Belle-Alliance

Belle-Alliance [bɛl a.ljɑ̃s] is de Naam vun en vörmoligen Kroog. Dor hett Napoleon Bonaparte bi de Slacht vun Waterloo sien Hööftquartier in harrt. In Preußen un Düütschland is bit in dat 20. Johrhunnert ok de Naam „Slacht bi oder vun Belle Alliance“ bruukt wurrn. Dat hett to’n eersten Mol de Preußen ehr General Blücher maakt. He hett al in siene Vertellen vun’n 21. Juni 1815 düssen Naam for de Slacht vun Waterloo nahmen.

Dat Huus un siene Geschicht

Hüdigendags liggt dat Huus an de Natschonalstraat N5 in Belgien, nich wiet af vun von Plancenoit. De Straten geiht vun Paris na Brüssel hen un steiht an en Krüüzung midden up dat Slachtfeld. In’n Momang schall dat Huus en Diskothek ween, man sien Naam hett dat jummers noch nich verlaren. En oold Vertellen seggt, de Naam Belle-Alliance („Goden Tosamensluss“) harr de Kroog kregen, as 1765 en jungen Knecht en ole Weetfro freet harr.

Wat dor passeert is

In den Kroog hett Napoleon sien Hööftquartier harrt un vun dor ut hett he de Slacht föhrt. Datt Blücher un Wellington an’n Avend na de Slacht dor tohopen kamen sünd, warrt betwiefelt, ofschoonst dor Biller vun maalt wurrn sünd. De Naam vun dat Dorp Waterloo is in de Dage vör de Slacht vun Wellington un vun Napoleon bruukt wurrn, um de Allieerten ehre Stellung to benömen. De preuß’sche Marschall hett mit sien Naam „Belle Alliance“ also den Naam vun de franzööschen Stellungen nahmen, wohrschienlich, wiel em de Dubbelsinn (betrocken up den engelsch-preußschen Tosamensluss) goot gefullen hett. Internatschonal hett sik avers de Naam „Waterloo“ dörsett.

• 
  Kroog 2012
• 
  Kroog 1880
• 
  Postkaart
• 
  Gedenktafel
• 
  Dat Drepen, wat dat woll gor nich geven hett

Weblenken

• Offizielle Webstäe to dat Slachtfeld vun Waterloo (engl./franz./nedderl.)