Abgeschminkt!
Abgeschminkt! (op plattdüütsch so veel as „Afsminkt!“) is de Titel vun en düütschen Speelfilm ut dat Johr 1993, de vun Katja von Garnier as Öövfilm an de Hoochschool för Feernsehn un Film München dreiht worrn is. De Film hett en Verleh funnen un is in’t Kino unvermodens mit 1,1 Millionen Tokiekers en groten Spood worrn[1]. De Hööftrullen weern mit Katja Riemann un Nina Kronjäger besett. As de Film mit 55 Minuuten teemlich kort weer, is he in’t Kino tosamen mit den Kortfilm Der schönste Busen der Welt wiest worrn.
| Filmdaten | |
|---|---|
| Plattdüütsch Titel: | — |
| Originaltitel: | Abgeschminkt! |
| Düütsch Titel: | Abgeschminkt! |
| Produkschoonsland: | Düütschland |
| Johr vun’t Rutkamen: | 1993 |
| Läng: | 55 Minuten |
| Originalspraak: | Düütsch |
| Öllersfreegaav in Düütschland: | FSK 12 |
| Filmkru | |
| Speelbaas: | Katja von Garnier |
| Dreihbook: | Katja von Garnier Hannes Jaenicke |
| Produkschoon: | Katja von Garnier Ewa Karlström |
| Musik: | Tillman Höhn |
| Kamera: | Torsten Breuer |
| Snitt: | Katja von Garnier |
| Szenenbild: | Anni Brunner Irene Edenhofer Nikolai Ritter Mike Schäfer |
| Kledaasch: | Birgit Aichele |
| Dorstellers | |
| |
Inholt
ännernFrenzy is en Teknersche. Se leevt un arbeit as Cartoonistin in en Lagerhall in München, de as Atelier herricht is. Man mit ehr Teken flutscht dat nich so recht. Ihr Sketchen sünd eher pessimistisch infarvt, worophen ehr Baas ehr seggt, dat se ehr Geschichten nich so düster maken schall, anners verlütt se ehr Arbeit. Ehr beste Fründin is de Krankenplegersche Maischa, de ehrn Fründ anlegen deit, üm nich mit em över’t Wekenenn na en Drapen fohren to möten. Se will lever utgahn un op’n Putz hauen.
Tosamen besöökt de beiden Fronslüüd en Utstellen, woneem sik Maischa foorts in Rene verkieken deit. Ofschoonst se dat nich towegen bringt, em an den Avend antomaken, kriggt Frenzy över en annere Fründin mehr över Rene rut. Un so künnt sik de beiden den nächsten Dag wedder sehn un tosamenkamen. Dor is blots noch een Saak: Rene hett jüst Besöök vun sien Fründ Mark. Üm den mutt sik Frenzy so lang sorgen, de em de Stadt wiesen schall. Frenzy holt dat allens för Verasen vun Tiet, man de Dag mit Mark entwickelt sik teemlich goot. De beiden hebbt veel Spaaß tosamen.
In de Twüschentiet is Maischa mit Rene Eten wesen un is nu mit em to Huus in’t Bett lannt. Man de Kerl mit dat feine Utsehn wiest sik bi’n Sex as’n groten Rinfall. Dat lütte Aventüer mit Rene is dormit to Enn. Frenzy un Mark draapt sik dorgegen noch mol un finnt na un na toenanner. Dordör finnt Frenzy ok ne’e Motivatschoon för ehr Arbeit. Man, dat Leven blifft swoor: Mark leevt un arbeit utwärts un is dorüm nich faken in München. Maischa dorgegen beslutt för de tokamen Tiet eerst mol blots mit sik sülvst tofreden to wesen. Se sett ehrn Fründ vör de Döör.
Kritik
ännernDer Spiegel hett den Film as ünnerhollern licht beschreven, de sien Figuren frech över de Schullern kiekt[2]. Dorgegen klaag de Bremer Utgaav vun de taz, dat de Geschicht nich as Bispeel för dat Verhollen vun de modernen Fro döögt un dat de Geschicht denn doch faken wedder mit Klischees arbeit[3].
Utteken
ännernDe Film weer för fief Filmpriesen vörslahn un hett veer dorvun wunnen:
- 1994: den Ernst-Lubitsch-Pries för Katja von Garnier
- 1994: den Bayerischen Filmpries in de Kategorie Beste Dorstellersche för Katja Riemann
- 1994: den Bayerischen Filmpries in de Kategorie Regienawasspries för Katja von Garnier
- 1994: den Ehrenpries vun de Student Academy Awards in de Kategorie Best utlännsch Film för Katja von Garnier
Bito is Katja von Garnier 1993 mit den Födderpries vun de Stadt München ehrt worrn[4].
Borns
ännern- ↑ Filmhitlist: Johrslist (düütsch) 1995, afropen an’n 11. März 2010
- ↑ Der Spiegel vun’n 28. Juni 1993
- ↑ taz (Bremer Utgaav) vun’n 30. Juni 1993
- ↑ Starter-Filmpreis – Priesdrägersches un Priesdrägers, afropen an’n 23. Januar 2011
Weblenken
ännern- Abgeschminkt! in de Internet Movie Database (engelsch)
- Abgeschminkt! bi Katja von Garnier
- Abgeschminkt! bi’t Düütsche Filminstitut