeen, in de twee Ridders in en Lanzengang sünd, fallt een drapen vun’t Peerd. De Szeen wiest en Unfall, de bi’t Dreihn vun en latere Szeen passeert is. De Stuntman vun Heath Ledger harr de Lanz vun sien Gegner an’n Kopp kregen un weer beswöögt vun’t Peerd stört. Dat de Lanzen ordig spleten deen, man ahn de Stuntlüüd in Gefahr to bringen, weern se ut Holt maakt, dat licht breken deit. Dat Holt weer binnen holl maakt un mit Linguine opfüllt, de nich kaakt weern.
Borns
ännern- ↑ Michael C. Prestwich: Marshal, Familie. In: Lexikon des Mittelalters. Bd. 6, 1980-1999, Sp. 329-330.
- ↑ Marc-René Jung: Guillaume le Maréchal. In: Brepolis Medieval Encyclopaedias - Lexikon des Mittelalters Online. Bd. 4, 1977-1999, Sp. 1783 (http://apps.brepolis.net/lexiema/test/FullScreen.aspx?i=e435070&action=print).
- ↑ Brian Helgeland: Making of. In: Düütsch/Engelsche DVD-Utgaav 2009.
Weblenken
ännern- A Knight’s Tale in de Internet Movie Database (engelsch)
- Kritiken to’n Film op Rotten Tomatoes
- schnittberichte.com: Vergliek vun de verschedenen Snittfaten.