Bloodpuffer

Bloodpuffer is de Beteken vun dat bannig kumplexe Puffersystem vun’t Blood, dat dorför sorgt, dat de pH-Weert op en lütt Rebeet begrenzt blifft. Dat System is also ’n Deel vun’n Süür-Basen-Huusholt. Bi Minschen liggt de instellte pH-Weert bi 7,4 (7,35-7,45). Wenn de Weert dorünner fallen deit, snackt man vun en Azidoos, wenn he to hooch stiggt vun en Alkaloos.

Dat de pH-Weert gliek blieven deit, is wichtig dorför, dat de Organismus leven kann.

Puffersystemen in’t Blood

De Bloodpuffer kummt dör dat Tosamenwirken vun veer ünnerscheedliche Puffersystem tostannen:

• Kohlensüür-Bikarbonat-System (Kohlensüür-Hydrogencarbonat-Puffer) (knapp 75 % vun’t Samtpuffervermögen vun’t Blood, katalyseert dör dat Enzym Carboanhydrataas):

$\mathrm {CO_{2}+2H_{2}O\ \rightleftharpoons \ H_{3}O^{+}+HCO_{3}^{-}}$

• Hämoglobin (knapp 25 % vun’t Samtpuffervermögen vun’t Blood): In’n Suerstoffkreisloop wirkt de rode Bloodfarvstoff as Puffer:

$\mathrm {Hb\cdot H^{+}+H_{2}O\ \rightleftharpoons \ H_{3}O^{+}+Hb}$

• Phosphatpuffer (üm un bi 1 % vun’t Samtpuffervermögen vun’t Blood, speelt intrazellulär en grote Rull):

$\mathrm {H_{2}PO_{4}^{-}+H_{2}O\ \rightleftharpoons \ H_{3}O^{+}+HPO_{4}^{2-}}$

• Proteinatpuffer (ruchweg 1 % vun’t Samtpuffervermögen vun’t Blood): Plasmaproteinen wirkt vun wegen jemehrn amphoteren Charakter as Puffer.