Alles auf Zucker!
Alles auf Zucker! (op Platt so veel as „Allens op Sucker!“) is de Titel vun en Filmkummedie ut dat Johr 2004 vun den Speelbaas Dani Levy, de ok an’t Dreihbook bedeeligt weer. De Film hett 2005 in söss Kategorien vun’n Düütschen Filmpries wunnen. In den Film geiht dat üm dat Leven vun Jöden in’t moderne Düütschland.
| Filmdaten | |
|---|---|
| Plattdüütsch Titel: | — |
| Originaltitel: | Alles auf Zucker! |
| Düütsch Titel: | Alles auf Zucker! |
| Produkschoonsland: | Düütschland |
| Johr vun’t Rutkamen: | 2004 |
| Läng: | 95 Minuten |
| Originalspraak: | Düütsch |
| Öllersfreegaav in Düütschland: | FSK 6 |
| Filmkru | |
| Speelbaas: | Dani Levy |
| Dreihbook: | Dani Levy Holger Franke |
| Produkschoon: | Manuela Stehr |
| Musik: | Niki Reiser |
| Kamera: | Carl-Friedrich Koschnick |
| Snitt: | Elena Bromund |
| Szenenbild: | Christian M. Goldbeck |
| Kledaasch: | Lucie Bates |
| Dorstellers | |
| |
Inholt
ännernDe ehmolige DDR-Sportreporter Jakob Zuckermann, de vunndaag beter ünner den Naam Jaeckie Zucker bekannt is, stammt vun ut en jöödsche Familie, man he sülvst sütt sik al lang nich mehr as Jööd. In de Twüschentiet is ut em en Speler un Süper worrn, de in deepe finanzielle Maleschen stickt un sik bito noch mit sien Fro – as ok mit sien Kinner – verkracht hett, de sik vun em scheden laten will. As em sien Besitt pannt warrn schall, beslutt he, an en Billardturneer deeltonehmen, üm dat he sik mit dat Priegeld ut sien Noot redden kann.
Doröver dröpt em de Naricht, dat siene Mudder doodbleven is. Dormit verbunnen is de Utsicht op en Arvschop, de em ok ut de Noot helpen künn. Man, so eenfach is dat ok wedder nich, vun wegen dat sien Mudder bestimmt hett, dat Zucker na dat Gräffnis in Berlin en söven Daag anduern Truertiet na jöödsche Traditschoon afhollen mutt. Dormit noch nich noog, mutt he disse Tiet ok noch tosamen mit sien Broder Samuel (ut’n Westen) verbringen. Eerst wenn sik de beiden Bröder, de siet Johrteihnten in’n Striet leegt, wedder versöhnt, schüllt je jemehr Arv kriegen.
Samuel kummt mit sien Fro Golda un sien Kinner Joshua, de’n strengen Gloven hett, un Lilly ut Frankfurt an. Jaeckie geiht al glieks de Hoot hoch bi den Gedanken an de söven Daag, man sien Fro Marlene gifft sik all Möh, jemehr Besökers en echt jöödsch Heem un Familie to präsenteeren un jem na de Traditschoon koscher Eten antobeden. Natürlich duert dat nich lang, bit opflegen deit, dat Marlene un Jaeckie dat ganze Jödendom blots vörspelen doot. Man, Jaeckie is de ganze Tiet mit sien Gedanken al so ganz woanners, vun wegen dat he op jeden Fall dat Billardturneer mitmaken will, dat en Priesgeld vun 100.000 Euro versprickt. Dat finnt aver to de glieken Tiet statt. Üm deelnehmen to künnen, deit he bi’t Gräffnis von sien Mudder so, as wenn he’n Hartinfarkt hett.
Marlene warrt dat gau toveel mit de Swinnelee un gifft ehr Gästen gegenöver to, dat Jaeckie em wat vörmaakt hett un dat jemehr Eh ok nich mehr to’n Besten steiht. Un ok vun jemehr finanziellen Noot vertellt se. Anners as se dat vermodens weer, warrt se nich glieks vun de Frankforter Zuckermanns verdammt – de hebbt neemlich sülvst ok’n finanzielle Nootlaag un sünd jüst so anwiest op dat Arv. In de Twüschentiet is Jaeckie bi’t Turneer al rutflagen un kriggt nu vun den ganzen Stress un Arger en wirklichen Hartanfall. För’n korte Tiet fallt he sogors in’t Koma.
An’t Enn kamt op beide Familien-Sieten allerhand düstere Placken an’n Dag. So verscheden se ok wesen mücht, so hollt se denn aver doch tosamen, üm to hinnern, dat dat Geld an en jöödsche Gemeen fallt, as dat Testament dat vörsütt, wenn se sik nich eenig warrt. To arven gifft dat opletzt man gor nich so veel, liekers finnt de Familie wedder to’nanner.
Tospraak un Utteken
ännernDe Film is in’n Opdrag vun’n WDR in Koprodukschoon mit den Bayerischen Rundfunk un ARTE entstahn. De Resultat entwickel sik to en överraschen Spood bi de Kritik as ok bi de Tokiekers. Mehr as 1.000.000 Lüüd hebbt sik den Film in de düütschen Kinos ankeken.
De Film is mit en Reeg vun Filmpriesen uttekent worrn un weer för eenige wietere nomineert. Wunnen hett de Film ünner annern:
- 2005: den Ernst-Lubitsch-Pries för Dani Levy
- 2005: den Düütschen Filmpries in de Kategorie Best Speelfilm för Manuela Stehr
- 2005: den Düütschen Filmpries in de Kategorie Best Dreihbook för Dani Levy un Holger Franke
- 2005: den Düütschen Filmpries in de Kategorie Best Speelbaas för Dani Levy
- 2005: den Düütschen Filmpries in de Kategorie Best Filmmusik för Niki Reiser
- 2005: den Düütschen Filmpries in de Kategorie Best Kledaasch för Lucie Bates
- 2005: den Düütschen Filmpries in de Kategorie Best Hööftdorsteller för Henry Hübchen
- 2006: den Düütschen Filmkritikerpries in de Kategorie Best Dreihbook för Dani Levy un Holger Franke