Bützfleter Butendiek
Bützfleter Butendiek (hoochdüütsch Bützflether Außendeich) weer en Oortsdeel von Bützfleet (vondaag is dat Rebeed Deel von de Gemeen Stood in’n Landkreis Stood, Neddersassen). Faken is dor eenfach blots Butendiek to seggt worrn.
Geografie ännern
De Oort liggt in de Masch von de Nedderelv in Keden. In’n Oosten von’n Bützfleter Butendiek leeg de Bützfleter Süderelv, de dat Rebeed von Bützfletersand trennen dee. De Westgrenz weer de Diek von Bützfleet.
De Naveröörd weren Abbenfleet un Kreuel in’n Noorden, Bützfletersand in’n Oosten, Brunshusen in’n Süüdoosten, Hörn un Snee in’n Süden, Götzdörp un Bützfleet in’n Westen un Bossel in’n Noordwesten. In’n Süden geiht dat Rebeed von Bützfleter Butendiek in dat Rebeed von Brunshüser Butendiek över.
Historie ännern
In Bützfleter Butendiek hett dat fröher en Reeg Tegeleen geven.
Ofschoonst de Elvdiek na de Stormflood von 1962 nee boot worrn is (von 1968 bet 1971), so dat dat Rebeed von Bützfleter Butendiek un Bützfletersand ok indiekt is, sünd de Hüüs von Bützfleter Butendiek all verswunnen. Dat Rebeed höört vondaag to dat Industrierebeed Bützfletersand. Von de ole Bützfleter Süderelv sünd blots noch Resten nableven.
Dat Rebeed von Bützfleter Butendiek besteiht ok nu noch to’n gröttsten Deel ut Wischen, aver de Industrieanlagen von Bützfletersand reckt deelwies ok op dat Rebeed von Bützfleter Butendiek.
Verwaltungsgeschicht ännern
De Oort weer fröher Deel von dat Gericht Depenbeek. Nadem dat Gericht oplööst worrn is, hett de Oort bet 1852 to dat Kaspelsgericht Bützfleet von dat Grevengericht Bützfleet tohöört un denn von 1852 bet 1859 to dat Amt Wischhoben. Von 1859 bet 1885 weer dat in dat Amt Freeborg un na 1885 in’n Kreis Keden. 1932 is dat Deel von’n Kreis Stood worrn.
In dat 19. Johrhunnert weer Bützfleter Butendiek en egenstännige Buurschop, is later denn aver Deel von de Gemeen Bützfleet worrn. De Gemeen Bützfleet is an’n 1. Juli 1972 mit de Gemeenreform in Neddersassen Deel von de Gemeen Stood worrn.
Inwahnertall ännern
| Johr | Inwahners |
|---|---|
| 1791[1] | 12 Füürsteden* |
| 1824[2] | 10 Füürsteden* |
| 1848[3] | 46 Lüüd, 4 Hüüs |
| 1. Dezember 1871[4] | 21 Lüüd, 4 Hüüs** |
| 1. Dezember 1885[5] | 35 Lüüd, 6 Hüüs |
| 1. Dezember 1905[6] | 80 Lüüd, 11 Hüüs |
- * Depenbeker Butendiek
- ** dorvon 6 Lüüd un 2 Hüüs in de Buurschop Bützfleet un 15 Lüüd un 2 Hüüs, de en egen Buurschop Bützfleter Butendiek billt hebbt
Religion ännern
Bützfleter Butendiek weer evangeelsch-luthersch präägt un hett to dat Kaspel von de Nicolai-Kark in Bützfleet höört.
Footnoten ännern
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 54
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 130
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 144
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 136
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 154
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 93
Koordinaten:53° 39′ N, 9° 29′ O