De Burdon Canal oder Sir John Burdon Canal is en Kanaal in’n Distrikt Belize von dat Land Belize, de von’n Haulover Creek in Belize-Stadt na Süüdwesten vörbi an Fabers Lagoon un dör de Jones Lagoon un wieder na’n Sibun River un de Northern Lagoon föhrt.

De Burdon Canal is von Belize-Stadt bet na de Jones Lagoon 8,5 Kilometer lang, geiht denn 0,7 Kilometer dör de Laguun un is von de Jones Laguun bet na’n Sibun River 2,9 Kilomter lang. De Afsnidd na de Northern Lagoon is noch wedder 4,0 Kilometer lang. Allens tohoop sünd dat also 16,1 Kilometer.

De Kanaal is 1929 för 49.367 Dollar boot worrn[1], as Transportweg för Produkte ut dat Achterland na de Märkte von Belize-Stadt. Dat weer in en Tied, as de Landweg noch kuum utboot weer. Den George Price Highway twüschen Belize-Stadt un Hattieville hett dat noch gornich geven, de Landweg lööp över Ladyville un Burrell Boom. Eerst 1949 is de Straat twüschen Belize-Stadt un Hattieville (de Hector Creek Road) boot worrn. Aver dat hett noch bet 1950 duurt, bet ok de Brügg över’n Burdon Canal trech weer, wat en Hoogbrügg ween müss von wegen den Bootsverkehr op’n Kanaal.

Nöömt is de Kanaal na John Burdon, de von 1925 bet 1932 Generaalguvernör von Brietsch-Honduras weer. Dat Rebeed langs den Kanaal is siet 1992 deelwies as Burdon Canal Nature Reserve schuult.

Footnoten ännern

  1. Economic Conditions in the British West Indies and Contiguous British Territories. H.M. Stationery Office, 1930


Koordinaten:17° 28′ N, 88° 16′ W