Dat Bloodserum (faken ok eenfach blots as Serum betekent) betekent den fletigen Andeel vun’t Blood, den man kriegen deit, wenn man ut en stollt Bloodproov mit en Zentrifuug all zellulären Bestanddelen (rode un witte Bloodkörpers) aftrennt, de mit de Bloodplattken un de Stollfakters to den so nöömten Bloodkoken verbackt sünd.

In de Fletigkeit, de över blifft, sünd all löste Stoffen binnen, de ok sonst normalerwies in’t Blood binnen sünd mit Utnahm vun de verbruukten Stollfakters. Man kann ok seggen, Bloodserum is dat Bloodplasma ahn de Stollfakters (vör allen Fibrin btw. Fibrinogen). Dör dat löste Bilirubin hett dat Serum en gele Klöör.

De physioloogsch Serumosmolarität (Isotonie) is bi’n Minschen 281-297 mosmol/l.

Sinn ännern

Dat Bloodserum hett vör allen de Opgaav, verscheden Stoffen dör den Lief to transporteeren. So warrt över dat Blood de Zellen mit Nährstoffen versorgt, un to lieken Tiet de Affallstoffen vun’n Stoffwessel wedder aftransporteert. Över dat Serum warrt in Lief ok Hormonen un Antikörpers dorhen brocht, woneem se bruukt warrt. Un ok de Warms, de dör den Stoffwessel tüügt warrt, warrt över dat Bloodserum in’n Lief verdeelt.

Bestanddelen ännern

Hööftbestanddeel vun dat Bloodserum is Water, dat 91 % utmaakt. Dorin löst sünd Proteinen mit en Andeel vun 7 %, de noch mol in de Albuminen un de Globulinen ünnerdeelt warrt. De annern 2 % sett sik ut Nährstoffen, Elektrolyten un Hormonen tohopen.